2 Modimo o Tloga a se na Taba—Na ke Therešo?

Seo o ka bago o se kwele: “Ge e ba Modimo a be a ena le taba le batho, gona o be a tla fediša bobe le tlaišego lefaseng. Gaešita le ge a tshwenyegile ka batho ka kakaretšo, ga a na taba le seo se ntiragalelago.”

Seo Beibele e se rutago: Jehofa Modimo ga a bake bobe. (Jakobo 1:13) Gaešita le ge a ka kgona go fediša bobe ka nako le ge e le efe, ga bjale o dumeletše gore go be le lekoko la batho ba kgopo e le gore a rarolle dikgang tša mabapi le se se lokilego le se se fošagetšego tšeo di rotošitšwego mathomong a histori ya batho. O tla thuša batho gomme a dirolle tshenyo ka moka yeo e bakilwego ke bao ba ganago pušo ya gagwe.—Genesi 3:1-6; Jesaya 65:17. *

Go sa šetšwe go tshwenyega ga gagwe ka batho ka moka, Modimo o re kgahlegela ka mo go tseneletšego re le motho ka o tee ka o tee. Mateo 10:29-31 e bontšha gore o ela hloko selo se sengwe le se sengwe ka rena seo gaešita le rena re sa se tsebego, ge e re: “Na dithaga tše pedi ga di rekišwe ka tšhelete ya tšhipi ya theko e nyenyane? Lega go le bjalo, ga go le e tee ya tšona yeo e tlago go wela fase Tatago lena a sa tsebe. Eupša yona meriri ye ya dihlogo tša lena e badilwe ka moka. Ka gona, le se ke la boifa: Le ba bohlokwa go feta dithaga tše dintši.”

Kamoo go tseba therešo go go thušago ka gona: Gantši re phema batho ba bogale goba ba se nago taba. Ga go makatše gore maaka a gore Modimo ga a na taba a dira gore batho ba bantši ba pheme go mo tseba ka mo go feletšego goba ba mmatamela feela ge ba bona gore ga ba na tselapedi. Go tseba gore Modimo o tloga a ena le taba go ka dira gore o nyake go ithuta ka mo go oketšegilego ka yena le go ba le segwera le yena.

Ka mohlala, o ka ba o ile wa rapela Modimo eupša wa ipotšiša ge e ba a be a go theeditše goba ge e ba a tla go araba. Beibele e re kgonthišetša gore “Mokwi wa thapelo” o dula a ikemišeditše go kwa dithapelo tša bao ba mmatamelago ka pelo ka moka.—Psalme 65:2.

Modimo o go laletša gore o ‘lahlele dipelaelo tša gago ka moka go yena, gobane o a go hlokomela.’ (1 Petro 5:7) Re ka ithekga ka tlhokomelo ya gagwe gaešita le dinakong tša tlalelo e kgolo, ka gobane Lentšu la gagwe le re: “Jehofa o kgauswi le ba dipelo tše di robegilego; o phološa ba meoya e nyamilego o šoro.”—Psalme 34:18.

[Mongwalo wa tlase]

[Ntlhakgolo go letlakala 5]

Ge e ba Modimo a se na taba, ke ka baka la’ng a re laletša gore re mo rapele?