God biNahatʼaʼígíí éí yáʼąąshdi bił hazʼą́. Áko God biNahatʼaʼígíí tʼááʼátʼé bílaʼashdlaʼii binahatʼaʼ bitséskʼeh góneʼ niidooʼááł. Áko yáʼąąshdi dóó nahasdzáán bikáaʼgi God yinízinígíí bee áhootʼée doo. Díí God biNahatʼaʼ baa haneʼ nizhónígíí átʼé. Nahatʼaʼ yáʼátʼééhígíí bílaʼashdlaʼii yídin danilı̨́, áko God biNahatʼaʼígíí bee bił dahózhǫ́ǫgo íidoolííłgo bichʼįʼ hoolzhish. Áádóó éí tʼááʼałtso nahasdzáán bikááʼ dahiinánígíí yee łáʼí danilı̨́į doo.​—Daniel 2:44; Matthew 6:9, 10; 24:14 yííníłtaʼ.

Nahatʼaʼ bił hazʼą́ągi éí naatʼáanii hólǫ́ǫ łeh, áko Jiihóvah biYeʼ Jesus Christ néiidiiłtı̨́įgo Naatʼáanii ájiilaa.​—Revelation 11:15 yííníłtaʼ.

Video God biNahatʼaʼshąʼ Haʼátʼíí Átʼé? bee naniné.

God biYeʼ ayóó joobaʼdóó tʼááʼákogi ádaatʼéii yéigo bee jizı̨́, éí biniinaa aláahdi hayóigo Naatʼáanii yiyichįįhii nilı̨́. (Matthew 11:28-30) Ałdóʼ ayóó ábóodziilgo diné yíkáʼadoolwoł, háálá yáʼąąshdę́ę́ʼ nahasdzáán bikʼi hojooʼááł. Jesus náábiʼdiilzáh bikéédóó yáʼąąshgóó anádzoodzáh áádóó Jiihóvah bibaʼ binishʼnáájígo dah jineezdah. (Hebrews 10:12, 13) Áadi índa God nahatʼaʼ hwee diníʼą́.​—Daniel 7:13, 14 yííníłtaʼ.

Jiihóvah “bidiyı̨́ı̨́ʼ bidineʼé” dabidooʼniidígíí éí Jesus yił yáʼąąshdę́ę́ʼ dahwéeʼaah doo. (Daniel 7:27) Jesus áłtsé hastóí dahodísingo yił tádiikai yę́ę éí áłtsé diyı̨́ı̨́ʼ dineʼégo bikʼidahwidiiniiʼ. Áko hastóí dóó sáanii dahodísinígíí diyı̨́ı̨́ʼ dineʼé danilı̨́įgo tʼahdii Jiihóvah náyiilááh. Jesus níłchʼigo náábiʼdiilzáhígi átʼéego hwí ałdóʼ níłchʼigo náádahwiʼdiiljééʼ.​—John 14:1-3; 1 Corinthians 15:44 yííníłtaʼ.

 Díkwííshąʼ éí diné yáʼąąshgóó dadeeskai? Jesus éí “shidibé chʼı̨́dí” yidííniid, dibé áłchʼídí jiníigo óolyé. (Luke 12:32) Áko díí 144,000 ánéelą́ą́ʼ dooleeł áádóó Jesus yił nahasdzáán yikʼi dahwéeʼaah doo.​—Revelation 14:1 yííníłtaʼ.

1914 yihah yę́ędą́ą́ʼ God biNahatʼaʼ haalwod. * Jesus tʼóó Naatʼáanii jizhlı̨́ʼígo, áłtsé ázhdooníłígíí éí Séítan dóó doo yáʼádaashǫ́ǫ́góó bándaalʼaʼígíí yił nahasdzáán bikáajįʼ adahizhdoołtłʼił. Séítan áyóó átʼéego báhóóchįįd áádóó nahasdzáán bikááʼgóó ałtso hahoníiłchaad. (Revelation 12:7-10, 12) Áádóó bíkʼijįʼ, tiʼhooʼnííh tʼóó yéigo nihideʼádzaa. Anaaʼ, dahodichin, naałniih, dóó niʼ nídahidiʼnááhígíí éí díí bee “bee bééhózin”, God biNahatʼaʼ bichʼįʼ hoolzhish áko nahasdzáán bidadéétʼiʼígíí tʼááʼáłtso bee bóhólnííh doo.​—Luke 21:7, 10, 11, 31 yííníłtaʼ.

Tʼáá nahwiistʼą́ą́ ńtʼééʼ Diyin God Bizaad baa nahaneʼígíí binahjįʼ God biNahatʼaʼ bee ałʼąą dadineʼé doo yóoltaʼ ánéelą́ą́ʼgóó ałhąąh áyoolííł. Áko díkwííshı̨́ı̨́ miiltsoh ánéelą́ąʼgo diné aʼohgo ádaatʼéhígíí Jesus hooʼááłígíí yiyaa ahikááh. Nahasdzáán bikáaʼgi dootsʼíí áhootʼéégóó hoogáłígíí ałtso íísdįįdgo, God biNahatʼaʼ yee bidineʼé yichʼą́ą́h naagháago yaa áhályą́ doo. Áko tʼáá háiida God biNahatʼaʼ shíkáʼadoolwoł danízinígíí éí Jesus bikʼeh hóʼı̨́ bídahoozhdoołʼááł.​—Revelation 7:9, 14, 16, 17 yííníłtaʼ.

1,000 nááhaijįʼ biiʼ góneʼ God átséedi bílaʼashdlaʼii yá hodeezʼánée God biNahatʼaʼ yee ałtso łaʼ yidoolííł. Áko nahasdzáán tʼáá siʼą́ą́ ńtʼééʼ ayóó áhonóolin dooleeł. Áadi índa Jesus Bizhéʼé biNahatʼaʼ yaa néiididooʼááł. (1 Corinthians 15:24-26) Díí God biNahatʼaʼ baa haneʼígíí łaʼ bééhonísinígíí bił hodíílnihísh nínízin?​—Psalm 37:10, 11, 29 yííníłtaʼ.