Josefa le Maria ba dula Betlelehema go e na le go boela Natsaretha. Ge Jesu a na le matšatši a seswai, ba a mmolotša bjalo ka ge Molao wo Modimo a o neilego Baisiraele o be o laela. (Lefitiko 12:2, 3) Gape ke setlwaedi go rea ngwana wa mošemanyana leina ka letšatši leo. Ba rea morwa wa bona leina la Jesu, go etša ge morongwa Gabariele a be a laetše pejana.

Go feta lebaka la ka godimo ga kgwedi, gomme Jesu o na le matšatši a 40. Batswadi ba gagwe bjale ba mo iša kae? Ba mo iša tempeleng Jerusalema, yeo e lego dikhilomithara tše sego kae feela go tloga mo ba dulago gona. Molao o re ka morago ga matšatši a 40 mmago ngwana a belege morwa, mma o swanetše go tliša sebego sa tlhwekišo tempeleng.—Lefitiko 12:4-7.

Maria o dira seo. O tliša dinonyana tše pedi tše dinyenyane e le sebego sa gagwe. Se se re botša se sengwe ka boemo bja tša boiphedišo bja Josefa le Maria. Go ya ka Molao, go swanetšwe go tlišwa kgapana le nonyana. Eupša ge e ba mmago ngwana a sa kgone go tliša kgapana, gona maebakgorwana a mabedi goba maebana a mabedi a tla lekana. Bjo ke boemo bja Maria le seo a se tlišago.

Mokgalabje yo mongwe o tla go Josefa le Maria kua tempeleng. Leina la gagwe ke Simeone. Modimo o mo utolletše gore pele ga ge a ka hwa, o be a tla bona Kriste goba Mesia yo a holofeditšwego wa Jehofa. Letšatšing le Simeone o hlahlwa ke moya o mokgethwa gore a ye tempeleng, moo a hwetšago Josefa le Maria ba na le morwa wa bona yo monyenyane. Simeone o kuka ngwana yoo.

Ge a sa kukile Jesu, Simeone o leboga Modimo, o re: “Bjale wena Mmuši Morena, o lokolla nna mohlanka wa gago gore ke sepele ka khutšo bjalo ka ge o boletše gobane mahlo a ka a bone mokgwa wa gago wa go phološa woo o o lokišitšego mahlong a batho ka moka; ke yena seetša sa go tloša lešira ditšhabeng e bile ke letago la batho ba gago ba Isiraele.”—Luka 2:29-32.

Josefa le Maria ba makatšwa ke go kwa se. Simeone o a ba šegofatša gomme o botša Maria gore morwa wa gagwe “o beetšwe go wa le go tsoga gape ga ba bantši Isiraeleng” le gore manyami a tla phuleletša moya wa gagwe bjalo ka tšhoša e bogale.—Luka 2:34.

Go na le motho yo mongwe yo a lego moo letšatšing le. Ke moporofeta wa mosadi wa nywaga e 84 yo a bitšwago Anna. Ge e le gabotse, ga a ke a hlokega tempeleng. Lebakeng le Anna o tla go Josefa, Maria gotee le lesea Jesu. Anna o thoma go leboga Modimo le go bolela ka Jesu go bohle bao ba ka theetšago.

O ka akanya kamoo Josefa le Maria ba thabišwago ke ditiragalo tše tempeleng! Ka kgonthe, se ka moka se ba kgonthišetša gore morwa wa bona ke Yena Yo a Holofeditšwego wa Modimo.