Éí áhóótʼįįdígíí sheʼiinaʼ łah áyiilaa, biniinaa Diyin God bééhodeesįįł niizı̨́ı̨́ʼ. Éí bikéédóó áhóótʼįįdígíí tʼah índa baa hodeeshnih. Áłtséhígíí éí tʼah nooséłí nishłı̨́įgo haʼátʼíí biniinaa God baa íhodeeshʼááł niizı̨́ʼígíí baa chʼíhodeeshʼááł nisin.

1937go Guesnaingi shiʼdizhchı̨́. Éí France náhookǫsjigo kin dahshijaaʼ léiʼgi łeejin haagééd dahólǫ́. Shizhéʼé éí łeejin haigédí nilı̨́įgo naanish ayóó hoł ílínígíí yee nashineeztą́ą́ʼ. Áádóó, doo tʼáá ákogi átʼéii yijoołáhígíí ałdóʼ yee shíhoołʼą́ą́ʼ. Éí tʼóó ahayóí łeejin haigédí danilíinii doo tʼáá ákogi átʼéii ádabiʼdilʼı̨́ı̨́ ńtʼééʼ. Áádóó tʼóó báádahadzidgo biiʼ nidajilnishígíí biniinaa yíká adoolwoł nízin ńtʼééʼ. Éí biniinaa organizations łaʼ łeejin hadeigédí yíká anájahígíí áájí atah jizlı̨́ı̨́ʼ. Áádóó ééʼ neishoodii tʼóó ádazhdilʼı̨́įgi yéigo biʼdiiłʼáá ńtʼééʼ. Éí ayóó daʼatʼı̨́į ndi, łeejin hadeigédí aadę́ę́ʼ chʼiyáán dóó béeso deełníigo biniinaa shizhéʼé bánáháłchįįhgo oodląʼ tʼáadoo yee nashineeztą́ąʼ da. Diyin ndi tʼáadoo yee shichʼįʼ haadzíiʼ da.

 Hóyáanii sélı̨́įʼgo shí ałdóʼ, doo tʼáá ákogi átʼéii jooshłxá silı̨́ı̨́ʼ. Łaʼ Francegi déʼéyóní yéigo deijoołáhígíí ałdóʼ yéigo shiʼdiiłʼá ńtʼééʼ. Déʼéyóní badaʼáłchíní ayóó bił ahídadínéeshnáago soccer bee ninádeiʼneeh ńtʼééʼ. Shimá éí doo French nilı̨́į da, ndi Polish átʼéii ńtʼééʼ. Ałʼąą dadineʼé kʼé binahjįʼ ahił kéédahojitʼı̨́į doo chʼééh nisin ńtʼééʼ.

1957go kééhonishtʼı̨́įgi nahatʼaʼ éí siláołtsooí atah dííleeł shiʼdooʼniid. Éí biniinaa dził Algeriadi tʼóó átséedi baa chʼíhoníʼą́ yę́ę áhóótʼįįd. Shą́ą́ʼ ákweʼé God shíká anilyeed dishníigo néiisíkan. Éí ákweʼé disétsʼą́ʼígíí doo shiʼanaʼí átʼı̨́į da lá, ndi télii léiʼ tʼáá áháníjįʼ bił ahinééłʼı̨́ı̨́ʼ. Áajįʼ shiiʼ hááhwiisdoh. Éí ákóhóótʼįįdígíí áádóó daʼahijigánígíí biniinaa iiná wolyéii tʼáá yédígo baa nitsékeesgo áshiilaa. Haʼátʼíísh biniyé kǫ́ǫ́ honiidlǫ́? Diyin Godísh nihaa aʼááh nízin? Kʼéésh hoolʼáágóó hólǫ́ǫ doogo átʼé?

Tʼahádóó shizhéʼé dóó shimá bighandi nánísdzáago ákweʼé Jiihóvah Yá Dahalneʼé łaʼ shaa níyá, Diyin Bizaad léiʼ łaʼ shee níʼą́. Áádóó Algeriadi nánísdzáago éí yíníshtaʼgo baa nídiisdzá. Revelation 21:3, 4 yíníshtaʼgo éí nabikʼítséskeesgo áshiilaa. Éí kóní: “Diyin God yiiʼ kééhatʼíinii diné bił hólǫ́. . . . Dabinákʼeeshtoʼ tʼáá ałtso yá yidootʼoł, aniné ádin doo, áádóó atínáhodinidleeh ádin doo, áádóó cha ádin doo índa adiniih ádin doo.” Daʼ díísh tʼáá aaníí áhodoonííł? Díí saadígíí éí shił chʼíʼdiníłdláád nahalingo áshiilaa. Shą́ą́ʼ íídą́ą́ʼ God dóó Diyin Bizaad doo ayóó shił bééhózin da ńtʼééʼ.

1959go siloałtsooí bitsʼá níyá. Ákohgo Jiihóvah Yá Dahalneʼé François wolyéego Diyin Bizaad biiʼdóó tʼóó ahayóí yee nashineeztą́ą́ʼ. Diyin Bizaad biiʼdóó God bízhiʼ Jiihóvah wolyéhígíí shił ííshjání áyiilaa. (Ps. 83:18) François éí nahasdzáán bikááʼgóó tʼáá ákogi éʼétʼéii hólǫ́ǫ dooleeł ní, áádóó ałdóʼ tʼáadoo bee honóoshónígo áhodoolnííł níí lá. Éí Revelation 21:3, 4 ání yę́ę bihodoolnííł dííniid.

Díí átʼéego naʼnitinígíí yéigo shijéí yidiisʼnááʼ. Ákótʼée ndi, ééʼ neishoodii doo hazhóʼó Diyin Bizaad biiʼdóó nidaʼjinitinígíí biniinaa ayóó shiʼdiiłʼá ńtʼééʼ. Áko tʼáá shizhéʼé doo tʼáá ákogi éʼétʼé yikʼijįʼ nilı̨́ yę́ę nahalingo, shí ałdóʼ tʼahdii ákótʼéego nitséskees ńtʼééʼ. Áko éí tʼáá ákǫ́ǫ́ hashtʼedoolníiłgo nitséskees ńtʼééʼ.

François dóó łaʼ shikʼis Jiihóvah Yá Dahalneʼé danilínígíí shijéí hashtʼedítʼéii doogi yee shíká ííjééʼ. Oodlání éí doo ánihwiiʼaahii danilı̨́į da, ndi díí diné éí nizhónígo haneʼ God biNahatʼaʼ yaa halneʼígíí bił dahwiilneʼgo bee bíká anídeijah dashidííniid. Háálá, díí éí Jesus binaanish áyiilaa. Áádóó bídahoołʼaahii ałdóʼ yee neineeztą́ą́ʼ. (Matt. 24:14; Luke 4:43) Diné doo tʼáá naʼníleʼdii bichʼįʼ yáʼátiʼ daaígíí bíhooshʼaah ńtʼééʼ. Azhą́ shı̨́ı̨́ beʼoodląʼígíí doo shił aaníi da ndi. Diyin Bizaad ání: “Bóhólníihii bá naalʼaʼí jílíinii doo saad hojíłǫ́ǫ da doo, nidi diné tʼáá ałtso bichʼįʼ há áhwiinítʼı̨́ʼí doo.”—2 Tim. 2:24.

Sheʼiinaʼ yishtʼih yę́ę éí łah íishłaa. Áádóó 1959go circuit assemblydi baptize  áshiʼdilyaago Jiihóvah Yá Dahalneʼé łaʼ atah sílı̨́ı̨́ʼ. Ákweʼé sister ániid naagháá léiʼ Angèle wolyéego bééhosésįįd. Áłah náʼádleeh yah anádááhjí atah náshdááh ńtʼééʼ. 1960go asiigeh. Eʼasdzą́ą́ dóó asdzání yáʼátʼéehii jílı̨́, éí Jiihóvah shee níłtı̨́.—Prov. 19:14.

Ląʼí nááhaigo hastóí dahóyáanii aláahgo bił daʼílíinii bitsʼą́ą́dóó ídahoołʼą́ą́ʼ. Łaʼ bíhoołʼą́ʼígíí éí naanish nihaa ditʼáahgo azhą́ shı̨́ı̨́ yéigo nantłʼa ndi, aʼohgo ádíníilzingo éí Proverbs 15:22 ánínígi beʼiilʼı̨́į doo, éí kóní: “Kótʼéego daaníinii tʼóó adahayóigi biniyé ádahatʼíinii dabidziilgo hashtʼedaalneʼ.”

Áko 1964go kótʼéego daaníinii éí shí bee shichʼįʼ haʼoodzíiʼgo baa ákoniizı̨́ı̨́ʼ. Íídą́ą́ʼ circuit overseer sélı̨́ı̨́ʼ. Congregations bitahgóó yisháałgo shinaanish ályaa. Éí brothers dóó sisters Jiihóvah áhą́dígo yił kʼé daʼahidiʼníi dooígíí bee chánah áshʼı̨́į doo biniyé ashiʼdoolʼaʼ. Ákondi 27 shinááhaigo éí naanish yiyiichįįhii tʼahdoo baa nisééhgóó baa ákoniizı̨́ı̨́ʼ. Biniinaa ląʼígóó neʼasiyésííʼ. Ákondi éí bitsʼą́ą́dóó íhodeeshʼááł niizı̨́ı̨́ʼ. Áko hastóí daneeyáanii kótʼéego daanínígíí binahjįʼ íhoołʼą́ą́ʼ.

Circuit overseer nishłı̨́įgo díí áhóótʼįįdígíí łaʼ bénááshniiʼ. Parisdi congregation baa níyá bikéédóó łaʼ brother tʼáá sahdii nichʼįʼ haasdziihgoósh bíighah shidííniid. Tʼáá áko bidííniid.

Ńtʼééʼ áshíłní: “Louis, azeeʼálʼíní éí háísh yíká análwoʼ łeh, bitah dahoneezgaiígíísh doodaiiʼ doo ádaatʼéhígíí?”

“Bitah dahoneezgaiígíí,” dííniid.

Ńtʼééʼ ání: “Aooʼ éí tʼáá aaníí. Ákondi Jiihóvah tʼáá íiyisí áhą́digo yił kʼé daʼahidiʼnínígíí tʼéiyá bił nanildeeh łeh. Congregation overseer danilínígíida. Nihicongregation biiʼ tʼóó ahayóí brothers dóó sisters bichʼįʼ nidahwiiʼnáago átʼé. Łaʼ ániidí Jiihóvah Yá Dahalneʼé daazlı̨́ı̨́ʼ, doodaiiʼ łaʼ ádaa deinítʼı̨́ éí bił nanildeeh doo, doodaiiʼ bił náʼóhdı̨́įh doo danízin.”

Éí shibrother yee shichʼįʼ haadzíʼígíí yéigo baa ahééh niizı̨́ı̨́ʼ. Jiihóvah bidineʼé ayóóʼáyóʼnínígíí éí yéigo shidiisnááʼ. Éí doo ákóʼiishłaaígíí baa shíniʼ ndi, tʼáá ákǫ́ǫ́ bikʼeh hóshʼı̨́įgo baa nídiisdzá. Díí brothers biniinaa Jiihóvah bichʼįʼ ahééh niizı̨́ı̨́ʼ.

 1969 dóó 1973go éí níléí naakigo international conventions Colombes, Parisdi, Food Service Department biniʼdoonishígíí shaa deetʼą́. 1973go convention éí 60,000 ánéelą́ąʼgo ashdlaʼ yiską́ąjįʼ baa nídaʼiikááh ńtʼééʼ. Haitʼéego ádoolníłígíí éí doo shił bééhózin da. Ákondi Proverbs 15:22 ánínę́ę éí binahjįʼ łaʼ doolníiłgo baa ákoniizı̨́ı̨́ʼ. Brothers dayiichįįhígíí éí shíká ohjeeh bidííniid. Łaʼ éí díí atsįʼ baa nidahaniih, áádóó chʼil daadání deinisééh, łaʼ éí ayóó chʼiyáán ádeełʼı̨́ yéédahósin. Áádóó łaʼ éí nidaʼiiłniihii danilı̨́. Díí naanish nitsaa ndi tʼáá áníiltso éí yéigo bindashiilnish.

1973go sheʼasdzą́ą́ dóó shí éí Francedi Béthelgóó anihiʼdoolʼaʼ. Ákweʼé áłtsé naanish shaa deitʼánígíí ayóó nantłʼa. Éí Africadi kéyah hahoodzo, Cameroongóó naaltsoos nihibrothers bichʼįʼ ádaalʼı̨́įgi biʼoonishígíí shaa deetʼą́. Éí 1970 dóó 1993go ákweʼé nahaneʼígíí nihitsʼą́ą́ʼ neʼ kólyaa. Áko biniinaa tʼóó shide ádzaa. Áko branch overseer Francegi shı̨́ı̨́ ákótʼéego shaa ákoniizı̨́ı̨́ʼ. Éí kóshidííniid: “Cameroondi nihibrothers tʼáá íiyisí díí naaltsoos yídin danilı̨́ áko éí bee baa ádahodiilyąął.” Éí bedaʼiilyaa.

Cameroon kéyah bihoodzojįʼ díkwíidi shı̨́ı̨́ nináséya. Áadi eldersígíí bił áłah náshdleeh ńtʼééʼ. Éí brothers doo daasteeʼgóó ayóó dahóyą́. Haitʼéego éí naaltsoos tʼáá ahą́ą́h ákǫ́ǫ́ ádooníłígíí yee shíká ííjééʼ. Jiihóvah éí nihikʼihasdliʼ. Áko naadiin nááhai ákweʼé bidineʼé Bee Haʼídéesʼı̨́įʼii áádóó Our Kingdom Service wolyéhígíí tʼáadoo ndi łaʼ deesih da.

Tʼóó ahééh hosiilzįįd yę́ędą́ą́ʼ Angèle éí Jiihóvah áhą́dígo yił kʼé ahidiʼnínígíí baa ákoniizı̨́ı̨́ʼ. Asiigehgo bikéédóó tsíkʼeh. Díí nahalingo, asiigeh bijı̨́ áshíłní, kʼad kodóó Jiihóvah éí full-time bá neilʼaʼ doogo bíká sodílzin  shidííniid. Éí Jiihóvah bichʼįʼ sodiilzin yę́ę yikʼeh ádzaa.

Angèle éí Jiihóvah tʼáá yédígo baʼííníshłíi dooleełgi yéigo yee shíká eelwod. Níléí 1973 Béthelgi naołʼaʼ doo nihidooʼniid, tʼóóyó tʼą́ą́ʼ kóníshtʼéé ńtʼééʼ háálá circuit workjí aláahgo shił yáʼátʼééh. Ákondi Angèle éí díí yééshiyííłniiʼ, shą́ą́ʼ Jiihóvah niheʼiinaʼ baa ádiniitʼą́, áko biorganization tʼáadoo leʼé nihił niihgo éí bikʼeh íitʼįįh neʼ. (Heb. 13:17) Éí lá tʼáá aaníí bidííniid. Áko Béthelgóó niitʼáázh. Sheʼasdzą́ą́ éí ayóó hóyą́ dóó tʼáá ákogi éʼéłʼíinii asdzánígíí nilı̨́. Jiihóvah éí tʼáá íiyisí ayóóʼáyóʼní. Díí ájítʼéhígíí binahjįʼ niłdzilgo bee ahííníitąʼ. Áádóó nahwiitʼáagi éí díkwíí shı̨́ı̨́ nááhaijįʼ ałdóʼ nihíká análwoʼ.

Azhą́ shı̨́ı̨́ kʼad náás siidlı̨́įʼ ndi, Angèle éí tʼah ndi ayóó áká análwoʼii jílı̨́. Díí átʼéego theocratic schools biniyé áłah néidleehígíí tʼóó ahayóígóó éí bilagáanakʼehjí ánálʼįįh. Áko shí dóó Angèle éí saadígíí bíhwiidiilʼááł biniyé yéigo neiilnish. Biniinaa éí bilagáanakʼehjí áłah nádleehígíí atah niitʼáázh. Azhą́ shı̨́ı̨́ tsostsʼiddóó ałnííʼ nihinááhai yę́ędą́ąʼ ndi. Áádóó shí éí France Branch Committee atah shinaanish áshʼı̨́. Áko saad náánáłaʼígíí bínááhodeeshʼáłígíí doo shá bíighah da nahalin ndi, Angèle doo shí áłká anáhoʼniilchééh. Kʼad éí tseebídiindóó baʼaan nihinááhai ndi bilagáanakʼehjí dóó French kʼehjí saad áłah néidleehígíí bá hashtʼeʼ áníʼdiilʼįįh. Áádóó nahaneʼígíí ałdóʼ áłah néidleehígíí biłgo áká anáhiʼniilchééh. Bilagáanakʼehjí íhooʼaahígíí binahjįʼ Jiihóvah nihikʼihadlí.

Łaʼ yee nihikʼihasdliʼígíí éí 2017go Angèle dóó shí School for Branch Committee Members áádóó beʼasdzą́ą́ tʼáá bił, níléí Watchtower Educational Center, Patterson, New Yorkgi wóshdę́ę́ʼ nihidooʼniid.

Jiihóvah éí tʼáá aaníí Nanihinitinii nilı̨́. (Isa. 30:20) Áko łaʼ náás dasiidlı̨́ı̨́ʼ dóó łaʼ ániid nideiikaígíí éí aláahdi yáʼátʼéehgo íhooʼaahígíí bee nidanihidiʼnitin. (Deut. 4:5-8) Díí éí baa ákoniizı̨́ı̨́ʼ, ániid ndaakaiígíí Jiihóvah, áádóó bibrothers dóó bisisters dahóyáanii deiyíistsʼą́ąʼgo éí dahóyą́ągo Jiihóvah yá ndaalʼaʼ daa leʼ. Proverbs 9:9 ání: “Diné hóyáanii nidíníítįįł, áko tʼah yówehgo hóyą́ą doo; diné tʼáá ákogi ááníiłii nidíníítįįł, áko tʼah biláhígo íhwiidoołʼááł.”

Hastą́diin nááhai yę́ędą́ą́ʼ Algeria dziłghą́ąʼdi tłʼéeʼgo ádahóótʼįįd yę́ę łahda baa nitséskees łeh. Éí bitłʼééʼ náasdi iiná baa hózhóonii shee hodooleełígíí ndi doo shił bééhózin da ńtʼééʼ. Diné náánáłaʼ bitsʼą́ą́dóó ląʼí ídahoołʼą́ą́ʼ! Jiihóvah éí Angèle dóó sheʼiinaʼ baa hózhónígíí shichʼįʼ kóyiilaa. Áko Jiihóvah bá neelʼaʼgi tsʼídá doo neʼ kódiilníił da. Nihizhéʼé Jiihóvah, áádóó nihibrothers dóó nihisisters ayóóʼádabóʼnínígíí bihódząʼ tʼáá bitsʼą́ą́dóó ídahwiilʼaah doo.