SEO O KA SE KWAGO: “Modimo o buša lefase, ka gona o baka dikotsi tša tlhago; ka baka leo, o swanetše go ba a le sehlogo.”

SEO BEIBELE E SE BOLELAGO: “Lefase ka moka le rapaletše matleng a yo kgopo.” (1 Johane 5:19) “Yo kgopo” ke mang? Beibele e bontšha gore ke Sathane. (Mateo 13:19; Mareka 4:15) Na seo ga se kwagale? Nagana ka se: Ge e ba Sathane a laola lefase, gona o tutueletša batho gore ba be le boithati, megabaru e bile ba bonele dilo kgauswi go swana le yena. Na seo se ka se thuše go hlalosa lebaka leo batho ba palelwago ke go hlokomela tikologo ya bona mo lefaseng? Ditsebi tše dintši di hlalosa gore go swarwa gampe ga tikologo go ka ba go kgatha tema dikotsing tša tlhago, e ka ba ka go di baka, go di mpefatša goba ka go dira gore batho ba hlaselwe gabonolo ke tšona.

Bjale ke ka baka la’ng Modimo a dumelela Sathane a eba le tutuetšo e kgolo gakaakaa? Karabo ya potšišo ye e re bušetša mathomong a histori ya batho, nakong ya ge batswadi ba rena ba pele ba be ba rabela kgahlanong le Modimo bjalo ka Mmuši. Batho ba bantši ba latetše tsela e swanago ga e sa le go tloga ka nako yeo. Kgetho yeo—go gana go bušwa ke Modimo—e dirile gore lefase la batho le be ka diatleng tša lenaba la Modimo, e lego Sathane. Ka baka leo, Jesu o ile a bitša Sathane “mmuši wa lefase.” (Johane 14:30) Na Sathane o tla buša go ya go ile? Aowa!

Jehofa * ga a hlokomologe tlaišego yeo Sathane a e bakago. Ge e le gabotse, Modimo o kgongwa kudu ke tlaišego ya batho. Ka mohlala, Beibele e bolela ka Modimo mabapi le dinako tše thata tšeo di ilego tša wela setšhaba sa Isiraele gore: “Tlalelong ka moka ya bona le yena o be a tlalelwa.” (Jesaya 63:9) Ka kgaugelo, Modimo o rulagantše go fediša pušo e sehlogo ya Sathane kgauswinyane! O kgethile Morwa wa gagwe, Jesu Kriste, gore e be Kgoši e nago le toka le toko ya ka mo go sa felego.

KAMOO O AKARETŠWAGO KA GONA: Gaešita le ge pušo ya Sathane e paletšwe ke go šireletša batho dikotsing tša tlhago, pušo ya Jesu e tla ba šireletša. Jesu o kile a šireletša barutiwa ba gagwe nakong ya ledimo le lešoro. Pego ya Beibele e re: “A kgalema phefo gomme a re go lewatle: ‘Homola o re tuu!’ Phefo ya okobala, gwa homola gwa re tuu.” Barutiwa ba ile ba re: “Gabotsebotse yo ke mang? Gaešita le phefo le lewatle di a mo kwa.” (Mareka 4:37-41) Tiragalo yeo e re kgodiša gore Jesu o tla šireletša batho ka moka ba kwago nakong ya ge a buša bjalo ka Kgoši.—Daniele 7:13, 14.