WÓLTAʼÍGÍÍ 9
Nighan Hazʼą́ągi Jiihóvah Dadíínóhsin
“Áko Diyin God éí yáʼąąshii áádóó nahasdzáán, tónteel índa tó hadaazlíinii áyiilaii bichʼįʼ nidahohłá.”—Revelation 14:7
Díí naaltsoos bitsʼą́ą́dóó bíhwiiniłʼą́ą́ʼígíí, éí ląʼígóó Diyin Bizaad binahjįʼ naʼnitingi ni áádóó nighan hazʼą́ągi nihíká adoolwoł. Jiihóvah éí nił hózhǫ́ǫ doo nízin. Bí bikʼeh hóʼı̨́ alą́ąjįʼ síníłʼą́ągo éí tʼáá aaníí ‘éidí tʼáá ałtso ná bíidoolyééł’ ní Jiihóvah. (Matthew 6:33) Tʼáá íiyisíí bí bikʼis dííleeł nóʼní. Tʼáá ashjaʼnáʼoodleeł góneʼ God bikʼis ídlı̨́įgi binanilnish. God bikʼis ídlı̨́įgi éí aláahdi bee nihikʼi hodzisdliʼii átʼé.—Deuteronomy 11:1.
1 JIIHÓVAH BIŁ KʼÉ AHIDÍʼNÍIGI BIDZIILGO ÍNÍLÉÉH
DIYIN BIZAAD KÓNÍ: “Áádóó nihiTaaʼ nishłı̨́į doo, áko nihí tʼéiyá shiyeʼké índa shitsiʼké danohłı̨́į doo,” ní Jiihóvah. (2 Corinthians 6:18) God éí áhą́dígo shikʼis dííleeł nízin, sodizin éí bee łaʼ ákódoonííł. Jiihóvah éí “tʼáá áłahjįʼ sodadołzin” nihił ní. (1 Thessalonians 5:17) Baa nitsíníkeesígíí dóó niʼdiiłʼáhígíí Jiihóvah íiyisíí yididootsʼı̨́ı̨́ł nízin. (Philippians 4:6) Nighan hazʼą́ą́dóó bił sodílzingo, God tʼáá aaníí hólónígíí yinídlą́ągi ná yaa ádahodínóozįįł.
God bichʼįʼ sodílzingo tʼáá bił bikʼeh ánítʼée doo. Éí bí Bizaad dóó binahjįʼ naaltsoos ádaalyaaígíí baa íhoołʼaah. (Psalm 1:1, 2) Bíhwiiniłʼą́ą́ʼígíí hazhóʼó nabikʼítsíníłkees. (Psalm 77:11, 12) God jíistsʼą́ąʼgo éí tʼáá ahą́ą́h Oodlání áłah nádleehgóó ałnáánídááh doo, háálá díí yee nihá nihoníʼą́.—Psalm 122:1-4.
Nááná łaʼda Jiihóvah bee bił hwiilneʼgo ałdóʼ binahjįʼ Bí bił kʼé ahidíʼnínígíí bidziilgo ná íidoolííł. Tʼáá ahą́ą́h Jiihóvah baa nahólneʼgo éí áhą́dígo bił nílínígíí baa ákonínízin doo.—Matthew 28:19, 20.
DÍÍ BIKʼEH ÁDÍÍNÍÍŁ:
-
Diyin Bizaad tʼáá ákwíí jı̨́ yííníłtaʼ dóó sodílzingo bá náhoołʼaah
-
Nighandóó Jiihóvah alą́ąjįʼgo ádeinósin, honeeni dóó tʼóó asdáhígíí biláahdi
2 DAHOOGHANGI JIIHÓVAH BÁ NÁHOOTʼAAHÍGÍÍ BÍDANOHDLĮ́ a
DIYIN BIZAAD KÓNÍ: “Diyin God baa hohkááh, áko bí ałdóʼ nihaa doogááł.” (James 4:8) Tʼáá ahą́ą́h dahooghangi Jiihóvah bá náhootʼaahígíí bá nináhóʼááh, áádóó bikʼehgóó ánídaʼoołʼįįh. (Genesis 18:19) Ndi doo tʼáá díí tʼéiyá da. Tʼáá ákwíí jı̨́ nihee iinaʼ ádaałʼı̨́įgi God tʼáá bił ahídeiínółtąʼ. Nighan hazʼą́ą́dóó God yił kʼé daʼahidiʼníi dooígi bidziilgo bá íínísin. “Nihighan góneʼ bił nidahísóotą́ągo éí saad baa yádaałtiʼ, áádóó bił tádadohkááhgóó áádóó danohjeehgo índa nídahidoohjeehgo bee bichʼįʼ yádaałtiʼ.” (Deuteronomy 6:6, 7) Jáshowa ádzaa yę́ęgi átʼéego ni ałdóʼ díí bee ádá nohodinítʼaah: “Nidi shí éí índa shighandóó danilíinii bił Bóhólníihii bá nideiilʼaʼ dooleeł.”—Joshua 24:15.
DÍÍ BIKʼEH ÁDÍÍNÍÍŁ:
-
Nighan hazʼą́ągi tʼáá ałtso bee bichʼįʼ anídahaztʼiʼígíí bá baa nitsíníkeesgo binahjįʼ tʼáá ahą́ą́h íhooʼaah bá síníłʼą́
[Footnote]
a Dííshjı̨́įdi Háísh Éí Jiihóvah Íinízinii Yikʼeh Ádaanííł? naaltsoos bíhwiidooʼáłígíí 10gi, “Dahooghangi Jiihóvah Bá Náhootʼaahígíí Haʼátʼíísh Átʼé?” nínígi łaʼ yaa nááhálneʼ.
