Batho ba dimilione lefaseng ka moka ba dumela gore Mmušo wa Modimo ke wona o dirago gore ba be le kholofelo ka bokamoso. Ba latela mohlala wa Jesu, yo a rutilego balatedi ba gagwe gore ba rapele ba re: “Mmušo wa gago a o tle. Thato ya gago a e dirwe mono lefaseng.”—Mateo 6:10, Phetolelo ya Kgale.

Se se makatšago ke gore le ge batho ba bantši ba kgahlegela Mmušo wa Modimo e le ka kgonthe, fela madumedi a mantši a bonagala a se na taba le wona. Tabeng ye, radihistori H. G. Wells o boletše kamoo go lego bohlokwa gore Jesu o ile a “[phagamiša] thuto yeo a ilego a e bitša ka gore ke Mmušo wa Legodimo,” le gona Wells o boletše gore thuto ye “[ga e] šetšwe . . . thutong ye e rutwago ke bontši bja dikereke tša Bokriste.”

Ka go se swane le dikereke tšeo, Dihlatse tša Jehofa di bolela kudu ka Mmušo wa Modimo. Ela hloko se: Makasine wa rena, woo o o balago ga bjale, o gatišwa ka maleme a 220. Go gatišwa dikopi tše e nyakilego go ba tše dimilione tše 46 tša tokollo e nngwe le e nngwe, e lego seo se dirago gore e be makasine wo o abjago kudu go feta dimakasine tše dingwe ka moka lefaseng. Le gona molaetša o mogolo wa makasine wo ke ofe? Ela hloko sehlogo sa wona se se feletšego: Morokami o Tsebatša Mmušo wa Jehofa.  *

Ke ka baka la’ng Dihlatse tša Jehofa di dira maiteko a magolo gakaakaa gore di tsebatše Mmušo wa Modimo? Lebaka ke gore re dumela gore Mmušo wa Modimo ke molaetša o mogolo wa puku e bohlokwahlokwa mo lefaseng, e lego Beibele. Go oketša moo, re kgodišegile gore Mmušo wa Modimo ke tharollo e nnoši ya kgonthe ya mathata ao batho ba lebeletšanego le ona lehono.

Ka go lebiša tlhokomelo Mmušong wa Modimo, Dihlatse tša Jehofa di katanela go ekiša mohlala wa Jesu. Ge Jesu a be a sa le lefaseng, Mmušo wa Modimo e be e le selo sa bohlokwa bophelong bja gagwe e bile e le sehlogo se bohlokwa kudu sa bodiredi bja gagwe. (Luka 4:43) Ke ka baka la’ng Mmušo o be o le bohlokwa kudu go Jesu? Le gona o ka bolela’ng go wena? Re go laletša gore o ele hloko dikarabo tša Beibele, ka ge di ahlaahlwa dihlogong tše di latelago.