Go tloga mehleng ya bogologolo, batho ba be ba dutše ba lora kamoo go ka kgahlišago ka gona gore motho a dule e le yo mofsa e bile a phetše gabotse mmeleng ka mo go sa felego. Lega go le bjalo, ka manyami therešo e sa thabišego še: Re a hwa. Mantšu ao a lego ka mo godimo a Jobo, ao a boletšwego nywageng e ka godimo ga e dikete tše tharo e fetilego, a sa šoma le lehono.

Kganyogo ya go phela ka mo go sa felego ke e matla e bile ke ya batho bohle. Beibele e re botša gore Modimo o tsentše ka dipelong tša rena kganyogo ya bosafelego gotee le kganyogo ya go bo kwešiša. (Mmoledi 3:11) Ka ge go le bjalo, na o bona e le mo go kwagalago gore Modimo yo lerato o be a ka tsenya ka go rena kganyogo yeo e ka se kego ya kgotsofatšwa? Ge e ba karabo ya gago e le aowa, gona o nepile. Lentšu la Modimo le bitša lehu gore ke lenaba gomme le holofetša gore lenaba leo ‘le tlo fedišwa.’—1 Bakorinthe 15:26.

Ga go na pelaelo gore lehu ke lenaba. Ga go na motho yo a nago le tlhaologanyo yo a ka le amogelago. Ge kotsi e etla, re a e efoga, re a ikuta goba re a tšhaba. Ge re babja, re tsoma ditsela tša gore re fole. Re dira sohle seo re ka se kgonago go phema dilo tše di ka re bakelago gore re hwe.

Na go na le lebaka le ge e le lefe la go dumela gore lenaba le la kgalekgale le tla fedišwa? Ee, le gona. Jehofa Modimo, yena Mmopi, ga se a bopela batho gore ba fo phela nywaga e sego kae ke moka ba hwe. Go hwa ga batho e be e se karolo ya morero wa gagwe wa mathomong. O be a rerile gore batho ba phele ka mo go sa felego mo lefaseng, gomme o phetha seo a se rerilego.—Jesaya 55:11.

Ka gona, lehu le tla fedišwa bjang? Go theoša le histori, batho ba be ba dutše ba katana le go rarolla bothata bja lehu, eupša ga se ba atlega. Le lehono, batho ba sa phegelela go rarolla bothata bjoo. Borathutamahlale ba hlamile meento le dihlare tšeo di fentšego malwetši a mangwe. Ba hlahlobišišitše kagego ya dikarolwana tša leabela tša diphedi. Mafelong a mantši, lehono batho ka kakaretšo ba phela nako e teletšana go feta nywageng e lekgolo e fetilego. Lega go le bjalo, lehu le kgole le go fenywa, ka ge Beibele e bolela gore “ka moka di boela leroleng.”—Mmoledi 3:20.

Ditaba tše dibotse ke gore ga go nyakege gore re ithekge ka bokgoni bja batho bja go hlama dilo tša go rarolla bothata bjo bjoo e lego kgale bo le gona. Jehofa Modimo o šetše a re diretše thulaganyo ya go re phološa goba go re hlakodiša lehung, gomme motho yo a kgathago tema ya motheo thulaganyong yeo ke Jesu Kriste.