Tsogo ya Jesu e ile ya tlatša barutiwa ba gagwe ka kgodišego le phišego. Moapostola Paulo ka mo go kgethegilego o ile a sepela Asia Minor ka moka gotee le tikologo ya Mediterranean, a rulaganya diphuthego le go matlafatša Bakriste gore ba eme ba tiile ge ba lebeletšane le diteko tša boitshwaro le kganetšo e šoro. Go sa šetšwe ditlhohlo tše bjalo, Bokriste bo ile bja gola le go ata.

Paulo o ile a golegwa ka morago. Lega go le bjalo, le ge a be a le moo o ile a ngwala mangwalo a kgothatšo le a keletšo a ngwalela diphuthego tša Bokriste. O ile a lemoša le ka tšhošetšo e kgolo, e lego bohlanogi. Ka ge Paulo a be a hlahlwa ke moya o mokgethwa wa Modimo, o ile a bona e sa le pele gore “diphiri tše di gatelelago” tšeo di bolelago “dilo tše di kgopamego” di be di tla tsena gare ga bona gomme tša ‘goga barutiwa gore ba di šale morago.’—Ditiro 20:29, 30.

Bofelong bja lekgolo la pele la nywaga, bohlanogi bjo bo be bo šetše bo thomile. Mo e ka bago ka yona nako yeo, Jesu yo a tsošitšwego o ile a nea moapostola Johane Kutollo, e lego pono ya seswantšhetšo ka bokamoso. Bjalo ka ge Johane a ile a ngwala nakong yeo, baganetši goba barutiši ba maaka ba be ba ka se thibele Modimo gore a phethagatše ka mo go feletšego morero wa gagwe wa mathomong ka lefase le ka batho. “Ditšhaba tšohle, meloko yohle, maleme ohle le batho bohle” ba tla kwa ditaba tše dibotse mabapi le Mmušo wa Modimo. (Kutollo 14:6) Paradeise e tla tsošološwa lefaseng, gomme yo mongwe le yo mongwe yo a nyakago go dira thato ya Modimo e ka ba karolo ya yona!

Na o kwa seo e le “ditaba tše dibotse”? Ge e ba go le bjalo, ithute mo go oketšegilego ka molaetša wa Modimo bakeng sa batho bjalo ka ge o hwetšwa ka Beibeleng gotee le kamoo o ka go holago ka gona lehono le nakong e tlago.

O ka ipalela Beibele inthaneteng ka maleme ao e ka bago a 50 go www.isa4310.com/nso. Wepesaeteng yeo, o ka hlahloba le poroutšha ya Beibele—E na le Molaetša Ofe? le ya Ditaba tše Dibotse tše di Tšwago go Modimo! gotee le puku ya Ke Eng Seo ge e le Gabotse Beibele e se Rutago? go akaretša le dikgatišo tše dingwe tšeo di ahlaahlago lebaka leo ka lona re ka botago Beibele le kamoo re ka dirišago keletšo ya yona e šomago malapeng a rena gotee le bophelong bja rena. Goba kgopela tsebišo e oketšegilego go motho le ge e le ofe yo e lego Hlatse ya Jehofa.

—E theilwe go Ditiro, Baefeso, Bafilipi, Bakolose, Filemone, 1 Johane le Kutollo.