Díí baa nitsíníkees, nichʼįʼ hodíínáaʼgo, éí nikʼis níká adoolwołgo neinílii łeh. Ákondi diné łaʼ God doo shikʼis nilı̨́į da nízin, haʼátʼíísh biniinaa? Biniinaanii éí God yeeʼ tʼáadoo shíká eelwod da danízin łeh. Ákondi tʼáá íídą́ą́ʼ, God tʼóó ahayóigo nihíká eelwod áádóó kʼad nihichʼįʼ anídahwiiztʼiʼígíí dóó nihichʼįʼ nidahwiiʼnánígíí hodíínááʼígo hashtʼéédoodlíiłgo yindíílnish. God haash yitʼéego hááhodidoodlííł?

God tʼáá ałtso doo yáʼádaashxóonii íidoołdįįł. Biniinaa doo yáʼáhooshxónígíí éí Diyin Bizaad ííshjání áyiilaa, éí kóní: ‘Doo yáʼáshǫ́ǫ́góó naagháii nihokáaʼgi tʼáá átʼéé nítʼééʼ bee bóhólnííh.’ (1 John 5:19) Jesus éí Séítan the Devil “doo yáʼáshǫ́ǫ́góó naagháii,” “nahasdzáán binanitʼaʼí” nilı̨́įgo yiyíízhiʼ. (John 12:31) Nihokááʼ bikááʼ doo hatsʼíídgóó hoogáłígíí éí Séítan biniinaa áhootʼé. God haash yitʼéego hááhodidoodlííł?

Hodíínááʼígo, Jiihóvah God biyeʼ, Jesus Christ, choyoołʼı̨́įgo “aniné bee bóhólníihii, [éí Devil] níłchʼi bidaʼiiníziinii binanitʼaʼí nilíinii” íidoołdįįł. (Hebrews 2:14; 1 John 3:8) Diyin Bizaad ání, Devil “tʼóó kónígháníjįʼ bee nááhodidooʼnaałígíí” dóó ázhdoodįįłgo hoł bééhózin. (Revelation 12:12) Áádóó God tʼáá ałtso doo yáʼádaashxǫ́ǫ́góó ádaaníiłii ałdóʼ íidoołdįįł.—Psalm 37:9; Proverbs 2:22.

Doo yáʼádaashxóonii ałtso íísdįįd bikéédóó, éí Ánihiilaii bílaʼashdlaʼii dóó nahasdzáán hoolʼáágóó yá hodeezʼánę́ę yiʼdoolííł. Haʼátʼíí éí nideíníidlíi doo?

Hoolʼáágóó doo náhádzid da dóó hodéezyéel doo. “Aʼohgo ádaatʼéii nahasdzáán daabííʼ dooleeł, áádóó tʼáá ałtsoní bee hashtʼehodítʼé baa bił nidahoozhǫǫh doo.”—Psalm 37:11.

Chʼiyáán yáʼádaatʼéhígíí doo bídį hóyéeʼ da doo. “Dziłghą́ąʼdi álástsiiʼ tʼóó ahayóigo kʼidoolyáhígíí . . . neestʼą́ągo deílkʼooł doo.”—Psalm 72:16.

Hooghan yáʼátʼéehii dóó naanish baa hózhǫ́. “Áádóó kin ádeidoolíiłgo yiiʼ kéédahatʼı̨́į doo índa chʼil naʼatłʼoʼii kʼideididooléełgo bineestʼąʼ deiyą́ą doo. . . . Áádóó náháláaʼii binaanish ádayoolíłígíí nízaadgóó yaa bił dahózhǫ́ǫ doo.”—Isaiah 65:​21, 22.

Díí ádahootʼée dooleełígíísh bídį nilı̨́? Hodíínááʼígo, tʼáá ákwii jı̨́ díí átʼéego dahiniiʼnáa doo.

Dííshjı̨́įdi tʼáá áníiltso nihitsʼíís baa dahooʼaah dóó daniiʼné. Ákondi éí doo tʼáá ákóhootʼée da doo. Hodíínááʼígo, God éí Jesus nihá nináʼádeetʼánę́ę binahjįʼ yee nihíká adoolwołgo “tʼáá háiida boodlą́ągo baa dzólíhígíí éí doo ádoodįįł da, nidi iiná doo ninítʼiʼii bee hólǫ́ǫ dooleeł.” (John 3:16) Éí bitsʼą́ą́dóó hahodoonííł?

Nihitsʼíís baa dahooʼahígíí ádooldįįł. “Kééhatʼínígíí doo łaʼ daastsaah didooniił da; diné ákwii kéédahatʼíinii doo ákwii ádáátʼįįdii bá yóóʼadahididootʼááł.”—Isaiah 33:24.

Anoonééł ádooldįįł. “Hoolʼáágóó anoonééł iidoołnah, áádóó Bóhólníihii Diyin God éí daʼaniiʼ tʼáá ałtso nákʼeetoʼ yąąh yidoołdah.”—Isaiah 25:8.

Diné hoolʼáágóó dahiináa doo. “Jesus Christ nihiBóhólníihii bee Diyin God éí iiná doo ninítʼiʼii tʼáá jííkʼe nihainílá.”—Romans 6:23.

Daneeznánę́ę náádabidiʼdooljah.“Tʼáá ákogi ádaatʼéii índa doo ákwii ádaatʼéii daneeznáádę́ę́ʼ náábidiʼdooljahgo yíká dadéezʼı̨́ı̨́ʼ.” (Acts 24:15)  Náádabiʼdiiljéʼígíí éí Jesus beʼiinaʼ bee nináʼílyáhígíí binahjįʼ bíká adoolwoł.

Díísh éí haitʼéego God ałtso íidoolííł?

God éí bílaʼashdlaʼii dóó nahasdzáán hahoolzhiizhdóó áyiilaa yę́ęgi átʼéego tʼáá ałtso hashtʼéédoodlííł. Éí Jesus yáʼąąshdę́ę́ʼ aláahgo naatʼáanii néidiiłtínígíí choyoołʼı̨́įgo tʼáá ałtsoní yee ádee haadzííʼ yę́ę íidoolííł. (Psalm 110:​1, 2) Díí nahatʼaʼ éí Jesus bikééʼ ndaakaii bíká sodadoołzin yił níigo neineeztą́ą́ʼ: “NihiTaaʼ yáʼąąshdi honílóonii, . . . Bee nóhólníihii náásgóó kʼeeʼąą yilzhish leʼ.”—Matthew 6:​9, 10.

God biNahatʼaʼ éí nahasdzáán yikʼihooʼáałgo tʼáá átʼé achʼįʼ nahwiiʼná dóó tiʼhooʼnííh ałtso íidoołdįįł. Díí nahatʼaʼ éí bílaʼashdlaʼii bá tsʼídá aláahdi yáʼátʼéehgo nahatʼaʼ átʼé! Éí biniinaa Jesus “yáʼąąshii bee bóhólníihgo bił hazʼáanii baa Haneʼ Yáʼátʼéehii” yaa halneʼgo yéigo yinaashnish áádóó bídahoołʼaahii nihí ałdóʼ tʼáá ákódaatʼı̨́į doo yidííniid.—Matthew 4:23; 24:14.

Jiihóvah God bílaʼashdlaʼii ayóóʼáyóʼnínígíí biniinaa tʼáá ałtso bá yáʼádaatʼéhígíí yá íidoolíiłgo yee ádee haadzííʼ. Éí binahjįʼ tʼáá ahánígo bił ahééhodíilzįįłísh nínízin? Díí nídiniláago lá haitʼéego níká adoolwoł? Éí díí bikéédóó baa ínáádahwiidiilʼááł.