Emigambire ya rwango, obushaarizi bwa rwango, endwano z’enganda, n’entaro, nibyo birikukirayo omu makuru.

•   “Abantu abarikurengyesereza hati nibajanjaaza munonga emigambire ya rwango aha mikura y’empurizana ahabw’orutaro rwa Israeli na Gaza.”—Orupapura rw’amakuru The New York Times, Okwaikumi-na-kumwe 15, 2023.

•   “Kuruga 7 Okwaikumi, rwango eyeyongyereire kimwe, emigambire ya rwango, n’obushaarizi.”—Bikagambwa Dennis Francis, orikukurira Orukiiko rw’Amahanga Ageeteeraine, Okwaikumi-na-kumwe 3, 2023.

 Emigambire ya rwango, obushaarizi, n’entaro ti bisya. Nangwa, Baibuli neegamba aha bantu ba ira abaabaire ‘nibatambika ebigambo byabo nk’emyambi,’ kandi abaabaire nibataaruuza entaro n’obushaarizi. (Zaaburi 64:3; 120:7; 140:1) Kwonka Baibuli neegira ngu rwango ei turikureeba hati, eine eki erikumanyisa.

 Baibuli neeyoreka enshonga ibiri ahabw’enki hariho rwango y’amaani hati.

1.  1. Baibuli ekagamba kare aha bwire obu ‘okukunda kw’abaingi kwabaire nikwija kuhora.’ (Matayo 24:12) Abantu okutwarira hamwe omu mwanya gw’okugira rukundo, bakaba nibaija kugira emiteekateekyere ya rwango.—2 Timoseo 3:1-5.

2.  2. Rwango y’amaani eriho hati neereetwaho omuzigu mubi Sitaane kandi Omuregi. Baibuli neegira ngu ‘ensi yoona eri omu butegyeki bw’omubi ogwo.’—1 Yohaana 5:19; Okushuuruurwa 12:9, 12.

 Kwonka, Baibuli nabwo neegira ngu Ruhanga juba naija kumariraho kimwe ebirikureeta rwango. Kandi ekikuru munonga, naija kwihiraho kimwe obusaasi obureetsirweho rwango. Baibuli neeraganisa eti:

•   Ruhanga ‘naija kuragaza amarira goona aha maisho gaabo, tiharikwija kubaho kufa bundi, n’obu kwakuba okucura, nari okurira, nari obusaasi, ahakuba ebya ira nibiija kuba bihwaireho.’—Okushuuruurwa 21:4.