Ge Jesu a sa na le baapostola ka phapošing ya ka godimo ka morago ga dijo tša segopotšo, o ba kgothatša ka gore: “Le se dumelele dipelo tša lena di huduega. Bontšhang tumelo go Modimo le go nna.”—Johane 13:36; 14:1.

Jesu o nea baapostola bao ba botegago lebaka la go se huduege ge a tloga, o re: “Ntlong ya Tate go na le madulo a mantši. . . . Ge e ba ke tloga ke eya go le lokišetša lefelo, ke tla buša ka boa, ka le amogela gae go nna gore moo ke lego gona le lena le be gona.” Lega go le bjalo, baapostola ga ba kwešiše gore Jesu o bolela ka go ya legodimong. Thomase o botšiša gore: “Morena, ga re tsebe moo o yago. Re tseba bjang tsela?”—Johane 14:2-5.

Jesu o araba ka gore: “Ke nna tsela le therešo le bophelo.” Ke feela ge motho a amogela Jesu, dithuto tša gagwe le go ekiša tsela ya gagwe ya bophelo a ka tsenago ntlong ya Tatagwe ya legodimong. Jesu o re: “Ga go yo a tlago go Tate ge e se ka nna.”—Johane 14:6.

Filipi o kgopela a theeditše ka kelohloko, o re: “Morena, re bontšhe Tatago gomme go tla be go lekane go rena.” Go bonagala Filipi a nyaka ponagatšo e itšego ya Modimo, go swana le dipono tšeo Moshe, Eliya le Jesaya ba ilego ba di bona. Lega go le bjalo, baapostola ba na le seo se fetago dipono tše bjalo. Jesu o gatelela seo ge a re: “Wena Filipi, na ke bile le lena ka nako e telele gakaakaa, fela ga se wa hlwa o ntseba? Yo a bonego nna o bone le Tate.” Jesu o bonagatša semelo sa Tatagwe ka mo go feletšego; ka gona, go dula le Jesu le go mo šetša go swana le go bona Tatagwe. Go molaleng gore Tate o feta Morwa ka bogolo ka gobane Jesu o re: “Dilo tšeo ke le botšago tšona ga ke di bolele ka la ka.” (Johane 14:8-10) Baapostola ba bona gore Jesu o iša theto ka moka go Tatagwe bakeng sa dithuto tša gagwe.

Baapostola ba Jesu ba bone a dira mediro e makatšago le gona ba mo kwele a bolela ditaba tše dibotse tša Mmušo wa Modimo. Bjale Jesu o ba botša gore: “Yo a dumelago go nna, le yena o tla dira mediro ye ke e dirago; o tla dira mediro e fetago ye.” (Johane 14:12) Jesu ga a bolele gore ba tla dira mehlolo e megolo go feta yeo a e dirilego. Lega go le bjalo, ba tla dira bodiredi bja bona lebaka le leteletšana, tikologong e kgolwanyane le bathong ba bantši kudu.

Go tloga ga Jesu go ka se ba tlogele ba lahlegile, ka gobane o ba holofetša gore: “Ge e ba le kgopela selo le ge e le sefe ka leina la ka, ke tla se dira.” Go oketša moo, o re: “Ke tla kgopela Tate gomme o tla le nea mothuši yo mongwe gore a be le lena ka mo go sa felego, e lego moya wa therešo.” (Johane 14:14, 16, 17) O ba kgonthišetša gore ba tla hwetša moya o mokgethwa, e lego mothuši yoo yo mongwe. Seo se direga ka letšatši la Pentekoste.

Jesu o re: “Go šetše lebakanyana feela gomme lefase le ka se hlwe le mpona, eupša lena le tla mpona gobane ke a phela gomme le lena le tla phela.” (Johane 14:19) Ga se feela gore Jesu o tla tšwelela go bona a ikapešitše mmele wa nama ka morago ga ge a tsošitšwe bahung eupša ge nako e dutše e eya, o tla ba tsoša gore ba be le yena legodimong e le dibopiwa tša moya.

Bjale Jesu o bolela therešo e bonolo o re: “Yo a nago le ditaelo tša ka gomme a di boloka, yena yoo ke yo a nthatago. Le gona yo a nthatago o tla ratwa ke Tate gomme ke tla mo rata e bile ke tla iponagatša gabotse go yena.” Ge a re’alo, moapostola Judase, yoo gape a bitšwago Thadeo, o a botšiša o re: “Morena, go diragetše eng ge o ikemišeditše go iponagatša gabotse go rena e sego go lefase?” Jesu o araba ka gore: “Ge e ba motho le ge e le ofe a nthata, o tla boloka lentšu la ka gomme Tate o tla mo rata . . . Yo a sa nthatego ga a boloke mantšu a ka.” (Johane 14:21-24) Lefase ga le lemoge Jesu e le tsela, therešo le bophelo go etša ge balatedi ba gagwe ba lemoga seo.

Jesu o a tloga, ka gona barutiwa ba gagwe ba tla gopola bjang dilo tšohle tšeo a ba rutilego tšona? Jesu o a hlalosa o re: “Mothuši, e lego moya o mokgethwa woo Tate a tlago go o roma ka leina la ka, o tla le ruta tšohle le go le gopotša tšohle tšeo ke le boditšego tšona.” Baapostola ba bone kamoo moya o mokgethwa o kgonago go šoma ka tsela e matla, ka gona kgonthišetšo ye e a ba homotša. Jesu o oketša ka gore: “Ke le tlogelela khutšo, ke le nea khutšo ya ka. . . . Le se dumelele dipelo tša lena di huduega le ge e le go di dumelela go tšhoga ka baka la poifo.” (Johane 14:26, 27) Ka baka leo barutiwa ga ba na lebaka la go tshwenyega—ba tla hlahlwa le go šireletšwa ke Tatago Jesu.

Bohlatse bja tšhireletšo ya Modimo bo tla bonagala kgauswinyane. Jesu o re: “Mmuši wa lefase o etla. Le gona a ka se ntire selo.” (Johane 14:30) Judase o ile a tsenwa ke Diabolo gomme a mo laola. Eupša ga go na bofokodi bja sebe go Jesu bjoo Sathane a ka bo dirišago gore Jesu a hlanogele Modimo. Le gona Diabolo a ka se palediše Jesu go tsoga bahung. Ka baka la’ng? Jesu o re: “Ke dira tšeo Tate a ntaetšego gore ke di dire.” O kgodišegile gore Tatagwe o tla mo tsoša bahung.—Johane 14:31.