Ge Olivia wa kua Australia a be a sa le sekolong sa bomapimpana, o ile a laletša morutiši wa gagwe Segopotšong. Mengwageng e seswai e latetšego, Olivia o ile a tšwela pele a laletša morutiši wa gagwe Segopotšong ngwaga le ngwaga. Mafelelong, ka 2016, morutiši wa gagwe o ile a mo founela a mmotša gore a ka rata go ba gona Segopotšong. O itše o kgahlilwe ke gore Olivia o be a dula a mo laletša  ngwaga le ngwaga. Ka gona, morutiši o ile a tla Segopotšong le monna wa gagwe. Ka ge monna wa gagwe a be a kile a šoma ga mmasepala, o be a gopola nakong ya ge go be go sa agwa Holo ya Mmušo motseng woo. O ile a botša bana babo rena gore o be a kgahlilwe ke kamoo modiro wa go aga Holo ya Mmušo o ilego wa sepedišwa ka thulaganyo ka gona. Morutiši yoo le monna wa gagwe ba ile ba thabela kudu go ba gona Segopotšong moo ba ilego ba ba gare ga bao ba tlogilego mafelelong.

Jacintu le mosadi wa gagwe ba dula Timor-Leste. Ka ge e le Makatholika ao a ineetšego, ba ile ba makatšwa ke ge ngwana wa buti wa Jacintu a eba Hlatse ya Jehofa gomme a tlogela bodumedi bja lapa. Ka ge Jacintu a be a nyaka go bontšha motlogolo wa gagwe gore o fošitše, o ile a phetha ka gore a bale puku ya Ke Eng Seo ge e le Gabotse Beibele e se Rutago? Morero wa gagwe e be e le go hwetša dithuto tša maaka. Ka morago o ile a botša mosadi wa gagwe gore: “Puku yela ke e badile gomme ga se ka hwetša e na le bothata.”

Mosadi wa gagwe o ile a re: “O swanetše go ba o sa e bala gabotse. E bale gape, eupša ga bjale o e bale ka go iketla.”

Jacintu o ile a dira bjalo gomme a botša mosadi wa gagwe gape gore: “Ga e na bothata.” Eupša o ile a oketša ka gore: “E bolela seo se tšwago ka Beibeleng. Gaešita le seo e se bolelago mabapi le taba ya go rapela bahu se tšwa ka Beibeleng.”

 Mosadi wa gagwe o ile a re: “E bale gape ka lekga la boraro, eupša mo lekgeng le o thalele serapa se sengwe le se sengwe—o e bale ka šedi. E swanetše go ba e fošitše.”

Jacintu o ile a tloga a bala puku yeo ka šedi, a thalela serapa se sengwe le se sengwe. Ka morago ga go e bala ka šedi ka lekga la boraro, o ile a re: “E bolela therešo! Motlogolo wa rena o nepile.” Ga bjale Jacintu o ithuta Beibele le Dihlatse tša Jehofa.

Kgaetšedi wa mmulamadibogo yo a dulago Guam, o ile a etela mosadi wa kua Pohnpei gomme a mmontšha bidio ya Ke ka Baka la Eng o Swanetše go Ithuta Beibele? Kgaetšedi o ile a botša mosadi yoo gore o tla boa. Le ge a ile a boa ka makga a mmalwa, o be a sa hwetše mosadi yoo ka gae. Ka gona ge morwedi wa mosadi yoo a bula mojako, kgaetšedi o ile a mmontšha e nngwe ya dibidio tša Eba Mogwera wa Jehofa. Morwedi yoo o ile a e thabela kudu. Nakong  e latelago ge kgaetšedi a boela, mmago ngwana yoo o ile a bula mojako gomme a amogela molaetša wa Beibele. Go bonagala morwedi wa mosadi yoo a be a boditše mmagwe gore ba swanetše go ya kerekeng ya mosadi yo a mmontšhitšego bidio. Mmagwe o be a bonagala a kgahlilwe ke seo. Kgaetšedi o ile a ba bontšha kamoo thuto ya Beibele e swarwago ka gona gomme gwa dirwa dithulaganyo tša gore e tle e tšwetšwe pele.

Terence, e lego molebeledi wa tikologo, o ile a ya le mosadi wa gagwe, Stella, kua Inakor, e lego tšhemo yeo e sa abjago ya kua Papua New Guinea. Terence o re: “Letšatšing la pele ge re be sa robetše mesong, re ile ra kwa motho  a kokota mojako. Go be go na le batho ba bantši bao ba emego ka ntle, ka gona re ile ra boledišana le bona ka Beibele go tloga ka iri ya botshelela mesong go fihla mosegare. Re ile ra emiša e le gore re yo hlapa gomme ra hwetša gore ba bangwe ba bantši ba be ba sa re letile. Ka gona re ile ra boledišana le bona gape ka Beibele go tloga ka iri ya bobedi go fihla bošegogare.” Mesong e latelago, banyalani bao ba ile ba tloga e sa le mesong kudu ba yo etela motseng o mongwe. Ba bantši ba ile ba ya gape moo banyalani bao ba dulago gona ba ba nyaka eupša ba se ba hwetše. Terence o re: “Ge ba ekwa gore re ile kae, ba ile ba re šala morago gomme ba re hwetša. Re ile ra boledišana le bona gape ka Beibele go fihla mosegare. Ge re fihla moo re dulago gona, go be go na le ba bangwe gape bao ba bego ba re letile. Letšatši le letšatši go be go direga sona seo. Batho ba moo ba be ba ‘swana le dinku tše di se nago modiši.’”—Mat. 9:36.

Agnès, e lego mmulamadibogo yo a dulago New Caledonia, o ile a swanelwa ke go ya ngakeng ya go šidulla mmele (physiotherapist) ka ge a be a opelwa ke letsogo. Ge ngaka yeo e be e thuša Agnès, e ile ya mmotša gore e bona batho ba bantši ba tlaišega moo e ipotšišago ge e ba Modimo a le sehlogo. Agnès o ile a leboga Jehofa ka pelong ge a mo file sebaka sa gore a kgone go mo emela. Ka gona o ile a bontšha ngaka pampišana ya Na Tlaišego e tla ka ya Fela? ke moka a e balela lengwalo la Kutollo 21:3, 4.

Ngaka e itše: “Ga ke kgodišege ge e ba temana yeo o sa tšwago go e bala e le gona ka Beibeleng ya ka; e na le Diebangedi feela.” Ke moka, ka go lemoga gore Agnès e be e le Hlatse ya Jehofa, ngaka e ile ya mmotša gore e kile ya kopana le Dihlatse nageng ya gabo yona ya Chile.

Agnès o ile a gopola gore pego ya lekala la Chile e be e  tsentšwe go Kgašo ya JW. Ka gona, ge a boela ngakeng, o ile a tla le thabolete ya gagwe ke moka a bontšha ngaka bidio ya pego yeo. Ngaka e be e kgomegile ka go bona Bethele le Holo ya Kopano tša kua Chile. Ka morago ga moo, Agnès o ile a re: “Selo sa bobedi seo ke go swaretšego sona ke se, Beibele e feletšego, e le gore o kgone go bala lengwalo la Kutollo 21:3, 4, leo ke go baletšego lona bekeng ya go feta!” Ngaka yeo e ile ya emelela setulong sa yona ya gokarela Agnès ya re: “Ke leboga kudu ka dimpho tše tše pedi tše dibotse!”

Ge Agnès a boela gape, o ile a tla le puku ya Ke Eng Seo ge e le Gabotse Beibele e se Rutago? O ile a hlalosa ka mo go oketšegilego seo se bakago tlaišego lefaseng. Ngaka yeo e ile ya re e tlo ya maikhutšong Chile gomme ya re e tla sepela le puku yeo gore e e bale ka moka.