Ke ka Baka la Eng re Swanetše go Phela ka Ditekanyetšo tša Beibele?

NA PONO ya Beibele ka thobalano e šiilwe ke nako e bile ke yeo e thibelago ka mo go sa nyakegego? Aowa. Ka mo go fapanego, pono ya Beibele ka thobalano e ka re thuša go phema:

▪ Malwetši a fetetšwago ka thobalano

▪ Boimana bja ka ntle ga lenyalo

▪ Ditlamorago tše bohloko tša manyalo a thubegilego

▪ Letswalo le molato

▪ Boinyatšo bja go ikwa o šomišitšwe ke ba bangwe

Mmopi wa rena, Jehofa Modimo, * o nyaka gore re thabele le go holwa ke dimpho tša gagwe. Modimo ke yena “Yo a le rutago gore le holege.” (Jesaya 48:17) Motho yo a phelago ka tlhahlo ya Beibele mabapi le thobalano:

▪ O amogelwa ke Modimo

▪ O ba le khutšo ya monagano

▪ O ba le ditswalano tše tiilego tša lapa

▪ O ba le botumo bjo bobotse

▪ O ba le boitlhompho

Lega go le bjalo, go thwe’ng ge e ba ga bjale o sa phele ka ditekanyetšo tša Beibele tša boitshwaro? Na go a kgonega gore o fetoše tsela yeo o phelago ka yona? Na Modimo o tla go bona molato ka boitshwaro bja gago bja nakong e fetilego?

Ela hloko therešo ye: Ba bangwe ka phuthegong ya Bokriste ya lekgolong la pele la nywaga e be e kile ya ba diotswa, dihlotlolo le basodoma. Ba ile ba kgetha go fetoša tsela ya bona ya bophelo gomme ba holega kudu. (1 Bakorinthe 6:9-11) Lehono, batho ba dimilione lefaseng ka bophara ba dirile kgetho e swanago. Ba itokolotše tseleng e  gobogilego ya bophelo gomme ba holwa ke go dumelelanya boitshwaro bja bona le ditekanyetšo tša Beibele. Ka mohlala, ela hloko phihlelo ya Sarah, yoo go boletšwego ka yena sehlogong sa mathomo.

“Kapejana ke Ile ka Ikwa ke Imologile”

Sarah o ile a lemoga gore bophelo bja gagwe bja go hloka boitshwaro bo be bo se bja mo tlišetša tokologo le kgotsofalo tšeo a bego a di nyaka. O re: “Ke be ke ekwa letswalo la ka le retetše. Ke be ke lewa ke dihlong e bile ke tshwenyegile ka gore nka ima goba ka fetelwa ke bolwetši bjo bo šiišago. Ga se ka ka ka kgaotša go dumela gore Modimo o gona, le gona ke be ke tseba gore tsela ya ka ya bophelo e be e mo kweša bohloko. Ke be ke ikwa ke šilafetše, gomme seo se ile sa mphetša.”

Mafelelong, Sarah o ile a hwetša matla a go fetoša tsela ya gagwe ya bophelo. O ile a nyaka thušo go batswadi ba gagwe, bao e bego e le Dihlatse tša Jehofa. O ile a ba a kgopela thušo go bagolo ba swanelegago ba Bakriste ba phuthegong ya gabo. Sarah o re: “Ke be ke makaditšwe e bile ke thabišitšwe ke go swarwa ka borutho le ka lerato ke batswadi ba ka gotee le bagolo ba phuthego. Kapejana ke ile ka ikwa ke imologile.”

Ga bjale Sarah o godiša bana ba gagwe ba babedi. Sarah o re: “Ke botša bana ba ka ka bolokologi mabapi le dikgetho tša ka. Ke nyaka gore ba kwešiše kamoo go hlokomologa ditekanyetšo tša Modimo go ilego gwa nkgoma ka gona. Pakane ya ka ke go ba thuša go lemoga gore go phela ka ditekanyetšo tša Modimo mabapi le thobalano go tla ba hola mmeleng, monaganong le maikwelong. Ke kgodišegile gore Modimo o re nea ditekanyetšo tša boitshwaro ka gobane a sa nyake go bona re ekwa bohloko.”

Le wena o ka holwa ke go latela tlhahlo e lerato ya Modimo. Beibele e nea kholofetšo ye: “Ditayo tše di tšwago go Jehofa di lokile, di thabiša pelo; taelo ya Jehofa e hlwekile, e phadimiša mahlo. . . . Go di lota go na le moputso o mogolo.”—Psalme 19:8, 11. *

[Mengwalo ya tlase]

[Ntlhakgolo go letlakala 8]

Bao ba hlokomologago ditekanyetšo tša Beibele gantši ba baka bohloko bja maikwelo

[Ntlhakgolo go letlakala 9]

Bao ba phelago ka ditekanyetšo tša Beibele ba na le letswalo le le hlwekilego e bile ba na le ditswalano tše tiilego tša lapa