Babadi ba Rena ba a Botšiša . . .

Na Batswadi ba Swanetše go Ruta Bana ba Bona ka tša Thobalano?

▪ Batswadi ba bantši ba dira maiteko a magolo a go šireletša bana ba bona gore ba se ke ba fetelwa ke malwetši a kotsi. Batswadi ba swanetše go dira maiteko a swanago go šireletša bana ba bona mekgweng e gobatšago ya boitshwaro. Tsela e nngwe ya go dira bjalo ke ka go ba nea thuto e lekalekanego ka thobalano. (Diema 5:3-23) Tlwaetšo e bjalo ya batswadi le tlhahlo ya boitshwaro di bohlokwa ka gobane bana ba hwetša ditaba tše dintši kudu tše di sa utego selo tša thobalano thelebišeneng le Inthaneteng, ka dipukung gotee le diswantšhong tša metlae.

Moprofesara wa thuto le mongwadi, Diane Levin, o hlalosa ka gore: “Bothata lehono ga se gore bana ba rena ba ithuta ka thobalano. Bothata ke seo ba ithutago sona, nywaga yeo ba ithutago seo ba le go yona le gore ba se rutwa ke mang. Bana ba hwetša thuto e matla le e gobatšago kudu ka thobalano go tšwa go babapatši le mekgweng e tlwaetšwego.”

Batswadi ba swanetše go šireletša bana ba bona diponong tše di kgopamego le tše di gobogilego tšeo di senyago setšhaba. (Diema 5:1; Baefeso 6:4) Bana ba banyenyane ba swanetše go tseba kamoo mebele ya bona e šomago ka gona, kamoo ba ka itlhokomelago ka gona mmeleng le kamoo ba ka itšhireletšago ka gona bathong ba hlokago boitshwaro. Pele a ka tsena mahlalagading—nakong yeo go yona go thomago go tšwelela maswao a kgolo ya tša thobalano—morwedi o swanetše go tseba ka diphetogo tšeo di tlago go direga mmeleng wa gagwe le go kwešiša gore ke ka baka la eng a bona kgwedi le gore seo se direga bjang. Ka mo go swanago, mošemanyana o swanetše go tseba e sa le pele ka dikedišo tša bošego, goba ditoro tša lerato tša go ediša. Ge bana e sa le ba banyenyane, batswadi ba ka thoma go ba ruta maina a maleba a ditho tša mmele. Batswadi ba lerato ba ruta bana ba bona dithuto tše tharo tše bohlokwa mabapi le ditho tše tša mmele: (1) Ke tše kgethegilego e bile di swanetše go utwa. (2) Ga se gwa swanela go bolelwa ka ditho tše gampe. (3) Ga se tša swanela go kgwathwa goba go bonwa ke batho ba bangwe. Ge bana ba dutše ba gola, batswadi ba swanetše go lemoga nako yeo ka yona ba ka hlalosago kamoo mosadi a imago ka gona. *

Batswadi ba swanetše go thoma go ba nea tlhahlo yeo neng? Ba swanetše go thoma ka pela go feta kamoo ba bantši ba naganago. Ngwanenyana a ka bona kgwedi la mathomo a ena le nywaga e lesome goba ya ka tlase ga yeo. Mošemanyana a ka thoma go ediša bošego a sa na le nywaga e 11 goba e 12. Ditiragalo tše tšeo di fetošago bophelo di ka hlakahlakanya bana ge e ba ba sa kwešiše seo se diregago. Bana ba swanetše go kgonthišetšwa e sa le pele gore ga go na seo se fošagetšego ka diphetogo tša tlhago tšeo di diregago mebeleng ya bona. Ye gape ke nako ya go ba thuša go kwešiša mohola le bohlokwa bja go latela ditekanyetšo tša Beibele tša boitshwaro, e lego selo seo mananeo a mantši a lefase a go ruta ka thobalano a palelwago ke go se dira.—Diema 6:27-35.

[Mongwalo wa tlase]