Kgaolo 4

Ke ka Baka La’ng Mma le Tate ba Arogane?

“Ke be ke le gae le mma letšatšing leo tate a re tlogetšego ka lona. Ke be ke na le nywaga e tshelelago feela, ka gona ke be ke sa kwešiše seo se bego se direga. Ke be ke dutše fase ke bogetše TV, gomme ke kgona go kwa mma a lla a kgopela tate gore a se ke a sepela. Tate o ile a theogela lebatong la ka tlase a swere sutukheisi, a khunama, a nkatla, ke moka a re: ‘Tatago o tla dula a go rata.’ Ke moka o ile a tšwa ka mojako a sepela. Ga se ka ka ka bona tate ka lebaka le letelele ka morago ga moo. Ga e sa le go tloga ka nako yeo, ke be ke dula ke boifa gore mma le yena o tla sepela.”—Elaine wa nywaga e 19.

 GE BATSWADI ba gago ba hlalana, go ka bonagala eka ke bofelo bja lefase, seo se ka baka masetlapelo ao e ka bago a bophelo ka moka. Gantši seo se baka maikwelo a go lewa ke dihlong, pefelo, dipelaelo, go boifa go tlogelwa, go ikwa o le molato, kgateletšego le go ikwa o lahlegetšwe kudu—gaešita le kganyogo ya go itefeletša.

Ge e ba batswadi ba gago ba sa tšwa go arogana, o ka ba o ikwa ka tsela e swanago gomme seo ga se makatše ka gobane Mmopi wa rena o be a rerile gore bana ba godišwe ke bobedi tate le mma. (Baefeso 6:1-3) Ga bjale ga o sa kgona go bona ka mehla motswadi yo o bego o mo rata kudu. Daniel yoo batswadi ba gagwe ba aroganego ge a be a na le nywaga e šupago o re: “Ke be ke tloga ke tšeela tate godimo gomme ke nyaka go ba le yena. Eupša mma o ile a newa tshwanelo ya gore a re hlokomele le go re godiša.”

Lebaka Leo ka Lona Batswadi ba Aroganago

Gantši bana ba a makala ge batswadi ba arogana ka gobane nako ye ka moka batswadi ba be ba utile mathata a bona. Rachel yo a bego a na le nywaga e 15 ge batswadi ba gagwe ba be ba hlalana o re: “Ke be ke tšhogile. Ka mehla ke be ke nagana gore ba a ratana.” Gaešita le ge ka dinako tše dingwe batswadi ba eba le diphapano, go sa dutše go ka kweša bohloko kudu ge ba arogana!

Mabakeng a mantši, batswadi ba arogana ka baka la ge yo mongwe wa bona a na le molato wa boitshwaro bjo bo gobogilego bja tša botona le botshadi. Ka tlase ga maemo ao, Modimo o dumelela molekane yo a se nago molato gore a ka hlala gomme a lokologa go tsena lenyalong gape. (Mateo 19:9) Mabakeng a mangwe, “pefelo, mašata le polelo e gobošago” di feleleditše ka bošoro, tša dira gore motswadi yo mongwe a boifele bophelo bja gagwe le bja bana ba gagwe.—Baefeso 4:31.

Ke therešo gore banyalani ba bangwe ba arogana ka mabaka a sa rego selo. Go e na le gore ba rarolle mathata a bona, ba bangwe ka boithati ba hlalana ka gobane ba re “ga se ba thaba” goba “ga ba sa ratana.” Se ga se thabiše Modimo, yoo ‘a hloilego tlhalo’ ya mohuta woo. (Maleaki 2:16) Jesu o ile a bolela gore malapa a ka ba le mathata ge molekane yo mongwe a eba Mokriste.—Mateo 10:34-36.

 Go sa šetšwe gore boemo ke bofe, taba ya gore batswadi ba gago ba kgethile go se bolele selo goba go fo go nea dikarabo tšeo di sa kwagalego gabotse mabapi le go hlalana ga bona, seo ga se bolele gore ga ba go rate. Ka ge batswadi ba gago ba tla be ba šeditše go kwa ga bona bohloko, ba ka fo hwetša go le thata go bolela ka go hlalana ga bona. (Diema 24:10) Le gona ba ka hwetša go le thata goba go leša dihlong go dumela gore bobedi bja bona ba paletšwe.

Seo o ka se Dirago

Tseba dilo tšeo o di boifago. Ka ge go hlalana ga batswadi go ka fetoša bophelo bja gago, o ka ikhwetša o tshwenyega ka dilo tšeo nakong e fetilego o bego o di tšeela fase. Lega go le bjalo, o ka kgona go laola dilo tšeo o di boifago ka gore o thome pele ka go di tseba. Ka mo tlase, tsenya leswao le ✔ kgauswi le selo seo o se boifago kudu, goba o ingwalele seo o se boifago kgauswi le moo go ngwadilwego gore “Se sengwe.”

□ Motswadi wa ka yo mongwe le yena o tla ntlogela.

□ Lapa lešo le ka se be le tšhelete e lekanego go ka iphediša.

□ Ka tsela e itšego go hlalana ga batswadi ba ka ke molato wa ka.

□ Ge e ba ke tsena lenyalong, lenyalo la ka le ka se atlege.

□ Se sengwe ․․․․․

Bolela ka dilo tšeo di go tshwenyago. Kgoši Solomone o boletše gore go na le “nako ya go bolela.” (Mmoledi 3:7) Ka gona leka go lemoga nako e swanetšego ya go ahlaahla le batswadi ba gago dilo tšeo o di boifago tše o di swailego ka mo godimo. Ba botše kamoo o nyamilego goba o gakanegilego ka gona. Mohlomongwe ba tla kgona go go hlalosetša seo se diregago, ka go re’alo seo sa fokotša go tshwenyega ga gago. Ge e ba batswadi ba gago ba sa rate goba ba sa kgone go go nea thekgo yeo o e nyakago ka nako yeo, o ka kgona go bolela le mogwera yo a godilego tsebong wa mo ntšhetša sa mafahleng. Gata mogato wa pele wa gore o tsome motho yo bjalo. Go fo ba le motho yo a tlago go go theetša go ka go imolla kudu.—Diema 17:17.

 Go feta tšohle, o ka theetšwa ke Tatago wa legodimong, yena “Mokwi wa thapelo.” (Psalme 65:2) Mo tšhollele seo se lego ka pelong ya gago, ‘ka gobane o a go hlokomela.’—1 Petro 5:7.

Seo o sa Swanelago go se Dira

O se ke wa boloka sekgopi. Daniel yo a tsopotšwego pejana o re: “Batswadi ba ka ba be ba na le boithati. Ruri ga se ba ka ba nagana ka rena le kamoo seo ba se dirilego se bego se tla re kgoma ka gona.” Maikwelo a Daniel a a kwagala le gona e ka ba e le therešo. Eupša o be o ka araba bjang dipotšišo tše di latelago? Ngwala dikarabo tša gago mothalading wo o lego ka tlase ga potšišo e nngwe le e nngwe.

Daniel a ka be a ile a welwa ke kotsi efe ge nkabe a ile a gana go kgaotša go befelwa le go boloka sekgopi? (Bala Diema 29:22.) ․․․․․

Gaešita le ge go ka ba thata, ke ka baka la’ng e ka ba mo gobotse gore Daniel a leke go lebalela batswadi ba gagwe bakeng sa bohloko bjoo ba mo kwešitšego bjona? (Bala Baefeso 4:31, 32.) ․․․․․

Therešo ya motheo yeo e lego go Baroma 3:23 e ka thuša Daniel bjang gore a be le pono e nepagetšego ka batswadi ba gagwe? ․․․․․

Phema mekgwa yeo e tlago go go gobatša. Denny o gopola gore: “Ke be ke se ka thaba e bile ke gateletšegile ge batswadi ba ka ba be ba hlalana. Ke ile ka thoma go ba le mathata sekolong gomme ngwageng o mongwe ka se ke ka atlega dithutong tša ka. Ka  morago ga moo . . . ka fetoga rametlae wa ka klaseng ka ba ka lwa le batho ba bantši.”

O nagana gore Denny o be a leka go dira’ng ka go ba rametlae wa ka klaseng? ․․․․․

Ke ka baka la’ng a ka ba a ile a thoma go lwa le batho ba bantši? ․․․․․

Ge e ba o kile wa ikwa o nyaka go kweša batswadi ba gago bohloko ka gore o itshware gampe, molao wa motheo wo o lego go Bagalatia 6:7 o tla go thuša bjang gore o be le pono e nepagetšego? ․․․․․

 Seo o ka se Letelago Nakong e Tlago

Go gobala ka tsela ya kgonthe, bjalo ka go robega lerapo, go ka tšea dibeke goba gaešita le dikgwedi gore go fole ka mo go feletšego. Ka mo go swanago, go gobala maikwelong go tšea nako go fola. Ditsebi tše dingwe di nagana gore bohloko bjo bogolo bja ka morago ga go hlalana ga batswadi bo fola ka morago ga nywaga e meraro. Yeo e ka bonagala eka ke nako e telele, eupša gopola gore go swanetše gore go direge dilo tše dintši pele bophelo bja gago bo ka tsepama.

Gare ga dilo tše dingwe, tsela ya bophelo ya ka gae yeo e šarakantšwego ke go hlalana ga batswadi e swanetše go beakanywa lefsa. Le gona go tla feta nako pele batswadi ba gago ba ka fola maikwelong. Ke feela ka yona nako yeo moo mafelelong ba tlago go kgona go go nea thekgo yeo o e nyakago. Lega go le bjalo, ge bophelo bja gago bo thoma go boela sekeng, o tla thoma go ikwa gabotse gape.

BALA KA MO GO OKETŠEGILEGO MABAPI LE TABA YE GO BOLUMO 2, KGAOLO 25

KGAOLONG YA RENA YEO E LATELAGO

Na o ikwa o tshwenyegile ka gobane motswadi wa gago a tsene lenyalong gape? O ka lebeletšana bjang le seo ka katlego?

LENGWALO LA BOHLOKWA

‘Go na le nako ya go alafa.’—Mmoledi 3:1, 3.

KELETŠO

Ge e ba batswadi ba gago ba hlalane, o tee wa bona goba bobedi bja bona ba dirile diphošo. Leka go tseba gore diphošo tšeo ke dife gore o tle o pheme go di dira ge e ba o kgetha go tsena lenyalong nakong e tlago.—Diema 27:12.

NA O BE O TSEBA . . . ?

Go se thabe lenyalong ga se selo seo o se hwetšago e le leabela go tšwa go batswadi ba gago.

KGATO YEO KE TLAGO GO E TŠEA!

Nka bolela dilo tšeo ke di boifago le (ngwala leina la motho yo a godilego tsebong yo o ka ratago go bolela le yena) ․․․․․

Ge e ba ke ikwa ke nyaka go kweša batswadi ba ka bohloko ka gore ke itshware gampe, nka kgona go laola seo ge e ba ke dira se se latelago: ․․․․․

Seo ke tlago go botšiša motswadi wa ka goba batswadi ba ka ka taba ye ke gore ․․․․․

O NAGANA ENG?

● Ke ka baka la’ng batswadi ba gago ba ka dikadika go bolela le wena ka go hlalana ga bona?

● Ke ka baka la’ng e le gabohlokwa go gopola gore tlhalo ke go se kwane ga batswadi ba gago, e sego go se kwane le wena?

[Ntlhakgolo go letlakala 32]

“Ka morago ga ge mma a re tlogetše, ke be ke gate-letšegile e bile ke lla letšatši le lengwe le le lengwe. Eupša ke be ke rapela gantši, ke dula ke swaregile ka go thuša ba bangwe le go dula ke le kgauswi le bagwera bao ba godilego tsebong. Ke nagana gore ka ditsela tšeo, Jehofa Modimo o ile a nthuša go le-beletšana le boemo bja ka ka katlego.”—Natalie

[Seswantšho go letlakala 33]

Go lebala ka go hlalana ga batswadi ba gago go swana le go fola ge o robegile letsogo—mogato wa gona o bohloko, eupša mafelelong o tla fola