TABA YA LETLAKALA LA KA NTLE | BEIBELE E BOLELA KA ENG?
Re Bile Gona Bjang?
Genesi, e lego puku ya mathomo ya Beibele, e hlalosa gabonolo le ka mantšu a sego kae gore legohle le thomile kae, ge e re: “Mathomong Modimo o hlodile magodimo le lefase.” (Genesi 1:1) Ka morago ga gore Modimo a tšweletše dimela le diphoofolo, o ile a bopa batho ba pele e lego Adama le Efa. Ba be ba sa swane le diphoofolo ka gobane batho ba na le tekanyo e itšego ya dika tša Modimo, go akaretša le tokologo ya go ikgethela. Ka baka leo, ba be ba ikarabela bakeng sa ditiro tša bona. Ge nkabe ba ile ba kwa ditaelo tša Modimo, nkabe ba ile ba ba le karolo morerong wa Modimo e le batswadi ba pele ba lapa la batho la lefase ka moka leo le bego le tla thabela bophelo bja khutšo le bjo bo phethagetšego ka mo go sa felego mo lefaseng.
Lega go le bjalo, morongwa yo mongwe, goba sebopiwa sa moya, o ile a diriša sebaka seo gore a ikhole ka batho ka tsela ya boithati. Ka baka leo, o ile a fetoga Sathane, e lego leina leo le bolelago gore “Moganetši.” A bolela ka go diriša noga, Sathane o ile a fora Efa, a mmotša gore o be a tla phela gabotse ka ntle le tlhahlo ya Modimo. Adama le Efa ba ile ba latela Sathane gomme ba senya tswalano ya bona le Mmopi wa bona. Ka baka la kgetho ya bona e mpe, batswadi ba rena ba pele ba ile ba lahlegelwa ke bophelo bjo bo sa felego gomme ba fetišetša sebe, go se phethagale le lehu leo le sa phemegego go rena ka moka.
Di tloga fase, Modimo o ile a bolela boikemišetšo bja gagwe bja go lokiša boemo bjo bjo bo nyamišago le go nea ditlogolo tša Adama tsela ya go hwetša bophelo bjo bo sa felego. Modimo o ile a bolela e sa le pele gore “peu”—motho yo bohlokwa—mafelelong e be e tla fediša Sathane gomme ya tloša tlaišego ka moka yeo Sathane, Adama le Efa ba e bakilego. (Genesi 3:15) “Peu” yeo e be e tla ba mang? Go be go tla bonagala ge nako e dutše e eya.
Go tloga ka nako yeo, Sathane o ile a dulela go leka go folodiša morero wa Modimo o mobotse. Sebe le bokgopo di ile tša ata ka lebelo. Modimo o ile a phetha ka go fediša batho ba kgopo ka meetsefula. O ile a laela Noa wa go loka gore a age areka, e lego lepokisi le legolo leo le bego le tla phaphamala godimo ga meetse, gore a phološe yena le ba lapa la gagwe gotee le diphoofolo tšeo a bego a laetšwe gore a tsene le tšona ka arekeng.
Ka morago ga ngwaga Meetsefula a thomile, Noa le ba lapa la gagwe ba ile ba tšwa ka arekeng ba gata lefaseng leo le hlwekišitšwego. Eupša “peu” e be e sa swanetše go tšwelela.
