Babadi ba Rena ba a Botšiša . . .

Na Masea a Swanetše go Kolobetšwa?

▪ Victoria o anega ka gore: “Ke be ke tšhogile gore kgaetšedi ya ka yo monyenyane, John, o be a ahloletšwe go ya Limbo.” Ke ka baka la’ng a be a ena le poifo yeo? O hlalosa ka gore: “John o hwile pele a ka kolobetšwa gomme moruti wa Katholika o boletše gore ka baka leo, John o be a tla dula Limbo ka mo go sa felego.” Thuto e bjalo ruri e a tšhoša, eupša na ke ya Mangwalo? Na Beibele e ruta gore bana bao ba hwago ba se ba kolobetšwa ga ba na kholofelo?

Beibele e ruta gore Bakriste ba swanetše go kolobetšwa. Jesu o laetše balatedi ba gagwe gore: “Le dire batho ba ditšhaba ka moka barutiwa, le ba kolobetša leineng la Tate le la Morwa le la moya o mokgethwa, le ba ruta go boloka dilo tšohle tšeo ke le laetšego tšona.” (Mateo 28:19, 20) Ela hloko gore bao ba kolobetšwago e swanetše go ba barutiwa ba Jesu. Ke gore, ke batho bao ba ithutilego ka Jesu gomme ba kgethile go mo latela—kgetho yeo go se nago lesea leo le ka e dirago.

Go dutše go le bjalo, ba bantši ba gapeletša gore taelo ya Jesu e šoma le baneng ba banyenyane. Moruti wa kereke ya Lutere Richard P. Bucher o re: “Yo mongwe le yo mongwe o swanetše go kolobetšwa, go akaretša le masea.” O oketša ka gore: “Go ba thibela go kolobetšwa ke go ba thibela go lebalelwa le go ba bea kotsing ya go rogakwa.” Lega go le bjalo, ge e le gabotse dipolelo tše bjalo di thulana le dithuto tša Jesu bonyenyane ka ditsela tše tharo.

Ya pele, Jesu ga se a ka a ruta gore masea a swanetše go kolobetšwa. Ke ka baka la’ng therešo yeo e le bohlokwa? Ela hloko se: Jesu ka pelo ka moka o ile a ruta barutiwa ba gagwe mabapi le dilo tšeo Modimo a di nyakago. Ka dinako tše dingwe, o be a boeletša dithuto tše bohlokwa kudu. Ka baka la’ng? E le go kgonthišetša gore barutiwa ba gagwe ba kwešiša ntlha. (Mateo 24:42; 25:13; Mareka 9:34-37; 10:35-45) Lega go le bjalo, le ka mohla ga se a ka a ruta gore masea a swanetše go kolobetšwa. Na Jesu a ka ba a ile a lebala go ruta thuto ye? Seo ga se kgonege! Ka ntle le pelaelo, ge e ba masea a swanetše go kolobetšwa, Jesu nkabe a boletše.

Ya bobedi, Jesu le ka mohla ga se a ka a ruta gore go na le motho le ge e le ofe yo a tlaišegago ka morago ga lehu. O be a dumela Mangwalo, ao a bolelago ka go lebanya gore: “Bao ba phelago ba a tseba gore ba tlo hwa; eupša ge e le bahu ga ba tsebe selo le gatee.” (Mmoledi 9:5) Jesu o be a tseba gore bahu ga ba dule ba hlokofetše pakatoring, Limbo, mollong wa dihele goba lefelong le ge e le lefe le lengwe. Go e na le moo, o rutile gore ga ba tsebe selo, bjalo ka ge eka ba robetše.—Johane 11:1-14.

Ya boraro, Jesu o rutile gore “bohle bao ba lego mabitleng” ba tla boela bophelong. (Johane 5:28, 29) Ka ntle le pelaelo, ba ba tla akaretša ba dimilione tše dintši bao ba sa kago ba kolobetšwa. Ge ba tsošitšwe bahung, ba tla ba le sebaka sa go ithuta ka dilo tšeo Modimo a di nyakago le sa go phela ka mo go sa felego Paradeiseng mo lefaseng. *—Psalme 37:29.

Ka gona, go molaleng gore Beibele ga e rute gore masea a swanetše go kolobetšwa.

[Mongwalo wa tlase]