Kodi a Mboni za Yehova Amakhulupirira Chipangano Chakale?
Inde. A Mboni za Yehova amakhulupirira kuti mabuku onse a m’Baibulo “anauziridwa ndi Mulungu, ndipo ndi opindulitsa.” (2 Timoteyo 3:16) Izi zikutanthauza kuti mabuku onse amene anthu amawatchula kuti Chipangano Chakale ndi Chipangano Chatsopano ndi ochokera kwa Mulungu. Nthawi zambiri a Mboni za Yehova amatchula magawo awiri a m’Baibulowa kuti Malemba Achiheberi ndi Malemba Achigiriki. Izi zimathandiza kuti anthu ena asamaganize kuti mbali zina za m’Baibulo zinatha ntchito.
N’chifukwa chiyani Akhristu amafunikira Chipangano Chakale ndi Chatsopano?
Mulungu anauza mtumwi Paulo kulemba kuti: “Zinthu zonse zimene zinalembedwa kalekale zinalembedwa kuti zitilangize.” (Aroma 15:4) Choncho nkhani zimene zili m’Malemba Achiheberi ndi zothandiza kwambiri kwa ife. M’malemba amenewa mulinso mbiri yakale yofunika kwambiri komanso malangizo othandiza.
Muli mbiri yakale yothandiza kwambiri. M’Malemba Achiheberi muli nkhani zokhudza mmene Mulungu analengera zinthu komanso zimene zinachitika kuti anthu achimwe. Pakanapanda nkhani zimenezi sitikanadziwa mayankho a mafunso ofunika kwambiri ngati akuti: Kodi tinachokera kuti? N’chifukwa chiyani anthufe timafa? (Genesis 2:7, 17) Komanso m’Malemba Achiheberi muli nkhani zosonyeza mmene Yehova Mulungu ankachitira zinthu ndi anthu. Anthu amenewa ankakumana ndi zinthu zofanana ndi zimene timakumana nazo.—Yakobo 5:17.
Muli malangizo othandiza kwambiri. M’mabuku a m’Baibulo a Miyambo ndi Mlaliki, omwe ali m’gulu la Malemba Achiheberi, muli malangizo othandiza kwambiri pamoyo wathu. Mwachitsanzo, m’mabukuwa muli malangizo othandiza kuti anthu azikhala ndi banja losangalala (Miyambo 15:17), othandiza kuti asamachite ulesi pa ntchito ndiponso kuti asamagwire ntchitoyo modzipanikiza (Miyambo 10:4; Mlaliki 4:6), komanso muli malangizo othandiza achinyamata kuti akhale ndi moyo wosangalala (Mlaliki 11:9–12:1).
Tingaphunzirenso zinthu zofunika kwambiri m’Chilamulo cha Mose, chomwe chimapezeka mu Tora (mabuku 5 oyambirira m’Baibulo). N’zoona kuti Akhristu satsatira Chilamulo. Komabe m’Chilamulocho muli mfundo zimene zingatithandize kuti tizikhala ndi moyo wosangalala.—Levitiko 19:18; Deuteronomo 6:5-7.
Mwina Mungakondenso Kudziwa Izi
KUYANKHA MAFUNSO A M’BAIBULO
Kodi Malamulo Khumi a Mulungu Ndi Chiyani?
Kodi malamulowo anaperekedwa kwa ndani? Kodi Akhristu ayenera kuwatsatira?
KUYANKHA MAFUNSO A M’BAIBULO
Kodi Mose Ndi Amene Analemba Baibulo?
Mose analemba nawo Baibulo? Kodi ndi anthu angati amene analemba Baibulo?
MFUNDO ZOFUNIKA ZA M'BAIBULO
Kodi Analemba Baibulo Ndi Ndani?
Ngati Baibulo linalembedwa ndi anthu, kodi n’zomveka kunena kuti ndi Mawu a Mulungu? Kodi m’Baibulo muli mawu a ndani?
ZOKHUDZA IFEYO
Pemphani Kuti Tidzakuyendereni
Mutha kukhala ndi mwayi wokambirana nkhani inayake ya m’Baibulo kapena kudziwa zambiri zokhudza Mboni za Yehova.
MAFUNSO OFUNSIDWA KAWIRIKAWIRI
Kodi a Mboni za Yehova Ali ndi Baibulo Lawolawo?
Kugwiritsira ntchito Mabaibulo osiyanasiyana kungakuthandizeni pophunzira Baibulo. Pali zifukwa zitatu zimene zimapangitsa kuti Baibulo la Dziko Latsopano la Malemba Opatulika likhale labwino kuphunzira.