Okutwaza gye kutuubire munonga. Abarwaire nibagambira kubi abashaho, abantu nibagambira kubi abagabuzi b’eby’okurya, abarikukora omu biiruka by’orweteeraine nibateerwa, abaana b’emicwe mibi nibajuma abashomesa, babatiinatiinisa, kandi obumwe babateera, ab’eby’obutegyeki abamwe nibeetaatsya omu mihondano, kandi abandi nibegambaho ngu nibatwaza gye.

 Baibuli niyo erimu obuhabuzi oburikwesigwa oburikukwata aha micwe eshemeire. Kandi neeshoboorora n’ahabw’enki abantu barikutwaza kubi hati.

 Okutwaza gye, ekirikumanyisa emicwe mirungi, eshemeire, kandi erikwikirizibwa, nikireebwa butunu ngu kutuubire omu nsi yoona.

•   Okucondooza okurikwesigwa okuherize kukorwa, nikworeka ngu emicwe mirungi omuri United States etuubiire kimwe omu myaka 22 ehingwire.

•   Abantu 32,000 abaabuuziibwe kuruga omu mahanga 28, ebicweka 65 ahari igana aharibo bakagira ngu okutwaza kubi kw’abantu okuriho hati nikwo kurikukirayo obubi oku barareebire.

 Baibuli ekagamba kare aha micwe mibi ei turikureeba hati.

•   “Omu biro by’emperu, nihaija kubaho ebiro by’akabi kaingi. Abantu nibaija kuba abarikwekunda, abanyamururu, abanyamaryo, abarikwemanya, abarikujumiirana, abarikugomera abazaire baabo, entasiima, abarikutwaza kubi, n’enshaarizi.”—2 Timoseo 3:1-3, Good News Translation.

 Okumanya ebirikukiraho aha ku obunabi obu burikuhikiirira, shoma ekicweka “Did the Bible Predict the Way People Think and Act Today?”

 Omu nsi egi ei entwaza nungi etuubiire kimwe, obukaikuru bw’abantu bashangire ngu Baibuli neeha obuhabuzi burungi aha kutwaza gye. Obuhabuzi bwayo obw’emicwe nibwesigwa obutoosha, hati n’ebiro byona. (Zaaburi 111:8) Yetegyereze eby’okureeberaho ebimwe:

•   Eki Baibuli erikugamba: ‘Ebi murikwenda ngu abantu babagirire, naimwe mube nikwo mwabagirira.’—Matayo 7:12.

   Amakuru: Twine kutwariza abandi omu muringo gw’embabazi kandi ogw’ekitiinisa, nk’oku naitwe turikwenda batutwarize.

•   Baibuli neegira eti: “Mujuure ebishuba, omuntu weena agambe amazima na mutaahi we.”—Abaefeso 4:25.

   Eki kirikumanyisa: Twine kuba ab’amazima omuri byona ebi turikugamba n’ebi turikukora.

 Kubaasa kumanya ebirikukiraho aha nshonga egi, nyabura ’we shoma:

•   Omunaara gw’Omurinzi ogwine omutwe, “Ekirikubaasa Kukuhwera Kumanya Ekihikire n’Ekigwire.”

•   Ekicweka “Tolerance—How the Bible Can Help.”