Isaiah 35:1-10
35 Honoojí áádóó kéyah hóółtseii yę́ę bił hodoozhǫǫł, índa halgaii éí bił hózhǫ́ǫgo bikááʼgóó chʼilátah hózhóón hadínóotʼı̨́ı̨́ł.
2 Áko ląʼígo bílátah daʼiidoogahgo tʼáá bił hózhónígíí yee hataałgo bił nihoozhǫǫh doo; Lébanan kéyah yee ayóó ánóolninii áádóó Dził Kármel índa Shéran honíteel yee aláahdi hózhónígo bił hazʼánígíí éí baa didootʼááł; Bóhólníihii yee ayóó ánóolninii áádóó nihiDiyin God yee aláahdi átʼéii yidooltsééł.
3 Bílaʼ doo dabidziilígíí bidziilgo ádaahłééh áádóó bigodtaʼ doo dahółdzilígíí bidziilgo ádaahłééh.
4 Yééʼ bikʼee bijéí nitséédaaltłiʼígíí ádabidohní, Danihidziil leʼ, tʼáadoo nihił daayéʼí; jó, nihiDiyin God nihá kʼéédidooʼníiłgo nihaa hodooleeł; Diyin God tʼáá bí kʼéédidooʼnííł; yisdánihidoonił biniyé nihaa hodooleeł.
5 Áko doo daʼooʼíinii éí daʼooʼı̨́į dooleeł áádóó bijédaahkałii daʼdidootsʼı̨́ı̨́ł.
6 Áádóó diné naaljı̨́ı̨́d nilíinii bįįh nahalingo dah náníljı̨́įh doo, índa doo yádaałtiʼii dahataał doo, háálá honoojíidi tó hadaazlı̨́į doo, áádóó tó ádingo hazʼánígi tó danílı̨́į doo.
7 Áádóó niʼ ahidooltálígi tó siką́ą doo índa kéyah hóółtseiigi tó hadaazlı̨́į doo; mąʼii danjahgóó tłʼoh áádóó lókʼaaʼ índa tłʼohtsoh hadínóotʼı̨́ı̨́ł.
8 Áádóó ákwii azdoolkǫʼgo atiin doo, áko ákǫ́ǫ́ atiin dooleeł; éí Diyingo Honítʼiʼii hoolyée doo; tʼóó baaʼihii bee jiinánígíí doo ákǫ́ǫ́ chʼízhdoogáał da; Diyin God yee nihoníʼáanii yikʼehgo deíkáhígíí bá átʼée doo; doo ádahalyánígíí doo ákǫ́ǫ́ tádadikáah da doo.
9 Áadi náshdóítsoh bitsiijįʼ ditłʼooígíí, doodaiiʼ naaldlooshii dahashkéii doo áadi hadoogáałgo yidooltséeł da, nidi bikʼé nináʼílyáii áadi naaldeeh doo,
10 áádóó Bóhólníihii yikʼé nináʼídláii nináhidookah, índa hoolʼáágóó ił hózhǫ́ bitsiitʼáagi dahólǫ́ǫgo dahataałgo Záíyanjįʼ nidookah; ił hózhǫ́ áádóó baa ił hózhóonii bííʼ daazlı̨́įʼ doo índa yínííł áádóó cha hasin bitsʼádooldoh.
