Pejana ga lehu la gagwe, Jesu o ile a tsebatša gore: “Ditaba tše tše dibotse tša Mmušo di tla bolelwa lefaseng ka moka gore e be bohlatse go ditšhaba tšohle, ke moka bofelo bo tla tla.” (Mateo 24:14) Eupša modiro wo wa boboledi wa lefase ka bophara o be o tla phethwa bjang? Ka go latela mohlala woo Jesu a o beilego ge a be a le lefaseng.—Luka 8:1.

Re leka go ikgokaganya le batho malapeng a bona. Jesu o ile a tlwaetša balatedi ba gagwe go bolela ditaba tše dibotse ka ntlo le ntlo. (Mateo 10:11-13; Ditiro 5:42; 20:20) Baebangedi bao ba lekgolong la pele la nywaga ba be ba abetšwe mafelo a itšego ao ba bego ba swanetše go bolela go ona. (Mateo 10:5, 6; 2 Bakorinthe 10:13) Le lehono modiro wa rena wa boboledi o rulagantšwe gabotse, gomme phuthego e nngwe le e nngwe e abelwa lefelo le itšego leo e swanetšego go le akaretša. Se se dira gore re kgone go phethagatša thomo ya Jesu ya gore re “bolele bathong le go nea bohlatse bjo bo feletšego.”—Ditiro 10:42.

Re katanela go hwetša batho kae le kae moo ba ka hwetšwago gona. Jesu gape o beile mohlala ka go bolela le batho mafelong a batho bohle, a bjalo ka hleng ga lewatle goba sedibeng sa setšhaba. (Mareka 4:1; Johane 4:5-15) Le rena re boledišana le batho ka Beibele kae le kae moo re kgonago—ditarateng, mafelong a kgwebo, diphakeng goba ka mogala. E bile re boledišana le baagišani ba rena, bao re šomago le bona, bao re tsenago le bona ka klaseng le metswalo ya rena ge re hwetša sebaka sa go dira bjalo. Maiteko a ka moka a dirile gore batho ba dimilione lefaseng ka bophara ba kwe “ditaba tše dibotse tša go phološa.”—Psalme 96:2.

Na o ka nagana ka motho yo mongwe yo o ka ratago go boledišana le yena ka ditaba tše dibotse tša Mmušo wa Modimo le seo ditaba tšeo di se bolelago ka bokamoso bja gagwe? O se ke wa timana ka molaetša wo wa kholofelo. O botše ba bangwe kapejana ka mo o ka kgonago!

• “Ditaba tše dibotse” tšeo di swanetšego go bolelwa ke dife?

• Dihlatse tša Jehofa di ekiša bjang mohlala wa Jesu wa go dira boboledi?