Ka moka ga rena re nagana ka bokamoso. Re ipotšiša gore bophelo bo re swaretše eng gotee le baratiwa ba rena. Re botšiša dipotšišo tše swanago le tše: ‘Na bana ba ka ba tla phela lefaseng le lekaone? Na lefase le tla fedišwa ka masetlapelo? Na go na le seo nka se fetošago gona bjale gore ke kaonefatše bokamoso bja ka?’ Go nyaka go tseba moo ke karolo ya bophelo bja rena; ka tlhago re kganyoga gore re kgonthišetšwe ka dilo, re kgodišege, go be le taolo le go tsepama ga dilo. Ge o be o ka kgodišega kutšwanyana ka bokamoso, o be o tla itokišeletša bjona mmeleng gotee le maikwelong.

Ka gona, bokamoso bja gago bo go swaretše eng? Na go na le motho yo a ka tsebago? Tše dingwe tša dipolelelopele tša ditsebi tše di lekago go bolela e sa le pele ka bokamoso di atlegile eupša le tše di dintši di paletšwe. Lega go le bjalo, go thwe Modimo a ka bolela e sa le pele ka nepo ka ditiragalo tšeo di sa tlago. Lentšu la gagwe le re: “[Ke nna] yo a bolelago go tloga mathomong dilo tša mafelelo, le yo a bolelago go tloga kgale dilo tšeo di sešogo tša dirwa.” (Jesaya 46:10) Modimo o atlegile go fihla kae?

Ke ka baka la’ng o swanetše go kgahlegela taba ya gore diporofeto tša Modimo tša bogologolo di nepagetše gakaaka’ng? Go ba gona, ge o be o ka hwetša gore moakanyetši wa boemo bja leratadima o tšea nako e telele a nepile letšatši le lengwe le le lengwe, o be o tla kgahlega. Mohlomongwe o be o tla šetša seo a se akanyeditšego ka boemo bja leratadima bja letšatšing le le latelago. Ka tsela e swanago, ge o be o ka tseba gore Modimo o boletše e sa le pele ka ditiragalo tšeo di phethagetšego ka mo go feletšego, ga go pelaelo gore o be o tla kgahlwa ke seo a se bolelago e sa le pele ka bokamoso bja gago.

GO FEDIŠWA GA MOTSE O MOGOLO:

Ka mohlala, e be e tla ba selo se segolo go bolela e sa le pele ka nepo gore motse o mogolo, wo o tšerego nywagakgolo e mentši e le o matla, o be o tla tloga o phuhlama. Modimo o ile a bolela e sa le pele a diriša yo mongwe wa baboleledi ba  gagwe ka selo se bjalo—go fedišwa ga Ninife. (Tsefanya 2:13-15) Ke’ng seo boradihistori ba lefase ba se begilego? Lekgolong la bošupa la nywaga B.C.E., mo e ka bago nywaga e 15 ka morago ga ge Modimo a ile a bolela e sa le pele, Bababilona le Bamede ba ile ba hlasela Ninife le go e fenya. Go oketša moo, Modimo o be a boletše e sa le pele ka go lebanya gore motse wa Ninife e be e tla ba “mašope, xwa ôma bo-ka lehanata.” (Beibele ya Sepedi) Na polelelopele ye e ile ya phethagala? Ee. Gaešita le ge motse le metsana ya wona e be e ikadile nageng e lekanago disekwerekhilomithara tše 518, bafenyi ba motse ga se ba ka ba o šireletša le go o diriša, ka ge go be go ka letelwa gore ba dire bjalo. Go e na le moo, ba ile ba o fediša. Na go na le mosekaseki le ge e le ofe wa dipolitiki yo a bego a ka bolela e sa le pele ka ditiragalo tšeo ka go nepagala mo go bjalo?

MARAPO A BATHO A TLA FIŠWA:

Ke mang yo a bego a ka ba le sebete se sekaalo sa go tsebiša​—nywageng e 300 e sa le pele—​leina le lešika le le lebanyago tlwaa la motho yo a bego a tla fiša marapo a batho aletareng, gotee le leina la motse woo aletare e bego e tla ba go wona? Ge e ba polelelopele e bjalo yeo e sa tlwaelegago e ile ya phethagala, ga go pelaelo gore e be e tla dira gore motho yo a e dirilego a tume. Mmoleledi wa Modimo o ile a tsebiša gore: “Go tlo belegwa morwa ntlong ya Dafida, yoo leina la gagwe e tlago go ba Josia . . . , e bile o tla fišetša marapo a batho” aletareng yeo e lego motseng wa Bethele. (1 Dikgoši 13:1, 2) Mo e ka bago nywagakgolo e meraro ka morago, kgoši yeo e bitšwago Josia​—e lego leina leo le sa tlwaelegago la ka Beibeleng—​e ile ya tšwa lešikeng la Dafida. Josia o ile a romela molaetša gore “go tšewe marapo mabitleng ao gomme a fišetšwe aletareng” yeo e bego e le Bethele, feela bjalo ka ge go boletšwe e sa le pele. (2 Dikgoši 23:14-16) Motho o be a ka bolela bjang e sa le pele ka ditaba tše di lebanyago gakaakaa ka ntle le ge a be a ka hlahlwa ke mothopo wo o phagametšego motho?

GO FELA GA MMUŠO:

Go be go tla makatša ge motho a be a ka bolela ka go lebanya e sa le pele leina la monna​—kgale le pele a ka belegwa—​yoo a bego a tla rulaganya go menola mmušo o mogolo wa lefase, a ba a bontšha leano leo le sa tlwaelegago leo a bego a tla le diriša. Modimo o ile a tsebiša gore monna yo a bitšwago Korese o be a tla fenya setšhaba seo. Korese yo o be a bile a tla lokolla mathopša a Bajuda le go thekga go agwa lefsa ga tempele ya ona e kgethwa. Go oketša moo, Modimo o ile a bolela e sa le pele gore leano la  Korese la ntwa le be le tla akaretša go gopiša dinoka le go bontšha gore dikgoro di be di tla tlogelwa di ahlame, e lego seo se bego se tla dira gore motse o fenywe. (Jesaya 44:27–45:2) Na ditaba ka botlalo tša boporofeta bja Modimo di ile tša phethagala ka go nepagala? Boradihistori ba dumela gore ge e le gabotse Korese o ile a fenya motse woo. Madira a Korese a ile a dira modiro o mogolo wa bokgoni wa go aroša mekero ya meetse ya Babilona​—ge e le gabotse, wa go gopiša dinoka. Se sengwe ke gore madira a ile a tsena motseng ka dikgoro tšeo di bego di tlogetšwe di ahlame. Ka morago ga moo Korese o ile a lokolla Bajuda gomme a tsebatša gore ba be ba ka aga tempele ya bona lefsa kua Jerusalema. Seo se be se sa tlwaelega ka gobane Korese o be a sa rapele Modimo wa Bajuda. (Esera 1:1-3) Ke mang ge e se Modimo, yo a bego a ka bolela e sa le pele ka ditaba ka botlalo tša ditiragalo tše tša histori?

Re boletše ka mehlala e meraro yeo e bontšhago kamoo Modimo a atlegilego go bolela e sa le pele ka nepo ka ditiragalo tšeo di sa tlago. Tše ga se ditiragalo tšeo di sa tlwaelegago. Moetapele wa Mojuda e lego Joshua o ile a bolela taba yeo batheetši ba gagwe ba bantši ba bego ba e tseba kudu e rego: “Le tseba gabotse ka dipelo tša lena ka moka le ka meoya ya lena ka moka gore ga go le lentšu letee mantšung ka moka a mabotse ao Jehofa Modimo wa lena a le boditšego ona leo le sa kago la phethega. Ka moka a ile a phethega go lena. Ga go lentšu leo le sa kago la phethega.” (Joshua 23:1, 2, 14) Batho ba mehleng ya Joshua ba be ba ka se ganetše go nepagala ga dikholofetšo le diporofeto tša Modimo. Eupša Modimo o dira seo bjang? Ditsela tša Modimo le tša batho di fapana kudu. Go bohlokwa gore o tsebe se ka gobane Modimo o dirile ditsebišo tše dikgolo mabapi le bokamoso bja kgauswinyane bjoo ka ntle le pelaelo bo tlago go go kgoma.

Gantši dipolelelopele tša batho di thewa dilong tše bjalo ka nyakišišo ya tša thutamahlale, go sekasekwa ga dintlha tše di lego gona gotee le maemo, goba gaešita le bathong bao ba ipolelago gore ba na le tsebo e phagametšego ya tlhago. Ka morago ga go dira dikakanyetšo tša bona, ka tlwaelo batho ba a dula ba phutha matsogo gomme ba letela go bona gore go tla direga eng.​—Diema 27:1.

Ka go se swane le batho, Modimo yena o tseba dintlha ka botlalo. O kwešiša ka botlalo dika tša batho gotee le tshekamelo ya bona; ka baka leo, ge e ba a kgetha go dira bjalo, Modimo a ka kgona go bona gabotse e sa le pele kamoo batho le ditšhaba tšeo di feletšego ba tlago go dira dilo ka gona. Eupša Modimo a ka dira se se fetago seo. O kgona le go laola le go fetoša dilo le maemo go kgonthišetša gore go phethagale seo a se nyakago. O re: “Lentšu la ka le le tšwago molomong wa ka . . . le ka se boele go nna le le feela, . . . [le tla] atlega ka seo ke le rometšego sona.” (Jesaya 55:11) Ka gona, ka tsela e itšego tše dingwe tša dipolelelopele tša Modimo di swana kudu le ditsebišo. O dula a kgonthišetša gore o boloka pego e phethagetšego ya dilo tše di phethagalago.

Na go na le polelelopele yeo e ka botwago yeo e akaretšago bokamoso bja gago le bja baratiwa ba gago? Ge e ba o ka tseba e sa le pele ka ledimo leo le tlago, o ka gata kgato yeo e phološago bophelo. O ka arabela ka tsela e swanago le ka boporofeta bja Beibele. Modimo o tsebišitše gore kgauswinyane go tla tla diphetogo tše dikgolo tša lefase ka moka. (Bona lepokisi le le rego, “ Seo Modimo a se Utolotšego ka Bokamoso.”) Bokamoso bjo bo tloga bo fapane le seo ba bantši bao go thwego ke ditsebi ba se akanyetšago.

Mo gongwe o ka nagana se ka tsela ye: Taba ya lefase le e na le mo e tlago go felela gona. E šetše e ngwadilwe, gomme o ka kgona go bona pheletšo e sa le pele. Modimo o re: “[Ke nna] yo a bolelago go tloga mathomong dilo tša mafelelo, . . . [ke nna] yo a rego: ‘Morero wa ka o tla phethega, gomme ke tla dira tšohle tšeo di nkgahlago.’” (Jesaya 46:10) Wena le ba lapa la gago le ka ba le bokamoso bjo bo kgahlišago. Botšiša Dihlatse tša Jehofa mabapi le seo Beibele e se bolelago ka ditiragalo tšeo di sa tlago. Dihlatse ga se didupe; e bile ga di ipolele gore di kwa mantšu a meoya; le gona ga di na matla le ge e le afe a kgethegilego a go bolela dilo e sa le pele. Ke barutwana ba Beibele bao ba ka go bontšhago dilo tše dibotse tšeo Modimo a lego gare a di rulaganyetšago bokamoso bja gago.