Di kitima ka lebelo gomme ditlhako tša tšona di dira lešata le legolo. Dipere tše nne tše matla le banamedi ba tšona di bopa seswantšhokgopolo seo se tagilego moo go bonagalago eka di tla tloga di taboga matlakaleng a Beibele! Pere ya pele ke e tšhweu, gomme monamedi wa yona ke kgoši ya letago yeo e sa tšwago go bewa sedulong sa bogoši. Ka morago ga yona go tšwelela pere ya mmala wa mollo, yeo monamedi wa yona a dirago gore go se sa ba le khutšo lefaseng ka moka. Go latela pere ya boraro, ya mmala o moso wo e kego ke bošegogare. Monamedi wa yona o swere sekala ka seatleng ge go dutšwe go goeletšwa molaetša o sa kgahlišego wa mabapi le tlala. Pere ya bone ke ya mmala o mosehla, yeo e swantšhetšago bolwetši le dikotsi tše dingwe, yeo monamedi wa yona a bitšwago Lehu. Ke moka e latelwa ke Bodulabahu, e lego lebitla leo le tlwaelegilego, moo maphelo a batho ba bantši a felelago gona!​—Kutollo 6:1-8.

“Mathomong ge ke be ke bala ka banamedi ba bane ba dipere ke be ke tšhogile. Ke be ke bona eka Letšatši la Kahlolo le be le le kgauswi kudu le gore ka ge ke be ke se ka itokiša, ke be nka se phologe.”​—Crystal.

“Ke be ke kgahlilwe ke banamedi ba moswananoši ba bane ba dipere tša mebala yeo e fapanego. Ka morago ga gore ke kwešiše seo se bolelwago ke pono ye, taba ye ile ya thoma go kwagala.”​—Ed.

Na o ikwa go swana le kamoo Crystal a ilego a ikwa ka gona mabapi le banamedi ba bane ba dipere tša Kutollo? Goba na o ikwa go swana le Ed? Go sa šetšwe gore o ikwa bjang, go kata ga dipere tša banamedi bao ke e nngwe ya ditiragalo tšeo di tsebegago kudu tša Kutollo, e lego puku ya mafelelo ya ka Beibeleng. Na o be o tseba gore o ka holega ka go kwešiša seo se bolelwago ke pono ye? Bjang? Modimo o holofetša gore o ka thaba e le kgonthe ge o ka bala, wa ithuta le go phela ka go dumelelana le seo se ngwadilwego pukung yeo ya boporofeta.​—Kutollo 1:1-3.

Le ge ba bangwe ba tšhošwa ke pono ya banamedi ba bane ba dipere, morero wa pono ye ga se go go tšhoša. Ge e le gabotse, pono ye e matlafaditše tumelo ya batho ba bantši e bile e ba thušitše go ba le kholofelo ya bokamoso bjo bo botse. Le wena e ka go hola. Hle tšwela pele ka go bala.