Mohlala​—Moshulami

Kgarebe ya Moshulami e a tseba gore ga se ya swanela go gafišwa ke maikwelo a lerato. E botša bagwera ba yona gore: “Ke le eniša . . . gore le se ke la leka go tsoša goba go phafoša lerato la ka go fihlela le itlela.” Moshulami o a tseba gore maikwelo a ka fenya kapejana tsela e botse ya go nagana. Ka mohlala, o a lemoga gore batho ba bangwe ba ka mo gateletša gore a dumele go ratana le motho yo a sa mo swanelago. Gaešita le maikwelo a gagwe a ka mo foufaletša go dira phetho e botse. Ka gona Moshulami o ema a tiile bjalo ka “morako.”—Sefela sa Difela 8:4, 10.

Na o lebelela lerato go etša motho yo a godilego tsebong go swana le Moshulami? Na o ka hlahlwa ke seo o se naganago go e na le go hlahlwa feela ke maikwelo a gago? (Diema 2:10, 11) Ka dinako tše dingwe, batho ba bangwe ba ka leka go go gateletša gore o ratane le motho pele ga ge o ka lokela seo. Le wena o ka ipakela kgateletšo e bjalo. Ka mohlala, ge o bona mošemane le ngwanenyana ba sepela ba swarane ka matsogo, na le wena o ikwa o fišegela go ratana? Na o tla fo ratana le motho yo a sego bodumeding bja gago? Kgarebe ya Moshulami e be e godile tsebong ditabeng tša marato. Go ka ba bjalo le ka wena!