1914—Omwaka Mukuru omu Burangi bw’Omu Baibuli
1914—Omwaka Mukuru omu Burangi bw’Omu Baibuli
HAKIRIKUBURAYO emyaka nka makumi ana, abeegi ba Baibuli bakarangirira ngu hakaba nihaza kubaho ebintu bikuru omu mwaka 1914. Ebi bikaba biri bintu ki, kandi ni buhame ki oburiho oburikworeka ngu omwaka 1914 gukaba guri omwaka mukuru?
Nk’oku kihandiikirwe omuri Luka 21:24, Yesu akagira ati: “Yerusaalemu eryaguma neeribatiirirwa abanyamahanga, okuhitsya obu obusingye bw’Abanyamahanga burihwaho.” Yerusaalemu niyo yaabaire eri tauni nkuru y’eihanga ry’Abayudaaya—ekitebe ky’obutegyeki bw’abagabe ab’omu runyiriri ry’Omugabe Daudi. (Zaaburi 48:1, 2) Kwonka, abagabe aba bakaba bari ab’omutaano aha beebembezi b’amahanga. Bakaba bashutama aha ‘kitebe ky’obugabe ekya Yehova’ barikukiikirira Ruhanga we wenyine. (1 Obusingye 29:23) N’ahabw’ekyo, Yerusaalemu ekaba eri akamanyiso k’obutegyeki bwa Yehova.
Ni mu muringo ki, kandi ni ryari obu obutegyeki bwa Ruhanga bwatandika “kuribatiirirwa amahanga”? Eki kikabaho omu mwaka gwa 607 B.C.E. obu Yerusaalemu yaasingurwa Abakaludaaya. ‘Ekitebe ky’obutegyeki ekya Yehova’ kikasigara kitaine okiriho, kandi orunyiriri rw’abagabe abaabaire nibakomooka ahari Daudi rukarekyera aho kutegyeka. (2 Abagabe 25:1-26) ‘Okuribatiirirwa’ oku shi kukaba nikuza kugumizamu ebiro byona? Ngaaha, ahakuba oburangi bwa Ezekieli bukaba bwagambire buti ahari Zedekia, omugabe wa Yerusaalemu ow’aha muheru: “Ihaho ekitambaara, ojuure ekirunga. . . . Tikirigaruka kubaho okuhitsya obu okiineho obushoboorozi ariija, nkaba niwe naakiha.” (Ezekieli 21:26, 27) Ogwo ‘oine obushoboorozi’ aha kirunga kya Daudi ni Kristo Yesu. (Luka 1:32, 33) N’ahabw’ekyo, ‘okuribatiirirwa’ kukaba nikuza kuhwaho Yesu yaaheza kuhinduka Omugabe.
Ekintu kikuru ekyo kikaba nikiza kubaho ryari? Yesu akooreka ngu Abanyamahanga bakaba nibaza kutegyekyera obwire obupimirwe. Ebihandikirwe omuri Danieli eshuura ya 4 nibyo birikutuhwera kumanya obwire obu obutegyeki obwo bwabaire nibuza kumara burikutegyeka. Nibikwata aha burangi obw’omu kirooto ky’Omugabe Nebukadeneeza owa Babulooni. Akareeba omuti muhango ogwatemirwe. Ekitsintsi kyagwo kikaba kitarikubaasa kutooka ahabw’okuba kikabohwa n’ebyoma n’emiringa. Maraika akagira ati: “Ka kigume kityo okumara ‘omwanya nk’ogw’emyaka mushanju.’—Danieli 4:10-16.
Obumwe, Baibuli neegamba aha miti okumanyisa obutegyeki. (Ezekieli 17:22-24; 31:2-5) N’ahabw’ekyo, okutema omuti ogwo ogw’akamanyiso nikyoreka oku obutegyeki bwa Ruhanga, obu yaayorekire kurabira omu bagabe omuri Yerusaalemu bwabaire nibuza kuteganisibwa. Kwonka, okworekwa oku kukooreka ngu ‘okuribatiirirwa kwa Yerusaalemu’ kukaba kuri okw’akaanya kakye—okumara “omwanya nk’ogw’emyaka mushanju.” Obwire obu nibwingana ki?
Okushuuruurwa 12:6, 14 nizooreka ngu omwanya nk’ogw’emyaka eshatu n’ekicweka nigwingana ebiro “rukumi na magana abiri na makumi mukaaga.” N’ahabw’ekyo, “omwanya nk’ogw’emyaka mushanju” gukaamazire obwire buraingwa nari shi ebiro 2,520. Kwonka Amahanga tigararekyeire aho kuribatiirira obutegyeki bwa Ruhanga oburikukirayo obukuru omu biro 2,520 byonka bwanyima y’okugwa kwa Yerusaalemu. N’ahabw’ekyo, nikireebeka gye ku oburangi obu bwabaire nibukwata aha mwanya muraingwa. Okurugiirira aha kitabo kya Okubara 14:34 na Ezekieli 4:6, ebirikugamba aha kiro kimwe ekirikwingana omwaka,’ “omwanya nk’ogw’emyaka mushanju” ogwo gukaba nigwija kumara emyaka 2,520.
Emyaka egyo 2,520 ekatandika omu kw’Ikumi 607 B.C.E., obu Yerusaalemu yaakwatwa Abakaludaaya reero omugabe omu runyiriri rwa Daudi akaihwa aha kitebe ky’obutegyeki bwe. Obwire obwo bukahwaho omu kw’Ikumi 1914. Omu kwezi okwo, “obusingye bw’Abanyamahanga” bukahwaho, reero Ruhanga yaayemeka Yesu Kristo nk’Omugabe omu iguru. *—Zaaburi 2:1-6; Danieli 7:13, 14.
Nk’oku Yesu yaarangire, ‘okubaho’ kwe nk’Omugabe omu iguru kukamanyirwa aha bintu ebirikutiinisa ebyabaireho omu nsi—entaro, enjara, emitsitsa, n’endwara. (Matayo 24:3-8; Luka 21:11) Ebyabaireho ebyo n’obuhame bukuru buzima ngu omwaka 1914 nigwo mwaka ogu Obukama bwa Ruhanga bwatandika kutegyeka omu iguru kandi ngu nibwo ebiro by’emperu y’obusingye obu obubi byatandika.—2 Timoseo 3:1-5.
[Obugambo obw’Ahansi]
^ kacw. 4 Okuruga omu kw’Ikumi 607 B.C.E. okuhika omu kw’Ikumi 1 B.C.E. hariho emyaka 606. Obu hatariho omwaka zeero, okwiha omu kw’Ikumi 1 B.C.E. okuhika omu kw’Ikumi 1914 C.E. hariho emyaka 1,914. Twagaita emyaka 606 aha myaka 1,914, nitutunga emyaka 2,520. Ebindi ebirikukwata aha kugwa kwa Yerusaalemu omu mwaka gwa 607 B.C.E., reeba ekihandiiko ekiine omutwe “Embara y’omuri Baibuli” (Chronology) omu kitabo ekirikwetwa Insight on the Scriptures, ekyahandiikirwe Abajurizi ba Yehova.
[Orukaanga/Ekishushani ekiri aha rupapura 216]
(Okureeba oku birikushoboororwa omu bigambo, reeba ekitabo)
“OMWANYA GW’EMYAKA MUSHANJU”
Emyaka 2,520
Emyaka 606 n’emyezi 3 Emyaka 1,913 n’emyezi 9
Okw’Ikumi 607 B.C.E. okuhika Okw’Okubanza 1, 1 C.E. okuhika
Okw’Ikumi n’Ebiri 31, 1 B.C.E. Okw’Ikumi 1914
607 ← B.C.E C.E. → 1914
“Yerusaalemu eryaribatiirirwa “Orikwija aine
Abanyamahanga” obushoboorozi”
