Ekitebyo 65

Obugabe Bwabaganisibwamu

NOOMANYA ahabw’enki ogu mushaija oriyo naatagura ekanzu ye omu bucwekacweka? Yehova akamugambira okukikora. Ogu mushaija ni Ahiya omurangi wa Yehova. Omurangi noomanya eki kirikumanyisa? N’omuntu ou Ruhanga arikugambira ebirikuza kubaho obwire butakahikire.

Ahiya hanu ariyo naagamba na Yeroboamu. Yeroboamu n’omushaija ou Sulemaani ahaire okureeberera emirimo emwe ey’okwombeka. Ahiya ku abugabugana na Yeroboamu hanu omu muhanda, Ahiya akora ekintu ekitari kya buriijo. Ajuura ekanzu nsya ei ajwaire kandi agitagataguramu obucweka 12. Agambira Yeroboamu ati: ‘Yetwarire obucweka 10.’ Noomanya ahabw’enki Ahiya yaaha Yeroboamu obucweka 10?

Ahiya ashoborora ngu Yehova naaza kwiha obugabe ahari Sulemaani. Agira ngu Yehova naaza kuha Yeroboamu enganda 10. Eki nikimanyisa ngu mutabani wa Sulemaani Rehoboamu naija kutsigaza enganda ibiri zonka ez’okutegyeka.

Sulemaani ku ahurira eki Ahiya yaagambira Yeroboamu, agira ekiniga kingi. Agyezaho kwita Yeroboamu. Kwonka Yeroboamu airuka ahungira Misri. Bwanyima y’omwanya mukye, Sulemaani afa. Akaba ari omugabe okumara emyaka 40, kwonka hati omutabani Rehoboamu ahindurwa omugabe. Yeroboamu ari omuri Misri, ahurira ngu Sulemaani afiire, n’ahabw’ekyo aija agaruka Israeli.

Rehoboamu ti mugabe murungi. Ni mubi munonga aha bantu n’okukira ahari ishe Sulemaani. Yeroboamu hamwe n’abandi bashaija bakuru baija aha mugabe Rehoboamu okumushaba kutwaza gye abantu. Kwonka Rehoboamu ayanga kuhurikiriza. Buzima abeera kimwe mubi n’okukira aha ku yaabaire ari. N’ahabw’ekyo abantu bahindura Yeroboamu omugabe okutegyeka enganda 10, kwonka enganda ibiri eza Benyamiini na Yuda zigumya Rehoboamu nk’omugabe waabo.

Yeroboamu tarikwenda abantu be okuza Yerusaalemu okuramya omu hekalu ya Yehova. N’ahabw’ekyo akora ebishushani bibiri by’enyana kandi areetera abantu ab’omu bugabe obw’enganda 10 kuziramya. Omu mwanya mukye, eihanga ryona ryijura obubi n’obutemu.

N’omu bugabe obw’enganda ibiri harimu oburemeezi. Hatakahweireho emyaka etaano Rehoboamu ahindukire omugabe, omugabe wa Misri aija kurwanisa Yerusaalemu. Atwara eby’obuguzi bwingi bingi kuruga omu hekalu ya Yehova. N’ahabw’ekyo hekalu ekamara omwanya mukye eri omu buteeka obu yaabaire erimu obu yaayombekwa.

1 Abagabe 11:26-43; 12:1-33; 14:21-31.