John 15:1-27
15 Shí chʼil naʼatłʼoʼii tʼáá aaníinii nishłı̨́, shiTaaʼ éí chʼil naʼatłʼoʼii yaa áhályáanii nilı̨́.
2 Shitsʼádaʼiitłʼóohgo doo bineestʼąʼ dahaleehii, tʼáá ałtso shitsʼáyiinííł, tʼáá ałtso bineestʼąʼ bąąh nídahadleehígíí éí bitsʼáozʼaʼ bílátah níjiigish, tʼah biláhígo bąąh nínáádahodoodleeł biniyé.
3 Saad bee nihichʼįʼ yááłtiʼígíí bee tʼáá íídą́ą́ʼ hashtʼedanihiʼdiilyaa.
4 Shiiʼ dahonohłǫ́, shí ałdóʼ nihiiʼ honishłǫ́ǫ doo. Atsʼáʼátłʼóohii tʼáá bízhánígo doo bąąh náhádleeh da, bá ííʼáii biłgo tʼéiyá, tsʼídá ákótʼéego doo shiiʼ dahonohłǫ́ǫ́góogo, aneestʼąʼ doo nihitsʼą́ą́dóó náhoodleeł da doo.
5 Chʼil naʼatłʼoʼii sikaadii nishłı̨́, nihí tʼéí atsʼádaʼiitłʼóohii danohłı̨́. Shiiʼ hojílóonii, áádóó shí hwiiʼ honishłóonii, tsʼídá éí aneestʼąʼ ląʼí hatsʼą́ą́dóó náhoodleeł, háálá tʼáá shídingo tʼáadoo bídanoołʼání da.
6 Áko diné tʼáá háiida doo shiiʼ hojílǫ́ǫ́góó, éí atsʼáʼátłʼóhígíí yóóʼahelghą́ąhgo yigą́hígíí nahojílin; jó, éí áłah álʼįįh áko tsídza dahalkaʼgo, adahidilkʼą́ą́h.
7 Áko shiiʼ dahonohłǫ́ǫgo, áádóó shizaad nihiiʼ dahólǫ́ǫgo, tʼáá danohsinígíí dayínóhkeed, áko nihá biʼdoolnííł.
8 Aneestʼąʼ tʼóó ahayóí nihitsʼą́ą́dóó náhoodleełígíí bee shiTaaʼ ayóó átʼéego baa haʼniih, áko éí bee shídahoołʼaahii danohłı̨́į doo.
9 Tʼáá aTaaʼ ayóóʼáshóʼnínígi átʼéego, shí ałdóʼ ayóóʼánihóshʼní; sheʼayóóʼóʼóʼniʼ biiʼ dahonohłǫ́ǫgo ádaʼdíínółzin.
10 Tʼáá shiTaaʼ yee nahasʼáanii bikʼeh honishʼı̨́įgo beʼayóóʼóʼóʼniʼ biiʼ honishłónígi átʼéego, bee nahoséłʼáanii bikʼeh dahonołʼı̨́įgo, sheʼayóóʼóʼóʼniʼ biiʼ dahonohłǫ́ǫ doo.
11 Shibee ił hózhǫ́ nihiiʼ dahólǫ́ǫ doo biniyé díí bee nihichʼįʼ hahásdzííʼ, áko nihíniʼ bíighahgo nihił dahózhǫ́ǫ doo.
Ayóóʼóʼóʼní aláahgo ánáánátʼéii doo łaʼda bee hólǫ́ǫ da
12 Díí bee hoséłʼáanii átʼé, éí ayóóʼánihóshʼnínígi átʼéego ayóóʼádaʼahíínóhʼní.
13 Diné bikʼisóó ayóóʼádayóʼníinii yá nináʼádeetʼáanii yá daaztsą́ągo, kótʼéego ayóóʼóʼóʼní ayóó átʼéii náánáłaʼ diné doo hwee nááhódlǫ́ǫ da.
14 Tʼáá haʼátʼíhída bee hoséłʼáanii baa naahkaigo, shikʼisóó danohłı̨́.
15 Kodóó náás hoolzhishgóó naalʼaʼí doo nihidishníi da doo, háálá naalʼaʼí nilíinii hananitʼaʼí yaa naagháhígíí doo hoł bééhózin da, nidi shikʼisóó nihidííniid, háálá shiTaaʼ bitsʼą́ą́dóó disétsʼą́ʼígíí tʼáá ałtso bee nihił béédahózingo ánihiishłaa.
16 Nihí doo nídashidoołtı̨́į da, nidi shí tʼéí nánihiyéláaʼgo ninihinínil, nihitsʼą́ą́dóó aneestʼąʼ nidahwiileeh doo biniyé dahidohkááh, áko nihineestʼąʼ tʼáá hólǫ́ǫ doo, áádóó tʼáá haʼátʼíhída shízhiʼ bee aTaaʼ bídayínóhkeedígíí, éí nihaididooʼááł.
17 Ayóóʼádaʼahíínóhʼníi doo biniyé díí bee nihidaʼséłniiʼ.
Nihokááʼ dineʼé beʼajoodlá
18 Ííshją́ą́ nihokááʼ dineʼé danihijoołáago, tʼah doo danihijoołaahdą́ą́ʼ shí átséedi dashijoosłáʼígíí nihił béédahózin.
19 Nihokááʼ dineʼé bííʼ danohłı̨́įgo, nihokááʼ dineʼé ayóóʼádanihóʼníi doo nítʼééʼ, háálá tʼáá daabíiʼii tʼéiyá ayóóʼádayóʼní, nidi nihokááʼ dineʼé doo bííʼ danohłı̨́į da, nidi tʼáá nihokááʼ dineʼé bitahdóó nánihiyélááʼ, éí bąą nihokááʼ dineʼé danihijoołá.
20 Naalteʼ éí binanitʼaʼí doo yilááh átʼée da, nihidishníigo saad bee nihichʼįʼ haasdzíiʼii béédaałniih. Atídashiilaago, nihí ałdóʼ atídanihidoolííł; shizaad yikʼeh dahółʼı̨́įgo, nihí ałdóʼ nihizaad yikʼeh dahółʼı̨́į doo.
21 Nidi shízhiʼ biniinaa díí tʼáá ałtso yee nihaa nidookah, háálá shiníłʼaʼii doo yéédahósin da.
22 Doo níyáágóogo índa tʼáadoo bichʼįʼ hahásdzííʼgóogo, doo ádił daʼasziih da doo nítʼééʼ, nidi kʼad ádił daʼdzisziihígíí tʼáadoo bee dazhdínółʼı̨́łí da.
23 Tʼáá háiida shijoołáhígíí tʼáá éí ałdóʼ shiTaaʼ yijoołá.
24 Diné tʼah doo ííléehii doo bitahgi baa niséyáágóogo, doo ádił daʼasziih da doo nítʼééʼ, nidi kʼad shí áádóó shiTaaʼ tʼáá áníidla danihijiiłtsą́ áádóó nihikʼee dazdeeznih.
25 Nidi tʼáá daabí bibee hazʼáanii biyiʼ díí saad bee akʼeʼashchínígíí bohodoolnííł biniyé, Tʼáadoo baanígóó shikʼee dadeeznih.
26 Nidi Áká Análwoʼii, aTaaʼ bitsʼą́ą́dę́ę́ʼ nihaa deeshʼaałígíí, éí Níłchʼi Diyinii tʼáá aaníinii ííshją́ą́ áyoolíiłii aTaaʼ bitsʼą́ą́dę́ę́ʼ hólónígíí éí nihaa honíleʼgo shá hodoolnih;
27 nihí ałdóʼ shá nidahodoołnih, háálá tʼáá hodésáádę́ę́ʼ shił tádoohkai.
