Mo gongwe o ka ipotšiša gore, ‘Ke ka baka la’ng ke swanetše go rapela ge e ba Modimo a tseba dilo ka moka, go akaretša le dikgopolo le dinyakwa tša ka?’ Yeo ke potšišo e kwagalago. Na Jesu ga se a bolela gore Modimo “o tseba gore ke dilo dife tšeo le di nyakago le pele le mo kgopela”? (Mateo 6:8) Kgoši Dafida wa Isiraele ya bogologolo o ile a lemoga seo gomme a ngwala ka gore: “Le ge go se na lentšu lelemeng la ka, wena Jehofa o šetše o tseba tšohle.” (Psalme 139:4) Ka gona, ke ka baka la’ng re swanetše go rapela Modimo? Bakeng sa go araba potšišo yeo, anke re ahlaahleng seo Beibele e se bolelago mabapi le dithapelo tša barapedi ba Modimo. *

Le ge Beibele e bolela gore Jehofa * Modimo o tseba dilo ka moka, e bile e bontšha gore ga a fo kgahlegela go kgoboketša dintlha mabapi le barapedi ba gagwe. (Psalme 139:6; Baroma 11:33) Monagano wa gagwe wo o sa lekanywego ga o swane le memori wa khomphutha wo o bolokago tsebišo ka batho ka tsela e sa bontšhego maikwelo. Ge e le gabotse, Modimo o kgahlwa kudu ke dikgopolo tša rena tša ka garegare ka gobane o nyaka gore re batamele kgauswi kudu le yena. (Psalme 139:23, 24; Jakobo 4:8) Ke ka baka leo Jesu a kgothaleditšego balatedi ba gagwe go rapela, gaešita le ge Tatagwe a tseba dinyakwa tša rena tša motheo. (Mateo 6:6-8) Ge re dutše re tšwela pele re botša Mmopi wa rena dikgopolo tša rena, ke moo re tlago go batamela kgauswi kudu le yena.

Ka dinako tše dingwe, re ka thatafalelwa ke go tseba seo re ka se kgopelago ka go lebanya thapelong. Mabakeng a bjalo, Modimo a ka kgona go bona ka kua ga maikwelo a rena ao re sa a hlalosago, ke moka a diriša go tseba ga gagwe ka botlalo maemo a rena gore a arabele dinyakweng tša rena. (Baroma 8:26, 27; Baefeso 3:20) Ge re lemoga gore Modimo o tsene ditaba gare bophelong bja rena, gaešita le ka ditsela tšeo di sa lemogegego, re ikwa re batametše go yena.

Beibele e re kgonthišetša gore Modimo Ramatlaohle o araba dithapelo tša bahlanka ba gagwe ba botegago, eupša gape e nea mabaka ao ka ona a sa theetšego dithapelo tše dingwe. Ka mohlala, nakong ya ge bošoro bo be bo atile Isiraeleng ya bogologolo, Modimo o ile a laela moporofeta wa gagwe Jesaya gore a botše batho a re: “Gaešita le ge le ka atiša dithapelo, ga ke di theetše; diatla tša lena di tletše madi.” (Jesaya 1:15) Go molaleng gore bao ba hloilego melao ya Modimo goba ba rapelago ka maikemišetšo a fošagetšego ba ka se letele gore Modimo a ba kwe.—Diema 28:9; Jakobo 4:3.

Ka lehlakoreng le lengwe, Beibele e re: “Go sa šetšwe seo re se kgopelago go ya ka thato ya Modimo, Modimo o a re kwa.” (1 Johane 5:14) Lega go le bjalo, na seo se bolela gore Modimo o tla fo nea barapedi ba gagwe dilo ka moka tšeo ba di kgopelago? Ga se gore go bjalo. Ela hloko mohlala wa moapostola Paulo, yo a ilego a kgopela Modimo gararo gore a tloše “mootlwa nameng.” (2 Bakorinthe 12:7, 8) Go ka direga gore Paulo o be a swerwe ke bolwetši bjo bo sa folego bja mahlo. Ruri seo se swanetše go ba se be se mo ferekanya! Paulo o be a filwe mpho ya go fodiša e bile o be a kile a tsoša motho, fela o ile a swanelwa ke go kgotlelela bolwetši bja gagwe. (Ditiro 19:11, 12; 20:9, 10) Gaešita le ge dithapelo tša gagwe di se tša ka tša arabja ka tsela yeo a bego a e nyaka, Paulo o ile a amogela karabelo ya Modimo ka tebogo.—2 Bakorinthe 12:9, 10.

Ke therešo gore dithapelo tša batho ba bangwe bao go bolelwago ka bona ka Beibeleng di ile tša arabja ka mohlolo. (2 Dikgoši 20:1-7) Eupša go be go sa tlwaelega gore di arabje ka tsela yeo, gaešita le mehleng ya Beibele. Badumedi ba bangwe ba be ba tshwenyega ge go be go bonala eka Modimo o be a sa arabe dithapelo tša bona. Kgoši Dafida o ile a botšiša gore: “Ao hle Jehofa, o tla ntebala go fihla neng? Na e tla ba ka mo go sa felego?” (Psalme 13:1) Eupša ge Dafida a be a lemoga kamoo Jehofa a ilego a mo phološa gantši ka gona, monna yo yo a botegago o ile a matlafatša go bota ga gagwe Modimo. Thapelong yona yeo, Dafida o okeditše ka gore: “Ge e le nna ke botile botho bja gago.” (Psalme 13:5) Go fo swana le Dafida, barapedi ba Modimo lehono ba ka swanelwa ke go phegelela thapelong go fihlela ba lemoga gore Modimo o araba dithapelo tša bona.—Baroma 12:12.

Modimo o arabela dinyakweng tša rena tša kgonthe.

Ke mo go kwagalago gore ga se ka mehla batswadi ba botse ba neago bana ba bona selo seo ba se kgopelago ge ba se kgopela. Ka tsela e swanago, Modimo a ka no se arabele dikgopelong tša rena ka tsela yeo re naganago gore o swanetše go arabela ka yona goba ka nako yeo re di letetšego. Eupša re ka kgodišega gore Mmopi wa rena, go swana le tate yo lerato, o tla arabela dinyakweng tša rena tša kgonthe ka nako e swanetšego le ka tsela ya maleba.—Luka 11:11-13.

Modimo a ka araba ka ditsela tše di sa lemogegego.

Lega go le bjalo, go thwe’ng ge e ba re rapelela gore re imollwe bothateng bjo bo sa kgaotšego? Na re swanetše go phetha ka gore ka ge go se na karabo ya mohlolo, Jehofa ga se a araba le gatee? Ka mo go fapanego, re tla dira gabotse ge re ka ela hloko ge e ba Modimo a re thekgile ka ditsela tšeo di sa lemogegego kudu. Ka mohlala, mohlomongwe mogwera yo botho o dirile seo a ka se kgonago go re thuša ka nako ya maleba. (Diema 17:17) Na go ka direga gore Jehofa o tutueditše mogwera yoo yo a tshwenyegilego gore a re thuše? Go oketša moo, Modimo a ka diriša Beibele go araba ge go kgopelwa thušo. Ka go yona re ka hwetša temogo yeo e nyakegago bakeng sa gore re swaragane le boemo bjo thata.—2 Timotheo 3:16, 17.

Go e na le gore Modimo a tlošetše motho bothata, gantši o nea batho ba gagwe matla ao a nyakegago gore ba lebeletšane le bjona. (2 Bakorinthe 4:7) Ka mohlala, ge Jesu a be a kgopela Tatagwe gore a mo tlošetše teko, ka ge a be a boifa gore e be e tla tliša kgobogo leineng la Modimo, Jehofa o ile a romela morongwa gore a matlafatše Morwa wa gagwe. (Luka 22:42, 43) Ka mo go swanago, Modimo a ka diriša mogwera wa kgauswi gore a re nee kgothatšo nakong ya ge re tloga re e nyaka. (Diema 12:25) Ka ge karabo ya mohuta wo e sa lemogege, go ka nyakega gore re be šedi kudu bakeng sa gore re bone tsela yeo Modimo a arabago dithapelo tša rena ka yona.

Dikarabo tše dingwe di swanetše go letela nako ya Modimo.

Beibele e re Modimo Ramatlaohle o gaugela batho ba ikokobeditšego “nakong e swanetšego.” (1 Petro 5:6) Ka gona ge e ba go bonagala eka o diega go araba dikgopelo tša rena tše di tšwago pelong, seo ga se bolele gore Jehofa ga a na taba le rena. Go e na le moo, ka ge Mmopi wa rena yo botho a tseba mo gontši kudu, ga go pelaelo gore o sekaseka dithapelo tša rena go ya ka seo a tsebago gore se tloga se re loketše.

Ka mohlala: Akanya o na le morwa yo monyenyane yo a go kgopelago paesekele. Na o tla fo mo nea yona? Ge e ba o nagana gore ga se a hlwa a eba le boikarabelo ka mo go lekanego go ka ragela paesekele, o ka dira phetho ya go diega go e reka. Lega go le bjalo, ge nako e dutše e eya, o ka mo fa yona ge o tseba gore go dira bjalo go tla ba go mo loketše. Ka tsela e swanago, Modimo a ka nea tše di swanetšego “tše pelo ya [rena] e di kgopelago” ka nako e swanetšego ge e ba re tšwela pele re rapela.—Psalme 37:4.

Beibele e kgothaletša Bakriste ba therešo gore ba se ke ba lahlegelwa ke kholofelo moholeng wa thapelo. Ba bangwe ba ka re, ‘Seo go bonolo go se bolela go e na le go se dira.’ Ke therešo gore ge e ba re be re dutše re kgotleletše bothata bjo bo sa kgaotšego goba mohuta o itšego wa go hloka toka, re ka hwetša re thatafalelwa ke go letela karabo ya Modimo. Lega go le bjalo, re dira gabotse go gopola seo Jesu a se rutilego mabapi le go phegelela thapelong.

Jesu o ile a bolela ka seswantšho sa mohlologadi yo a diilago yo a bego a dula a eya go moahlodi yo a sa lokago gore a yo hwetša toka. (Luka 18:1-3) Gaešita le ge  mathomong moahlodi a be a gana go mo thuša, mafelelong o ile a ipotša gore: “Ke tla bona gore o hwetša toka, e le gore a se ke a dulela go tla gomme a nngamola hlogo ka go nkgopela dilo tše dintši.” (Luka 18:4, 5) Go ya ka taba e dikologilego ya leleme la mathomong, moahlodi o ile a šetša mohlologadi e le gore a se ke a “[mo] otla ka tlase ga leihlo,” goba, a “senya botumo [bja gagwe]” ka tsela ya seswantšhetšo. * Ge e ba gaešita le moahlodi yo a sa lokago, ka baka la go boifa seo ba bangwe ba ka se naganago ka yena, a tla thuša mohlologadi, gona Modimo wa rena yo botho o tla nea gakaakang toka go bao “ba mo goeletšago mosegare le bošego”! Go etša ge Jesu a boletše, Modimo “o tla dira gore toka e dirwe go bona ka bjako.”—Luka 18:6-8.

Gaešita le ge ka dinako tše dingwe re ka lapa go kgopela thušo goba go gaugelwa, ga se ra swanela go hwa matwa. Ge re phegelela thapelong, re bontšha go ba ga kgonthe ga kganyogo ya rena ya go nyaka go bona Modimo a re thuša bophelong bja rena. Gape re ithuta go lemoga go araba ga Modimo dithapelo tša rena, gomme ka go re’alo ra batamela kgauswi kudu le yena. Ee, re ka kgodišega gore Jehofa o tla araba dithapelo tša rena tša kgonthe ge e ba re tšwela pele re kgopela ka tumelo.—Luka 11:9.