Pemphero ndi mphatso yapadera imene Mulungu anapatsa anthu kuti azitha kulankhula naye ndi kufotokoza mmene akumvera. Mneneri Davide anapempha kuti: “Inu Wakumva pemphero, anthu a mitundu yonse adzabwera kwa inu.” (Salimo 65:2) Koma kodi tizipemphera bwanji kuti Mulungu azimva mapemphero athu komanso kutidalitsa?

Mukamapemphera kwa Mulungu ‘mumamukhuthulira za mumtima mwanu’ ndi kumuuza mmene mukumvera. (Salimo 62:8) Mulungu Wamphamvuyonse amakonda mapemphero ochokera pansi pa mtima.

Ngakhale kuti Mulungu ali ndi mayina audindo ambiri, dzina lake lenileni ndi limodzi lokha. Paja iye anati: “Ine ndine Yehova. Dzina langa ndi limeneli.” (Yesaya 42:8) M’Malemba Opatulika, dzina lakuti Yehova limapezeka nthawi zosachepera 7,000. Aneneri ambiri ankatchula dzina lenileni la Mulungu popemphera. Abulahamu anati: “Chonde Yehova, . . . ndiloleni ndilankhulebe [ndi inu].” (Genesis 18:30) Nafenso tizitchula dzina la Mulungu lakuti Yehova tikamapemphera.

Mulungu amamvetsa maganizo athu komanso mmene tikumvera posatengera chinenero chathu. Mawu ake amatitsimikizira kuti: “Mulungu alibe tsankho. Iye amalandira munthu wochokera mu mtundu uliwonse, amene amamuopa ndi kuchita chilungamo.”​—Machitidwe 10:34, 35.

Komabe, kuti Mulungu atidalitse tiyenera kuchita zambiri kuwonjezera pa kupemphera. M’nkhani zotsatirazi tiona zimene tiyenera kuchita.