Batho ba bangwe ba thatafalelwa ke go rata Modimo. Ba tšea Modimo e le yo go bonagalago go le thata go ka mo kwešiša, a le kgole goba e bile a le sehlogo. Ela hloko ditlhaloso tše di latelago:

• “Ke ile ka rapela Modimo gore a nthuše, eupša ka nako e swanago ke be ke nagana gore o kgole kudu, moo go bonagalago eka a ka se fihlelelege. Ke be ke tšea Modimo e le motho yo a sego gona e bile a se na maikwelo.”—Marco, Italy.

• “Gaešita le ge ke be ke nyaka go hlankela Modimo go tšwa pelong, go be go bonagala a le kgole kudu. Ke be ke nagana gore ke Modimo yo sehlogo yo sa gagwe e lego go re otla. Ke be ke sa dumele gore o na le lerato.”—Rosa, Guatemala.

• “Ge ke be ke sa le ngwana, ke be ke dumela gore Modimo o be a tsomana le diphošo tša rena, a dula a letetše go re otla ge go be go nyakega gore a dire bjalo. Ka morago, ke ile ka mo tšea e le yo a se nago taba le rena. Modimo o be a etša tonakgolo yeo e laolago ditaba tša batho bao e ba bušago—eupša e le yeo e tlogago e se na taba le bona.”—Raymonde, Canada.

O nagana’ng? Na Modimo ke yo a sa rategego? Bakriste ba botšišitše potšišo yeo ka nywagakgolo e mentši. Ge e le gabotse, go kile gwa ba le nako yeo ka yona batho ba bantši ba Bojakaneng ba bego ba sa rapele Modimo Ramatlaohle. Ka baka la’ng? Batho ba be ba mmoifa o šoro. Radihistori Will Durant o beile taba ka tsela ye: “Modiradibe o be a ka tšea kae sebete sa go rapela mmuši yo a boifišago kudu gakaakaa le yo a se nago bogwera?”

Go tlile bjang gore Modimo a lebelelwe e le “yo a boifišago le yo a se nago bogwera”? Ke’ng seo ge e le gabotse Beibele e se rutago ka Modimo? Na go ithuta therešo ka Modimo go ka go thuša gore o mo rate?