1 John 2:1-29
2 Shaʼáłchíní, doo bąąhági ádaahtʼı̨́į da doo, nihóshʼníigo díí bee nihichʼįʼ akʼeʼashchí, nidi nihí łaʼ bąąhági íitʼı̨́įgo ííshją́ą́ Jesus Christ tsʼídá tʼáá ákogi átʼéii jílíinii, éí Diyin God aTaaʼ bichʼįʼ nihá naʼakʼíyájíłtiʼ.
2 Jó, hó nihá dadziztsánígíí bee nihibąąhági átʼéii nihá yóóʼazhdííʼą́. Doo tʼáá nihí tʼéiyá nihá dadziztsą́ą da, nidi nihokááʼ dineʼé tʼáá ałtso bibąąhági átʼéii bá dadziztsą́.
3 Diyin God bibikʼeh óʼooʼníiłii bikʼeh dahoniilʼı̨́įgo, éí bee tʼáá aaníí béédahoniilzingo nihił béédahózin.
4 Bééhasin, jiníigo ákondi bibikʼeh óʼooʼníiłii doo bikʼeh hojíłʼı̨́ı̨́góó, éí biyoochʼíidii jílı̨́, índa tʼáá aaníinii doo hwiiʼ hólǫ́ǫ da.
5 Nidi tʼáá háiida Diyin God bizaad bikʼeh hojíłʼínígíí éí tsʼídá hadaałtʼéego Diyin God ayóóʼájóʼní. Díí bee tʼáá aaníí nihił béédahózingo Diyin God biiʼ dahoniidlǫ́.
6 Diyin God biiʼ honishłǫ́, jinínígíí, Jesus Christ naayá yę́ęgi átʼéego joogáał doo.
Bikʼeh óʼooʼníiłii ániidíii
7 Shikʼisóó ayóóʼánihóshʼníinii, bikʼeh óʼooʼníiłii ániidíii doo bee nihichʼįʼ akʼeʼashchíi da, nidi díí tʼáá ałkʼidą́ą́ʼ bikʼeh óʼooʼníiłii, bikʼeh óʼooʼníiłii saad bee hodeeshzhiizhii, tʼáá íídą́ą́ʼ dasidootsʼą́ąʼii tʼáá éí átʼé.
8 Nááʼáłdóʼ bikʼeh óʼooʼníiłii ániidíii bee nihichʼįʼ akʼeʼashchíigo átʼé, éí tʼáá aaníinii hwiiʼ hólǫ́ǫgo nihí ałdóʼ nihiiʼ hólǫ́. Háálá chahałheeł yóóʼeeldoh áádóó adinídíín tʼáá aaníinii kʼad bee hoolʼin.
9 Tʼáá háiida hoolʼingi naashá, jinínígíí, ákondi hakʼis bikʼeezhdiniihgo éí tʼahdii chahałheeł biiʼ joogáałgo átʼé.
10 Hakʼis ayóóʼájóʼnínígíí éí tʼáá áłahjįʼ hoolʼingi hojílǫ́, áko łaʼda doo haniinaa didoogoh da.
11 Nidi hakʼis bikʼeezhdiniihii éí chahałheeł biiʼ hojílǫ́, áádóó chahałheeł biiʼ joogááł, áko joogááłgóó doo hoł bééhózin da, háálá chahałheeł hanááʼ íísdįįd.
12 Shaʼáłchíní, nihichʼįʼ akʼeʼashchí, háálá Christ bee nihibąąhági ádaatʼéii nihá yóóʼahideestʼą́.
13 Azhéʼé danohłíinii, nihí ałdóʼ nihichʼįʼ akʼeʼashchí, háálá hodeeyáádę́ę́ʼ hojílóonii hwéédahonohsin. Tsíłkéí danohłíinii, nihichʼįʼ akʼeʼashchí, háálá bąąhági átʼéii nilínígíí bikʼeh dasidoohdlı̨́ı̨́ʼ. Áłchíní danohłíinii, nihichʼįʼ akʼeʼashchí, háálá Diyin God aTaaʼ béédahonohsin.
14 Azhéʼé danohłíinii, nihichʼįʼ akʼeshéłchı̨́, háálá hodeeyáádę́ę́ʼ hojílóonii hwéédahonohsin. Tsíłkéí danohłíinii, nihichʼįʼ akʼeshéłchı̨́, háálá danihidziil, áádóó Diyin God bizaad nihiiʼ dahólǫ́, áko bąąhági átʼéii nilínígíí bikʼeh dasidoohdlı̨́ı̨́ʼ.
15 Nahasdzáán bikááʼgóó dahólóonii tʼáadoo ayóóʼádeínóhʼníní, nihokááʼ bił nidahaztʼiʼii nidi dooda. Tʼáá háiida nihokááʼ bił nidahaztʼiʼii ayóóʼájóʼnínígíí éí aTaaʼ bibee ayóóʼóʼóʼníinii doo hwiiʼ hólǫ́ǫ da.
16 Háálá nihokááʼ bił nidahaztʼiʼii tʼáá ałtso, atsʼíís yidánoolníinii, áádóó anááʼ yidánoolníinii áádóó iiná bee ádaa hodzódlíii éí doo aTaaʼ bitsʼą́ą́dę́ę́ʼ ádaatʼée da, nidi nihokááʼdóó ádaatʼé.
17 Índa nihokáaʼgi dahólóonii áádóó ił bidádahonooníinii tʼáá bił yóóʼahodoogááł, nidi Diyin God íinízinii bikʼehgo ájooníiłii éí hoolʼáágóó hojílǫ́.
Christ biʼanaʼí nilíinii
18 Shaʼáłchíní, kʼadę́ę nihoolzhíísh, Christ biʼanaʼí nilíinii doogááł haʼníigo dasidootsʼą́ą́ʼ yę́ęgi átʼéego, kʼad nidi Christ biʼanaʼí danilíinii ląʼí nidahaaskai; díí bee kʼadę́ę nihoolzhíshígíí nihił béédahózin.
19 Nihitsʼą́ą́dóó aheeskai, nidi éí doo tʼáá aaníí nihííʼ danilı̨́į da, háálá nihííʼ danilı̨́įgo, tʼah nihił naakai doo nítʼééʼ, nidi éí tʼáadoo bahatʼaadí doo nihitsʼą́ą́dóó danilínígíí béédahodoozįįł biniyé nihitsʼą́ą́dóó aheeskai.
20 Nidi Diyin God jílíinii atsʼánihizhnínil áádóó tʼáá ałtsojįʼ nihił ééhodzísin.
21 Tʼáá aaníinii doo nihił béédahózin daígíí doo biniyé nihichʼįʼ akʼeʼashchíi da, nidi nihił béédahózinígíí biniyé, áádóó tʼáá aaníinii woochʼííd bąąh ádingo nihił béédahózin.
22 Háishąʼ biyoochʼíidii nilı̨́? Jesus éí doo Christ átʼı̨́į da, jinínígíí lą́ą. ATaaʼ índa biYeʼ doo ádízhdééltʼiʼgóó hadziidziihígíí éí lá Christ biʼanaʼí jílı̨́.
23 Tʼáá háiida aYeʼ doo ádízhdééltʼiʼgóó hadziidziihígíí éí aTaaʼ doo hwee hólǫ́ǫ da, nidi aYeʼ ádízhdééltʼiʼgo hadziidziihígíí éí aTaaʼ nilíinii hwee hólǫ́.
24 Áko daʼiisoohdląąd yę́ędóó dasidootsʼą́ąʼii tʼáá áłahjįʼ bíniʼdii nihiiʼ dahólǫ́ǫgo ádeínóhsin. Bitłʼáahdidą́ą́ʼ dasidootsʼą́ąʼii tʼáá áłahjįʼ nihiiʼ dahólǫ́ǫgo aYeʼ índa aTaaʼ tʼáá áłahjįʼ biiʼ dahonohłǫ́ǫ doo.
25 Áko díí bee nihá nihozhníʼą́ągo bee hadzoodzíiʼii éí iiná doo ninítʼiʼii.
26 Nihidaʼdoolohii beiníshtʼı̨́įgo díí bee nihichʼįʼ akʼeʼashchí.
27 Nidi nihí Christ bee Níłchʼi Diyinii nihiiʼ hazlı̨́įʼgo łaʼda nanihizhnitin dooleełígíí doo bee nihichʼįʼ anídahaztʼiʼ da, háálá Níłchʼi Diyinii tʼáá ałtsoní yínanihiniłtin. Tʼáá aaníinii, éí doo woochʼííd átʼéégóó yínanihiniłtin. Áko éí bikʼeh dahonołʼı̨́įgo tʼáá áłahjįʼ Christ biiʼ dahonohłǫ́.
28 Shaʼáłchíní danohłíinii, tʼáá ałtsojįʼ biiʼ dahonohłǫ́, áko Christ yitʼíní íʼdiilyaago doo nitsideiidáa da doo, áádóó náánádzáago bidááhdóó deiidzįʼgo doo ádaa yádaniidzin da doo.
29 Christ tsʼídá tʼáá ákogi átʼéii nilı̨́įgo nihił béédahózin. Áko tʼááłáʼí jinítínígo tsʼídá tʼáá ákogi ádajitʼíinii Diyin God bitsʼą́ą́dóó náádahoʼdizhchı̨́įgo ałdóʼ nihił béédahózin.
