Luke 12:1-59
12 Tsʼídá ákohgo, diné doo jóołtaʼ ánéelą́ą́ʼgóó áłah silı̨́įʼgo tʼáá hazhóʼó ałkʼi naʼasdeeʼ, áko hódahoołʼaahii áłtsé bichʼįʼ ayázhʼniiłtiʼgo ájíní, Férisii danilíinii bidííkʼǫsh bee taosʼniiʼ niilyółí bitsʼąą ádaa ádahołyą́, éí tʼóó áhodiʼı̨́ átʼé.
2 Nidi tʼóó bił ídaʼítʼéhígíí tʼáá ałtso dadooʼnih, áádóó nidanilʼinígíí tʼáá ałtso béédahodoozįįł.
3 Éí bąągo tʼáá nahontʼinee ádadooniidígíí éí tʼáadoo bahatʼaadí dadidootsʼı̨́ı̨́ł, áádóó danihighangóó tʼáá ádíighahígo bee ahiłjeeh nídanołniih nítʼééʼ yę́ę éí kin bighą́ą́ʼdóó baa dahodoonih.
Háishąʼ báhádzid doo? (Mt. 10:28-31)
4 Shikʼisóó, ánihidishní, Atsʼíís dayiiłhééhdóó bikʼijįʼ tʼáadoo ánáádayódleʼí da łeígíí éí diné tʼáadoo béédaałdzidí.
5 Nidi béédaałdzid dooleełígíí bee nihiʼnishnííh: iisxı̨́ı̨́dóó bikʼijįʼ hoolʼáágóó tiʼhooʼnííh bił hazʼą́ą́ góyaa idiʼyoołhą́ąłgo yee bóhólníhígíí éí béédaałdzid; tʼáá aaníí ánihidishní, Béédaałdzid!
6 Daʼ tsídiiłbáhísh ashdlaʼgo doo naaki sindáo bą́ą́h ílı̨́įgo nahaniih da? Ákondi éí Diyin God tʼááłáʼí nidi doo yaa yoonéeh da.
7 Jó, nihitsiiʼ tʼááłáʼí níláhígo nidi ałtso dayééltaʼ. Éí bąą tʼáadoo nídaałdzidí; tsídiiłbáhí tʼóó ahayóí nidi biláahgo daʼnohłı̨́.
Diné binááł Christ bee ádééhólzin (Mt. 10:32,33; 12:32; 10:19,20)
8 Áádóó ánihidishní, Tʼáá háiida diné binááł shee ádééhodzílzinígíí, éí ałdóʼ Diyin God bidiyingo nidaalʼaʼí bidááhdę́ę́ʼ Diné Silı̨́įʼii hwee ádééhólzin doo,
9 nidi diné binááł doo hwééhasin da shijinínígíí Diyin God bidiyingo nidaalʼaʼí bidááhdóó doo hwééhodiʼdoolzįįł da.
10 Áádóó tʼáá háiida Diné Silı̨́įʼii bikʼijįʼ jílı̨́įgo hadzoodzíʼígíí, éí bá yóóʼanídidootʼááł, nidi tʼáá háiida Níłchʼi Diyinii baaʼihgo yá haadzíʼígíí, éí tsʼídá doo bá yóóʼanídidootʼáał da.
11 Áádóó kin biiʼ áłah nídaʼadleehí naaznilgóó, áádóó naatʼáanii índa bídahólníihii naazdáágóó nidanihiiʼéeshgo, haʼátʼéegoda, doodaiiʼ haʼátʼíhída bee hadadoohdzihígíí, doodaiiʼ haʼátʼíhída dadidoohniiłígíí, tʼáadoo bikʼee ádił nídahodołchiłí,
12 háálá Níłchʼi Diyinii tsʼídá ákweʼé oolkiłgo bee hadadoohdzihígíí yee nanihinitin doo.
Diné atʼı̨́įgo doo áhályáanii binahjįʼ haneʼ bee akʼidiʼdootı̨́įłii
13 Nítʼééʼ áłah silı̨́ʼígíí łaʼ áhodííniid, Naʼnitiní, shínaaí shá ábidiní, Nitsilí ííʼ dooleełii bił ałtsʼáʼdíʼnííł.
14 Nidi ábizhdííniid, Kwáʼásiní, háishąʼ ánihwiiʼaahii, doodaiiʼ naalyeʼé bąąh ádahasdįįdii niidiiʼaahii nishłı̨́įgo nihá áshiilaa?
15 Áádóó ánáábizhdooʼniid, Ádaa ádahołyą́, tʼáadoo haʼátʼíhída bidádanoołníní, háálá diné tʼáadoo leʼé jitʼíinii éí doo íiyisí bee jiináanii átʼée da.
16 Áko haneʼ bee akʼidiʼdootı̨́įłii bee bichʼįʼ hadzoodzíiʼgo ájíní, Diné atʼı̨́ı̨́ léiʼ bidáʼákʼehgi tʼáá íiyisí náʼneestʼą́,
17 áádóó tʼáá biyiʼídi nitsíkeesgo íinízin, Haaléitʼée dooleeł lá? Náníłtʼánígíí laʼ tʼáadoo nooh náánóoshchíiłgi da.
18 Áko ádííniid, Ko lá ádeeshnííł ni: kin biiʼ nooh nídaʼashchíhígíí táádeideeshʼniłgo tʼah bitisígo ádaníłtsogo ánáádadeeshdlííł, áko náníłtʼánígíí índa shinaalyeʼé tʼáá ałtso ákóneʼ nooh dadeeshchííł.
19 Áko shiiʼ sizíinii ábidideeshniił, Shiiʼ sizíinii, nee hólóonii ląʼí nááhai bíighahgóó hashtʼeʼniilyá; tʼóó háánílyı̨́įhgo íyą́ą doo índa ídlą́ą doo, áádóó nił honeedlı̨́į leʼ.
20 Nidi Diyin God áhodííniid, Doo áhályáanii nílı̨́! Díí tłʼééʼ niiʼ sizíinii naa náádiilyé, ákoshąʼ díí hashtʼeʼnííníláhígíí, háí bí dooleeł?
21 Áko tʼáá háiida naalyeʼé daʼílíinii ádá nihizhdiʼníłígíí éí Diyin God bichʼįʼ ajitʼínígíí hwee ádingo átʼé.
Ádił náhodichił (Mt. 6:25-34)
22 Áádóó hódahoołʼaahii ábizhdííniid, Éí bąą ánihidishní, Haʼátʼíí lá deeshı̨́ı̨́ł lá? doodaiiʼ, Haʼátʼíí lá bee hadideeshnííł lá? tʼáadoo danohsingo bee dahinohnáa dooleełígíí bíká ádił nídahodołchiłí.
23 Háálá jiinánígíí éí chʼiyáán biláahgo ílı̨́, áádóó hatsʼíís éí ééʼ biláahgo ílı̨́.
24 Gáagii bee nitsídaahkees: éí doo kʼéédaʼdidléeh da, doo nidi nídaʼagish da, kin biiʼ nooh nídaʼachíihii doo bee dahólǫ́ǫ da, ákondi Diyin God baʼałtsoʼ. Dooládóʼ tsídii biláahgo daʼnohłı̨́į da lá!
25 Áádóó nihí łaʼ ádił náhodołchiłgo hinohnánígíí tʼįįhdígoósh bilááh ádoohłíiłgo bínoołʼą́?
26 Ákoshąʼ aʼohgo áníłtsoígíí nidi doo óohnééh átʼéégóó, haʼátʼíí biniyé náánáłaʼígíí nihidaʼdiiłʼá?
27 Chʼilátah hózhóón nidaniseʼgi bee nitsídaahkees; éí doo nidaalnish da, índa doo daʼadiz da, nidi ánihidishní, Azhą́ Sálaman ayóó ájítʼéé nítʼéeʼ*nidi, doo díí łaʼ hadítʼéhígi átʼéego hazhdítʼée da nítʼééʼ.
28 Nidi Diyin God nihokááʼgóó chʼilígíí díí jı̨́ nidaniseʼgo áádóó yiską́ągo konkʼeh góneʼ ahidoolkałígíí nidi nizhónígo haidósingo, tʼįįhdígo daʼiinohdláanii, dooládóʼ éidíígíí biláahgo hadadinohtʼéego ánihósin da lá!
29 Dadoohsı̨́įłii índa dadoohdlı̨́įłii tʼáadoo bíká ádił nídahodołchiłgo hádaahtʼíní.
30 Háálá nihokááʼ dineʼé tʼáá ałtso éidí hádaatʼı̨́, áko nihiTaaʼ éí bídin danohłı̨́įgo chodaołʼínígíí nihá bił bééhózin.
31 Nidi bee bóhólníihgo bił hazʼáanii hádaahtʼı̨́, áko éidí tʼáá ałtso nihá bíidoolyééł.
Yáʼąąshdi naalyeʼé daʼílíinii (Mt. 6:19-21)
32 Shidibé chʼı̨́dí danohłíinii, tʼáadoo nídaałdzidí, háálá nihiTaaʼ bił hóshǫ́ǫgo bee bóhólníihgo bił hazʼáanii nihaididooʼááł.
33 Nihee dahólónígíí tʼáá ałtso nihaa nidahóniih, áádóó badahojoobáʼíígíí bitaa daahniih; béeso bizis doo hadadootihii, índa naalyeʼé ałtaasʼéí daʼílíinii doo ádoodįįłii yáʼąąshdi aniʼįįhii doo yidínóoʼı̨́įłdi, índa chʼosh ałchozhii doo yidoołchǫǫłdi ádá ádaałnééh.
34 Háálá nihinaalyeʼé siláadi, tʼáá ákwii ałdóʼ nihijéí hólǫ́ǫ doo.
Nidaalʼaʼí hadaʼasíidii
35 Áká dasoołzaaz áádóó nihibee hoolʼiní dadiltłiʼgo ádeínóhsin,
36 áko diné łaʼ binanitʼaʼí iigehdę́ę́ʼ nídoodáałgo yibaʼ naháaztánígi átʼéego, áko nádzáago dáádílkał néidínóołtsʼı̨́ı̨́ł, tʼáá áko yá ąą deididootı̨́łígíigi átʼéego ádaʼdíínółzin.
37 Nidaalʼaʼí hadaʼídéesʼı̨́įʼgo binanitʼaʼí nádzáago biidoołtséłígíí, éí bikʼidahojidlí; tʼáá aaníígóó ánihidishní, Bí áká doolzisgo bikááʼ adání yichʼįʼ dah yidínóołbįįłgo yiyaa nidiʼyookááł.
38 Kʼadę́ę tlʼéʼííłniihgo, éí doodaiiʼ tłʼéʼííłnííʼdóó bikʼijįʼ, tʼáá ákódaatʼéego hadaʼídéesʼı̨́įʼgo yaa nádzáago éí nidaalʼaʼígíí bikʼidahozhdoodliił!
39 Nidi díí nihił béédahózin leʼ, kin bee bóhólníihii tsʼídá ákohgo aniʼįįhii doogáłígíí hoł bééhózingo, haʼdzisíid doo nítʼééʼ, índa hakin doo hatsʼą́ą́ʼ wótsid átʼéégóó ázhdoolííł nítʼééʼ.
40 Éí bąą nihí ałdóʼ hashtʼeʼádaʼdíínółzin, háálá Diné Silı̨́įʼii doo nidayínóhłíi da yę́ęgi hoolzhishgo doogááł.
Naalʼaʼí baʼahódlíii, doodaiiʼ naalʼaʼí doo baʼahódlíii (Mt. 24:45-51)
41 Peter áhodííniid, Bóhólníihii, daʼ díí haneʼ bee akʼidiʼdootı̨́įłiísh nihí nihichʼįʼ bee háínídzííʼ, diné tʼáá ałtso daatsʼí bichʼįʼ?
42 Áko Bóhólníihii ádííniid, Ákoshąʼ háí baʼahódlíigo índa hóyą́ągo aa áhályáanii nilı̨́, éí binanitʼaʼí bighan hazʼą́ągi nidaakaígíí tʼáá ałtso tʼáá áajįʼ anáhwiilzhíishgo yanáʼáltsoʼ doo biniyé nibidiʼdooltééł?
43 Naalʼaʼí jílíinii ákójítʼı̨́įgo hananitʼaʼí níyáago éí hakʼihojidlí.
44 Tʼáá aaníígóó ánihidishní, Hananitʼaʼí bee hólóonii tʼáá ałtso bee hóhólníihgo nihodoołtééł.
45 Nidi éí naalʼaʼí tʼáá hajéí biyiʼídi ázhdííniidgo, Shinanitʼaʼí laʼ doo hah nádáah da, áko diné nidaalʼaʼí índa asdzání nidaalʼaʼí bitaaʼjiłhaałgo, áádóó ajiyą́ągo áádóó ajidlą́ągo índa tsiʼnjigháago baa nízhdidoodááł,
46 éí naalʼaʼí jílíinii hananitʼaʼí yoołkáałii doo niʼjólíí góneʼ índa hoolzhish doo hoł bééhózin góneʼ nídoodáałgo atíhodoolííł,* índa doo daʼoodláanii yitah hodoołtʼeeł.
47 Áko naalʼaʼí éí binanitʼaʼí íinízinígíí bił bééhoozin nidi, tʼáadoo hashtʼediidzaagóó áádóó íiznízinígíí doo yikʼehgo ádzaagóó, éí yéego nábidíʼnóolghał.
48 Nidi binanitʼaʼí íinízinii doo bił bééhózinii, éí biniinaa nídíʼnóolghałii doo áyiilaagóó, éí doo yéego nídíʼnóolghał da. Tʼáá háiida tʼóó ahayóí baa deetʼánígíí éí tʼóó ahayóí bínéídóokił, áádóó tʼáá háiida tʼóó ahayóí baiszįįdígíí éí tʼah aláhídi ánéelą́ąʼgo bínéídóokił.
Jesus biniinaa ałtsʼáʼáldahii (Mt. 10:34-36)
49 Nahasdzáán bikááʼ kǫʼ dideeshtłił biniyé níyá, áko tʼáá íídą́ą́ʼ diiltłah leʼ nisin!
50 Nidi bee shidiʼdoolzįhígíí shá hólǫ́, áko dooládóʼ lá bíighah adooleełjįʼ ádił ninisdzíił da!
51 Daʼ nahasdzáán bikáaʼgi tʼáá kʼé hólǫ́ǫ doo biniyé jiníyá danohsingoósh shaa nitsídaahkees? Dooda, nihidishní, nidi ałtsʼáʼáldah biniyé,
52 háálá kodóó náásgóó hooghan tʼááłáʼíígíí biyiʼdóó ashdlajiltʼéego ałtsʼájíkah doo, táʼígíí éí naakiígíí yił ałkʼijįʼ danidlı̨́į doo, índa naakiígíí éí táʼígíí yił ałkʼijįʼ danidlı̨́į doo;
53 ałtsʼáʼáldah doo, azhéʼé nilíinii biyeʼ yikʼijįʼ nilı̨́į doo, ayeʼ nilíinii bizhéʼé yikʼijįʼ nilı̨́į doo, amá nilíinii bichʼéʼé yikʼijįʼ nilı̨́į doo, achʼéʼé nilíinii bimá yikʼijįʼ nilı̨́į doo, bizhááʼáád ídlíinii bizhááʼáád yikʼijįʼ nilı̨́į doo, áádóó azhááʼáád nilíinii yizhááʼáád nilínígíí yikʼijįʼ nilı̨́į doo.
Dahwéelzhíísh biiʼ ádahootʼé bééhózinii (Mt. 16:2,3)
54 Diné yílʼáhígíí ałdóʼ ábizhdííniid, Eʼeʼaah biyaají kʼos haleehgo daołtséehgo, tʼáá áko ádadohniih, Nahodoołtı̨́ı̨́ł lá, áko tʼáá ákótʼįįh.
55 Áádóó shádiʼááhdę́ę́ʼ diyołgo baa ákodanoohsįįhgo ádadohniih, Tʼáá íiyisí hodínóogah lá, áko tʼáá ákótʼįįh.
56 Nihí tʼóó ádahodołʼíinii! Nahasdzáán índa wódahgo áhootʼéii binahjįʼ áhootʼée dooleełgi nihił béédahózin, nidi haʼátʼéegoshąʼ díí kʼad hoolzhishígíí biyiʼ ádahootʼé dooleełii doo nihił béédahózin da?
Nihikʼi hodiiʼáanii hazhóʼó bił ahaʼdiʼdootʼááł (Mt. 5:25,26)
57 Áádóó haʼátʼéegoshąʼ tʼáá nihí tsʼídá tʼáá ákogi átʼéii doo bee hashtʼeʼnitsídanohkees da?
58 Háálá nikʼi hodiiʼáanii tʼah naatʼáanii bichʼįʼ nił yiʼashgo hazhóʼó bił ahaʼdííʼnítʼą́ągo néididoochił, doodaiiʼ éí ánihwiiʼaahii yaa nidoolóós, áádóó ánihwiiʼaahii yah iʼiiníiłii yaa nidoołtééł, áko índa yah iʼiiníiłii yah andoołtʼeeł.
59 Ándishní, Tsʼídá doo chʼééndiʼdooltʼeeł da, tʼááłáʼí sindáo tʼáá nidziihígi ákʼé ninéínídláago índa.
Footnotes
^ Jew dineʼé bitahgóó naatʼáanii Sálaman bíyoołkááł yę́ędą́ą́ʼ íídą́ą́ʼ naatʼáanii danilíinii tʼáá ałtso biláahgo ajitʼı̨́ı̨́ nítʼééʼ. 1Kgs. 10:4-7; 2Chr. 9:3-6.
^ Éí doodago kótʼé, nihodiyoołgish.
