Thuto 7
Mmušo wa Modimo ke Eng?
1. Mmušo wa Modimo ke eng?
Ke eng seo se dirago gore Jesu e be Kgoši e swanelegago?—MAREKA 1:40-42.
Mmušo wa Modimo ke pušo ya legodimong. E tla tšeela dipušo tše dingwe ka moka legato gomme ya dira gore thato ya Modimo e direge legodimong le lefaseng. Ditaba tša mabapi le Mmušo wa Modimo ke tše dibotse. Go se go ye kae, Mmušo wa Modimo o tla kgotsofatša senyakwa sa batho sa pušo e lokilego. O tla dira gore batho ka moka ba phelago lefaseng e be batee.—Bala Daniele 2:44; Mateo 6:9, 10; 24:14.
Mmušo o swanetše go ba le kgoši. Jehofa o kgethile Morwa wa gagwe, Jesu Kriste, gore a be Kgoši ya Mmušo wa Gagwe.—Bala Kutollo 11:15.
Lebelela bidio Mmušo wa Modimo ke Eng?
2. Ke ka baka la eng Jesu e le Kgoši e swanelegago?
Morwa wa Modimo ke Kgoši e swanelegago ka gobane ke yo botho e bile o kgomarela se se nepagetšego. (Mateo 11:28-30) Le gona, o na le matla a lekanego a go thuša batho ka gobane o tla buša lefase a le legodimong. Ka morago ga ge a tsošitšwe bahung, Jesu o ile a rotogela legodimong gomme a dula a leta a le ka letsogong le letona la Jehofa. (Baheberu 10:12, 13) Mafelelong, Modimo o ile a mo nea matla a go thoma go buša.—Bala Daniele 7:13, 14.
3. Ke bomang bao ba tlago go buša le Jesu?
Sehlopha seo se bitšwago “bakgethwa” se tla buša le Jesu legodimong. (Daniele 7:27) Bakgethwa ba mathomo bao ba ilego ba kgethwa e be e le baapostola ba botegago ba Jesu. Jehofa o ile a tšwela pele go kgetha banna le basadi ba botegago e le bakgethwa go ba go fihla ga bjale. Go swana le Jesu, ba tsošwa ka mmele wa moya.—Bala Johane 14:1-3; 1 Bakorinthe 15:42-44.
Ke batho ba bakae bao ba yago legodimong? Jesu o ba biditše “mohlatswana.” (Luka 12:32) Ge ba feletše e tla ba ba 144 000. Ba tla buša lefase ba ena le Jesu.—Bala Kutollo 14:1.
4. Go diregile eng ge Jesu a be a thoma go buša?
Mmušo wa Modimo o thomile go buša ka 1914. * Selo sa mathomo seo Jesu a se dirilego bjalo ka Kgoši e bile go lahlela Sathane le batemona ba gagwe lefaseng. Sathane o ile a galefa kudu gomme a thoma go baka mathata lefaseng ka bophara. (Kutollo 12:7-10, 12) Ga e sa le go tloga ka nako yeo, madimabe a batho a ile a oketšega o šoro. Dintwa, ditlala, mauba a malwetši le ditšhišinyego tša lefase ka moka ke karolo ya “pontšho” ya gore Mmušo kgauswinyane o tla laola ditaba ka moka tša lefase.—Bala Luka 21:7, 10, 11, 31.
5. Mmušo wa Modimo o dira eng?
Ka modiro wa lefase ka bophara wa boboledi, Mmušo wa Modimo o šetše o kgoboketša lešaba le legolo la batho ba tšwago ditšhabeng ka moka le go ba dira batee. Batho ba dimilione ba boleta ba fetoga balata ba Jesu. Mmušo wa Modimo o tla ba šireletša ge o fediša tshepedišo ya gona bjale e kgopo ya dilo lefaseng. Ka gona, bohle bao ba nyakago go holwa ke Mmušo wa Modimo ba swanetše go ithuta go ba balata ba kwago ba Jesu.—Bala Kutollo 7:9, 14, 16, 17.
Lebakeng la nywaga e 1 000, Mmušo o tla phethagatša morero wa Modimo wa mathomong ka batho. Lefase ka moka e tla ba paradeise. Mafelelong, Jesu o tla bušetša Mmušo go Tatagwe. (1 Bakorinthe 15:24-26) Na o tseba motho yoo o ka ratago go mmotša ka Mmušo wa Modimo?—Bala Psalme 37:10, 11, 29.
^ ser. 6 Mabapi le dintlha ka botlalo tša kamoo boporofeta bja Beibele bo boletšego e sa le pele ka ngwaga wa 1914, bona matlakala 215-218 ka pukung ya Ke Eng Seo ge e le Gabotse Beibele e se Rutago?
