Pele o ka thoma modiro le ge e le ofe, ka tlwaelo o ka ipotšiša gore: ‘O tla nkhola ka eng?’ Lega go le bjalo, na go botšiša se mabapi le thapelo ke go bontšha boithati? Ga se gore go bjalo. Ka tlhago re nyaka go tseba ge e ba re tla holega. Gaešita le monna yo a lokilego Jobo o ile a botšiša gore: “Ge e ba . . . nka mmitša, na . . . a ka nkaraba?”—Jobo 9:16.

Dihlogong tše di fetilego, re ahlaahlile bohlatse bja gore thapelo ga e fo ba tirelo ya bodumedi goba mohuta o itšego wa kalafo ya tša monagano. Modimo wa therešo o tloga a theetša dithapelo. Ge e ba re rapela ka tsela e amogelegago e bile re rapelela dilo tše di swanetšego, gona o tla di šetša. Ge e le gabotse, o re kgothaletša gore re mmatamele. (Jakobo 4:8) Ka gona, re ka letela’ng ge re ka dira gore thapelo e be karolo ya bophelo bja rena? Anke re hlahlobeng mehola e sego kae feela.

Ge o welwa ke mathata le ditlhohlo bophelong bja gago, na o ikwa o imetšwe ke dipelaelo? Beibele e re kgothaletša gore re ‘rapele ka mehla’ dinakong tše di swanago le tše gomme re ‘tsebiše Modimo dikgopelo’ tša rena. (1 Bathesalonika 5:17; Bafilipi 4:6) Beibele e re kgonthišetša gore ge e ba re ka rapela Modimo, gona “khutšo ya Modimo yeo e fetago kwešišo yohle ya batho e tla diša dipelo tša [rena] le matla a [rena] a monagano.” (Bafilipi 4:7) Re ka hwetša tekanyo e itšego ya khutšo ge re ka tšhollela Tatago rena wa legodimong dilo tšeo di re tshwenyago. Ge e le gabotse, o re kgothaletša go dira sona seo. Psalme 55:22 e re: “Lahlela maima a gago go Jehofa, gomme yena o tla go thekga.”

Batho ba bantši lefaseng ka moka ba ile ba ba le khutšo ye. Hee Ran, wa kua Korea Borwa, o re: “Le ge ke na le mathata a magolo, gateetee ge ke rapela ka ona,  ke ikwa ke imologile le gona ke ikwa ke na le matla a go kgotlelela.” Cecilia, wa kua Philippines, o anega ka gore: “Ka ge ke le mma, ke dula ke tshwenyega kudu ka barwedi ba ka le mma wa ka, yoo ga bjale a se sa ntsebago. Eupša ka baka la thapelo, ke kgona go tšwela pele ka bophelo bja ka bja letšatši le letšatši ke sa tshwenyege gakaalo. Ke a tseba gore Jehofa o tla nthuša gore ke ba hlokomele.”

Na o lebeletšane le kgateletšego e šoro, mohlomongwe e le yeo e beago bophelo kotsing goba maemo a šoro kudu? Go rapela “Modimo wa khomotšo yohle” go ka go tlišetša kimologo e kgolo kudu. Beibele e bolela gore o ‘re homotša ditlaišegong tša rena tšohle.’ (2 Bakorinthe 1:3, 4) Ka mohlala, lebakeng le lengwe ge Jesu a be a gateletšegile kudu, o ile “a khunama  gomme a rapela.” Mafelelo e bile afe? Beibele e re: “Morongwa yo a tšwago legodimong [o ile] a iponagatša go yena gomme a mo matlafatša.” (Luka 22:41, 43) Monna yo mongwe yo a botegago, e lego Nehemia, o ile a tšhošetšwa ke batho ba babe bao ba ilego ba leka go mo thibela go dira modiro wa Modimo. O ile a rapela ka gore: “Bjale wena Modimo, anke o matlafatše diatla tša ka.” Ditiragalo tšeo di latetšego di bontšha gore Modimo o tloga a ile a mo thuša go fenya poifo ya gagwe gomme a atlega modirong wa gagwe. (Nehemia 6:9-16) Reginald, wa kua Ghana, o hlalosa phihlelo ya gagwe ka thapelo ka gore: “Ge ke rapela, kudukudu dinakong tšeo ke imetšwego ke mathata, ke ikwa ke boditše motho yo a ka nthušago ka bothata bja ka e bile e le yo a kgonthišetšago gore ke se boife selo.” Ee, Modimo a ka re homotša ge re mo rapela.

Diphetho tšeo re di dirago di ka kgoma rena le baratiwa ba rena sa ruri. Re ka dira bjang diphetho tše bohlale? Beibele e re: “Ge e ba mang le mang wa lena a hloka bohlale [kudukudu ge a lebeletšane le meleko], a a tšwele pele a kgopela Modimo, gobane o fa bohle kudu ka ntle le go goboša; o tla bo newa.” (Jakobo 1:5) Ge re ka rapelela bohlale, Modimo a ka diriša moya wa gagwe o mokgethwa go re hlahla gore re dire diphetho tše bohlale. Ge e le gabotse, re ka kgopela moya o mokgethwa ka go lebanya ka gobane Jesu o re kgonthišetša gore “Tate yo a lego legodimong o tla nea . . . moya o mokgethwa go bao ba mo kgopelago!”—Luka 11:13.

Jesu le yena o be a bona go nyakega gore a kgopele Tatagwe gore a mo thuše ge a be a dira diphetho tše bohlokwa. Beibele e re botša gore ge a be a nyaka go kgetha banna ba 12 bao e bego e tla ba baapostola ba gagwe, o ile “a fetša bošego ka moka a rapela Modimo.”—Luka 6:12.

Go swana le Jesu, ba bantši lehono ba ile ba kgodišega ka morago ga gore ba bone kamoo Modimo a ilego a arabela ka gona ge ba kgopela gore a ba thuše go dira diphetho tše bohlale. Regina, wa kua Philippines, o hlalosa mathata a fapafapanego ao a ilego a lebeletšana le ona, a bjalo ka go itlhokomela le go hlokomela ba lapa la gagwe ka morago ga lehu la monna wa gagwe, go lahlegelwa ke mošomo le go thatafalelwa ke go godiša bana ba gagwe. Ke’ng seo se mo thušitšego go dira diphetho tše bohlale? O re: “Ke ithekga ka thušo ya Jehofa ka go rapela.” Kwabena, wa kua Ghana, o hlalosa lebaka leo a ilego a kgopela Modimo gore a mo thuše ka gore: “Ke ile ka lahlegelwa ke mošomo wo o nago le tšhelete e ntši wa tša go aga.” Ge a bolela mabapi le ge a be a nagana ka seo a ka se dirago, o re: “Ke ile ka dula ke rapelela tlhahlo ya Jehofa gore ke dire phetho ya maleba.” O oketša ka gore: “Ke tloga ke nagana gore Jehofa o ile a nthuša go kgetha modiro woo o nthušago gore ke itlhokomele moyeng le nameng.” Le wena o ka hwetša tlhahlo ya Modimo ka go rapelela dilo tšeo di ka kgomago tswalano ya gago le yena.

Re ahlaahlile dilo tše sego kae feela tšeo thapelo e ka go direlago tšona. (Bakeng sa mehlala e oketšegilego, bona lepokisi le le rego, “ Mehola ya Thapelo.”) Eupša e le gore o hwetše mehola ye, o swanetše go thoma ka go tseba Modimo le thato ya gagwe. Ge e ba e le seo o se nyakago, re go kgothaletša gore o kgopele Dihlatse tša Jehofa gore di go thuše go ithuta Beibele. * Ye e ka ba kgato ya gago ya pele ya gore o batamele kgauswi le “Mokwi wa thapelo.”—Psalme 65:2.