Ka morago ga ge Jesu a sotše Bafarisei ka baka la metlwae ya bona ya go ikhola, o tloga le barutiwa ba gagwe. O leba ditikologong tša Tiro le Sidone kua Fenikia, tšeo di lego bokgole bja dikhilomithara tše dintši go yela ka leboabodikela.

Jesu o hwetša ntlo yeo a ka dulago go yona eupša ga a nyake batho ba tseba gore o moo. Lega go le bjalo, le gona moo batho ba a mmona. Mosadi wa Mogerika yo a belegetšwego lefelong le o hwetša Jesu gomme a thoma go mo lopa ka gore: “Nkgaugele, Morena, Morwa wa Dafida. Morwedi wa ka o tlaišwa o šoro ke batemona.”—Mateo 15:22; Mareka 7:26.

Ka morago ga lebakanyana, barutiwa ba Jesu ba mo kgopela ba re: “Mo gomiše gobane o duletše go goeletša a re šetše morago.” Ge a ba araba, Jesu o hlalosa lebaka la gagwe la go mo hlokomologa o re: “Ga se ka romelwa go batho le ge e le bafe ge e se go dinku tše di timetšego tša ntlo ya Isiraele.” Lega go le bjalo, mosadi yo ga a hwe matwa. O a batamela gomme a wela fase pele ga Jesu a mo lopa a re: “Morena, nthuše!”—Mateo 15:23-25.

Mohlomongwe e le go leka tumelo ya gagwe, Jesu o bontšha pono e fošagetšego ya Bajuda ka batho ba ditšhaba tše dingwe, ge a re: “Ga go a swanela go tšea senkgwa sa bana wa se lahlela dimpšanyana.” (Mateo 15:26) Ge a bolela ka “dimpšanyana,” Jesu o utolla lerato leo a nago le lona ka bao e sego Bajuda. Ponagalo ya gagwe ya sefahlego le segalo sa lentšu la gagwe sa kwelobohloko le tšona di swanetše go ba di bontšha maikwelo ao.

Go e na le go kgopišega, mosadi yo o kwešiša polelo yeo e bolelago ka kgethollo ya Bajuda gomme o bolela ka boikokobetšo o re: “Ee, Morena, eupša ruri dimpšanyana di ja marathana a wago tafoleng ya beng ba tšona.” Jesu o lemoga boemo bjo bobotse bja pelo ya gagwe gomme o re: “Wena mosadi, tumelo ya gago ke e kgolo; a go go diragalele kamoo o ratago ka gona.” (Mateo 15:27, 28) Ke moka seo se a diragala, le ge mosetsana yoo a se gona moo! Ge mosadi yo a boela gae, o hwetša morwedi wa gagwe a robetše malaong, a fodile ka mo go feletšego—“motemona a tšwile”!—Mareka 7:30.

Go tloga tikologong ya Fenikia, Jesu le barutiwa ba gagwe ba phatša naga ba lebile karolong ya ka godimo ya Noka ya Jorodane. Mohlomongwe ba phatša Noka ya Jorodane lefelong le lengwe la ka leboa la Lewatle la Galilea gomme ba ya tikologong ya Dekapoli. Ge ba le moo, ba namela thaba, eupša mašaba a a ba hwetša. Batho ba tliša dihlotša, digole, difofu le dimumu go Jesu. Ba latša balwetši ba dinaong tša Jesu gomme a ba fodiša. Ka ge batho ba maketše, ba nea Modimo wa Isiraele letago.

Jesu o šetša ka mo go kgethegilego monna yo mongwe yoo e lego sefoa e bile a na le bothata bja go bolela. O ka kwešiša gore monna yo o ikwa bjang gare ga lešaba le legolo. Mohlomongwe a lemoga letšhogo la monna yo, Jesu o mo tloša lešabeng. Ge ba le noši, Jesu o mmontšha seo a tla mo direlago sona. O tsenya menwana ya gagwe ka ditsebeng tša monna yoo gomme, ka morago ga go tshwa mare, o kgwatha leleme la monna yoo. Ke moka Jesu a lebeletše legodimong, o bolela polelwana yeo ka leleme le lengwe la sehlopha sa maleme a Semitic e bolelago gore “thibologa.” Ka nako yeo, monna yo o thoma go kwa gomme o kgona go bolela gabotse. Jesu ga a nyake gore se se tsebje, o rata gore batho ba dumele go yena ka baka la seo ba iponetšego sona le seo ba ikwetšego sona.—Mareka 7:32-36.

Matla a Jesu a go dira diphodišo tše bjalo a kgoma e le ruri batho ba ba di bonago, bao ba ‘maketšego kudu.’ Ba re: “O dirile dilo ka moka gabotse. O bile o dira gore difoa di kwe le gore ba ba sa kgonego go bolela ba bolele.”—Mareka 7:37.