Jesu le barutiwa ba gagwe ba fihla Betsaida. Ke moka batho ba tliša sefofu go Jesu gomme ba mo kgopela gore a kgwathe motho yoo gomme a mo fodiše.

Jesu o swara motho yoo ka seatla gomme a mo ntšhetša ka ntle ga motsana. Ka morago ga ge a mo tshwetše ka mare mo mahlong, Jesu o mmotšiša ka gore: “Na go na le se o se bonago?” Motho yo o araba ka gore: “Ke bona batho. Ba bonala eka ke dihlare, eupša ba a sepelasepela.” (Mareka 8:23, 24) Jesu o dira gore motho yoo a bone gabotse ka go mmea diatla mahlong. Ke moka o romela motho yo bjale a bonago gabotse gae, a mo laela gore a se tsene motsaneng.

Ka morago, Jesu le barutiwa ba gagwe ba ya ka thoko ya leboa tikologong ya Kesarea Filipi. Ke mmoto o motelele, wo o tšeago monabo wa dikhilomithara tše e ka bago tše 40. Motsana wo o bophagamong bja dimithara tše 350 ka godimo ga lewatle, gomme ka thoko ya leboabohlabela go rotoga Thaba ya Herimone yeo ntlha ya yona e apešitšwego ke lehlwa. Mohlomongwe leeto la gona le tšea matšatši a mmalwa.

Ge a le kaekae tseleng, Jesu o a tepoga gore a yo rapela a nnoši. Go šetše mo e ka bago dikgwedi tše senyane goba tše lesome pele ga ge Jesu a ka hwa, gomme o tshwenyegile ka barutiwa ba gagwe. Ba bantši ba sa tšwa go kgaotša go mo latela, gomme go bonagala ba bangwe ba gakanegile goba ba nyamile. Ba ka ba ba ipotšiša lebaka leo ka lona a gannego maiteko a batho a go leka go mo dira kgoši goba ba ipotšiša lebaka leo ka lona a gannego go nea pontšho ya gore ge e le gabotse ke yena mang.

Ge barutiwa ba fihla moo a rapelago gona, Jesu o botšiša ka gore: “Batho ba re Morwa wa motho ke mang?” Ba araba ka gore: “Ba bangwe ba re ke Johane Mokolobetši, ba bangwe ba re ke Eliya, ba bangwe bona ba re ke Jeremia goba yo mongwe wa baporofeta.” Ee, batho ba nagana gore ge e le gabotse Jesu e ka ba e le yo mongwe wa batho bao ba tsošitšwego bahung. E le gore a kwe seo ba se naganago, Jesu o botšiša barutiwa ba gagwe o re: “Eupša lena le re ke nna mang?” Petro o araba kapejana o re: “Ke wena Kriste, Morwa wa Modimo yo a phelago.”—Mateo 16:13-16.

Jesu o re Petro a thabele gore Modimo o mo utolletše seo, gomme a oketša ka gore: “Ke re go wena: Ke wena Petro, mo leswikeng le ke tla aga phuthego ya ka gomme dikgoro tša Bodulabahu di ka se e fenye.” Jesu o bolela gore yena ka boyena o tla aga phuthego le gore gaešita le Bodulabahu bo ka se fenye ditho tša phuthego ge e ba di dula di botega lefaseng. O holofetša Petro o re: “Ke tla go nea dinotlelo tša Mmušo wa magodimo.”—Mateo 16:18, 19.

Jesu ga a etiše Petro pele go baapostola ba bangwe, e bile Jesu ga a mo dire gore e be motheo wa phuthego. Jesu ka boyena ke Leswika leo phuthego e tlago go agwa godimo ga lona. (1 Bakorinthe 3:11; Baefeso 2:20) Lega go le bjalo, Petro o tla amogela dinotlelo tše tharo. Go ka thwe o tla ba le tokelo ya go bulela dihlopha tša batho dibaka tša gore ba tsene Mmušong wa magodimong.

Petro o be a tla diriša senotlelo sa mathomo ka Pentekoste ya 33 C.E., a bontšha Bajuda bao ba sokologago gotee le bao ba sokologetšego tumelong ya Sejuda seo ba swanetšego go se dira gore ba phološwe. O be a tla diriša senotlelo sa bobedi go bulela Basamaria bao ba dumelago sebaka sa go tsena Mmušong wa Modimo. Ka morago, ka 36 C.E., Petro o be a tla diriša senotlelo sa boraro go bulela Bantle bao ba sa bollago sebaka seo, e lego Koronelio le ba bangwe.—Ditiro 2:37, 38; 8:14-17; 10:44-48.

Poledišanong ye, baapostola ba Jesu ba tshwenywa ke ge a bolela e sa le pele ka ditlaišego le lehu leo a bego a tla tloga a lebeletšana le lona kua Jerusalema. Ka ge a be a sa kwešiše gore Jesu o tla tsošetšwa bophelong bja legodimong, Petro o mo iša ka thoko a mo kgalema a re: “Ikwele bohloko Morena; o ka se feleletše ka tsela ye le gatee.” Eupša Jesu o a fulara gomme a re: “Tloga mo pele ga ka, wena Sathane! O tšhitišo go nna, gobane o nagana dikgopolo tša batho, e sego tša Modimo.”—Mateo 16:22, 23.

Bjale Jesu o bitša ba bangwe bao e sego baapostola gomme a ba hlalosetša gore go ba molatedi wa gagwe go ka se be bonolo. O re: “Ge e ba motho le ge e le ofe a nyaka go ntšhala morago, a a itatole gomme a rwale kota ya gagwe ya tlhokofatšo a ntatele ka go se kgaotše. Gobane mang le mang yo a nyakago go phološa moya wa gagwe o tla o loba, eupša mang le mang yo a lobago moya wa gagwe ka baka la ka le ditaba tše dibotse o tla o phološa.”—Mareka 8:34, 35.

Ee, e le gore barutiwa ba Jesu ba tle ba amogelwe ke yena, ba swanetše go ba le sebete le go ikgafa. Jesu o re: “Mang le mang yo a hlabjago ke dihlong ka nna le ka mantšu a ka molokong wo wa go se botegele Modimo le wa sebe, Morwa wa motho le yena o tla hlabja ke dihlong ka yena ge a fihla ka letago la Tatagwe a na le barongwa ba bakgethwa.” (Mareka 8:38) Ee, ge Jesu a etla ka tsela yeo, “o tla putsa yo mongwe le yo mongwe go ya ka boitshwaro bja gagwe.”—Mateo 16:27.