O ka Kgetha Bokamoso bjo bo Atlegilego Bjang?

O ka fihlelela bjang bophelo bjo bo atlegilego e le ka kgonthe? Tsela e nngwe ke ka go diriša bokgoni bjo bo makatšago bjo o nago le bjona gore o naganišiše ka mafelelo a nako e telele ao a ka tšwelelago a diphetho tšeo o di dirago gona bjale.

Ke therešo gore o ka thatafalelwa ke go dira diphetho tšeo di ka go holago bophelong bja gago ka moka. Ka baka la’ng? Ka gobane batho ba bantši kudu ba na le kgopolo ya go nyaka go hwetša dilo kapejana. Ka mohlala, o ka ba o lemoga gore go diriša keletšo ya Beibele go ka go thuša go aga ditswalano tše tiilego tša lapa. (Baefeso 5:22–6:4) Eupša gore o dire bjalo, o swanetše gore ka mehla o diriše nako e ntši o ena le lapa la gago, mola o lwantšha kgateletšo ya go nwelela kudu mošomong, boitapološong goba boithabišong. Go swana le dikarolong tše dintši tša bophelo, o swanetše go kgetha magareng ga go ikgotsofatša ka nakwana le go atlega bophelong bja gago ka moka. O ka hwetša bjang matla ao a nyakegago a go dira kgetho e bohlale? Ela hloko megato e latelago e mene.

1 Akanya ka Mafelelo a Diphetho tša Gago

Ge o swanetše go dira phetho, naganišiša ka mafelelo a ka bago gona. Beibele e eletša ka gore: “Yo bohlale ke yo a bonego kotsi a ikuta.” (Diema 22:3) Ge e ba o lebeledišiša mafelelo, mohlomongwe o tla ikwa o tutueletšega go phema tsela yeo e ka bago kotsi. Ka lehlakoreng le lengwe, ge o akanya ka mehola ya nako e telele ya phetho e bohlale, o ka matlafatša boikemišetšo bja gago bja go dira phetho yeo.

Ipotšiše gore: ‘Mafelelo a phetho ya ka e tla ba afe ka morago ga ngwaga goba gaešita le ka morago ga nywaga e 10 goba e 20 go tloga ga bjale? E tla nkgoma bjang maikwelong le mmeleng? Kgetho ya ka e tla kgoma bjang lapa lešo le ba bangwe bao ke tshwenyegago ka bona?’ Sa bohlokwa kudu, ipotšiše gore: ‘Na phetho ya ka e tla kgahla Modimo? E tla kgoma bjang segwera sa ka le yena?’ Ka ge Beibele e buduletšwe ke Modimo, e ka go thuša go lemoga seo se mo kgahlago le go go lemoša ka melaba yeo mo gongwe o ka e tshedišago mahlo.—Diema 14:12; 2 Timotheo 3:16.

2 Itlhahlobele Dikgetho Tšeo o Nago le Tšona

Go e na le gore ba itirele diphetho, ba bantši ba fo ekiša batho bao ba ba dikologilego. Eupša tsela e itšego ya bophelo e ka se lebiše katlegong feela ka gobane e latelwa ke batho ba bantši. Itlhahlobele dikgetho tšeo o nago le tšona. Ela hloko mohlala wa Natalie. * O hlalosa gore: “Ke be ke nyaka go ba lenyalong le lebotse. Eupša ke be ke kgona go bona gore nka se le hwetše go ya ka tsela yeo ke bego ke phela ka yona. Bagwera ba ka ka moka ba kholetšheng e be e le bafsa ba ba kgonago kudu. Lega go le bjalo, ba be ba dula ba dira diphetho tše mpe maphelong a bona. Ba be ba dula ba eba le dikgarebe le masogana a mafsa. Go swana le bona, ke be ke ena le masogana a mmalwa. Tsela ye ya bophelo e be e nkweša bohloko kudu maikwelong.”

Natalie o ile a thoma go ithuta Beibele le Dihlatse tša Jehofa. O re: “Gare ga Dihlatse, ke ile ka bona bafsa bao ba thabilego le manyalo a tiilego. Gaešita le ge go be go se bonolo, ke ile ka fetoša ditekanyetšo tša ka le tsela ya ka ya bophelo ganyenyane-ganyenyane.” Mafelelo  e bile afe? Natalie o re: “Ke be ke dutše ke nyaka go nyalana le motho yoo ke bego ke mo hlompha kudu. Ge nako e dutše e eya, ke ile ka nyalana le monna yoo a nago le ditumelo tše di swanago le tša ka tša bodumedi. Ke nagana gore Modimo o mphile bophelo bja lapa bjo bo phalago bjoo ke bego nka bo nagana le ka mohla.”

3 Eba le Ponelopele

Gore o pheme go naganela kgauswi, o swanetše go ba le pono e nabilego ka bokamoso bjoo o bo nyakago le thulaganyo ya kamoo o tlago go bo fihlelela ka gona. (Diema 21:5) O se ke wa nagana feela ka nywaga e 70 goba e 80 yeo motho a e phelago. Go e na le moo, ipone o thabela bophelo bjo bo sa felego bjoo Beibele e bo hlalosago.

Beibele e hlalosa gore Modimo o dirile tokišetšo ya gore batho ba hwetše bophelo bjo bo sa felego ka sehlabelo sa topollo sa Kriste Jesu. (Mateo 20:28; Baroma 6:23) Modimo o holofetša gore morero wa gagwe wa mathomong ka batho le lefase o tla phethagala kgauswinyane. Bao ba ratago Modimo ba tla hwetša sebaka sa go phela ka mo go sa felego lefaseng le lebotse leo le tsošološitšwego. (Psalme 37:11; Kutollo 21:3-5) O ka hwetša bokamoso bjoo ge e ba o eba le ponelopele.

4 Katanela go Fihlelela Dipakane tša Gago

O ka dira’ng gore o hwetše bokamoso bjoo bjo bo holofeditšwego? Thoma ka go tseba Modimo. (Johane 17:3) Tsebo e nepagetšego ya Beibele e tla aga kgodišego ya gago ya gore dikholofetšo tša Modimo ka bokamoso di tla phethagala. Tumelo e bjalo e tla go matlafaletša go dira diphetogo le ge e le dife tšeo di nyakegago gore o amogelwe ke Modimo.

Ela hloko phihlelo ya Michael. O anega ka gore: “Ke thomile go diriša bjala le dihlaretagi gampe ge ke be ke ena le nywaga e 12. Ke be ke le setho sa sehlopha sa disenyi gomme ke letetše go hwa pele ke eba le nywaga e 30. Kgalefo ya ka gotee le kgakanego di ile tša dira gore ke leke go ipolaya gantši. Ke be ke holofetše go hwetša mo gontši bophelong, eupša ga se ka hwetša selo.” Ge Michael a sa le sekolong se se phagamego, mogwera wa gagwe yo a bego a le sehlopheng sa disenyi le yena o ile a thoma go ithuta Beibele le Dihlatse tša Jehofa. Michael le yena o ile a dumela go ithuta.

Seo Michael a ithutilego sona ka Beibeleng se ile sa fetoša pono ya gagwe ka bokamoso bja gagwe. “Ke ile ka ithuta gore nakong e tlago lefase le tla tsošološwa ya ba paradeise le gore batho ba tla phela ka khutšo, ba sa tshwenyege. Ke ile ka thoma go bona se e le bokamoso bja ka. Ke ile ka ipeela pakane ya go aga tswalano e botse le Jehofa. Lega go le bjalo, ke be ke ewa ke tsoga. Ke ile ka tagwa ka makga a mmalwa gaešita le ka morago ga ge ke thomile go ithuta Beibele. Ke ile ka ba ka robala le ngwanenyana yo mongwe.”

Michael o ile a kgona bjang go fenya dipoelomorago gomme a atlega go fetoša tsela ya gagwe ya bophelo? O re: “Morutiši wa ka wa Beibele o ile a nkgothaletša gore ke bale Beibele letšatši le letšatši le go gwerana le ba bangwe bao ba bego ba nyaka go kgahla Modimo. Ke ile ka lemoga gore bagwera ba ka ba sehlopheng sa disenyi ba be ba sa dutše ba ntutuetša. Gaešita le ge ke be ke ba tšea e le ba lapa lešo, ke ile ka kgaotša segwera sa ka le bona.”

Michael o ile a ipeela dipakane tša nakwana le dilo tšeo di tlago pele bophelong bja gagwe tšeo di ilego tša mo thuša go fihlelela pakane ya gagwe e kgolo ya go dumelelanya bophelo bja gagwe le ditekanyetšo tša Modimo. Le wena o ka dira se se swanago. Ngwala fase pakane ya gago ya nako e telele le megato yeo o ka e tšeago yeo e tlago go go thuša go e fihlelela. Botša bao ba tlago go go thekga gore o ipeetše dipakane dife gomme o ba kgopele gore ba go thuše go lekola kgatelopele ya gago.

O se ke wa diega go ithuta ka Modimo le go diriša tlhahlo ya gagwe bophelong bja gago. Gata megato gona bjale ya go aga lerato la gago la go rata Modimo le Lentšu la gagwe, Beibele. Ge Lentšu la Modimo le hlalosa motho yo a dirišago melao ya motheo ya Beibele le re: “Se sengwe le se sengwe seo a se dirago se tla atlega.”—Psalme 1:1-3.

[Mongwalo wa ka tlase]