Ge e le Gabotse ke Mang yo a Bušago Lefase?

MOHLOMONGWE ga se wa ka wa kopana le baetapele le ge e le bafe ba bosenyi bjo bo rulagantšwego. Na seo se bolela gore ga ba gona? Balaodi ba dihlopha tša bosenyi ba tloga ba kgona go uta seo ba lego sona goba gaešita le go laela disenyi tše dingwe ba dutše ba le kgolegong. Lega go le bjalo, dihlogo tše dikgolo dikuranteng mabapi le dintwa tša go lwela dihlaretagi, dihlopha tša bagweba-ka-mmele le go gweba ka batho, ge go bolelwa tše sego kae feela, di re gopotša ka tutuetšo e senyago le mafelelo a kotsi a ditiro tša disenyi tšeo le go ba gona ga tšona. Re tseba gore baetapele ba dihlopha tša disenyi ba gona ka baka la tshenyo yeo ba e bakago setšhabeng.

Lentšu la Modimo, e lego Beibele, le utolla gore Sathane ke motho wa kgonthe wa moya yoo, ka go swana le molaodi yo matla wa sehlopha sa disenyi, a kgonthišetšago gore thato ya gagwe e a phethwa ka ‘dipontšho tša maaka’ le ‘bofora bjo bo sa lokago.’ Ge e le gabotse, Beibele e re “o dula a itira morongwa wa seetša.” (2 Bathesalonika 2:9, 10; 2 Bakorinthe 11:14) Go ba gona ga Diabolo le gona go ka kgonthišetšwa ka mo go swanago ka go bona tshenyo yeo a e bakago. Lega go le bjalo, batho ba bantši kudu ba thatafalelwa ke go dumela gore go na le motho yo kgopo wa moya yo a sa bonagalego. Pele re hlahlobišiša seo Beibele e se bolelago ka Diabolo, anke re hlahlobeng mapheko a tlwaelegilego le ditumelo tše di fošagetšego tšeo di thibelago batho ba bantši go amogela kgopolo ya gore Diabolo ke motho wa kgonthe wa moya.

▪ “Ke bjang Modimo yo lerato a bego a ka bopa Diabolo?” Ka ge Beibele e bolela gore Modimo o lokile e bile o phethagetše, go bonagala e le go ikganetša go nagana gore a ka ba a ile a bopa sebopiwa se sebe, se šoro le se kgopo. Therešo ke gore Beibele ga e bolele gore Modimo o bopile motho yo bjalo. Go e na le moo, ge e bolela ka Modimo e re: “Ke Leswika, mediro ya gagwe e phethagetše, gobane ditsela tša gagwe ka moka ke tša toka. Ke Modimo yo a botegago, yoo go yena go se nago go hloka toka; o lokile e bile o letlile.”—Doiteronomio 32:4; Psalme 5:4.

Taba yeo e swanetšego go elwa hloko ke ya ge e ba motho yo a phethagetšego yo a bopilwego ke Modimo a ka dira selo le ge e le sefe se se fošagetšego. Go e na le gore a bope dibopiwa tša gagwe di swana le diroboto, Modimo o di neile tokologo ya boikgethelo, e lego bokgoni bja go itirela dikgetho. Ka gona, sebopiwa se se phethagetšego le se bohlale se ka kgetha go dira botse goba bobe. Ge e le gabotse, ditiro tšeo di dirwago ke sebopiwa se bohlale seo se filwego tokologo ya boikgethelo, e ka ba e le motho goba e le sebopiwa sa moya, ke tšona feela tšeo ruri di ka sepedišanago le se se lokilego goba se se fošagetšego.

Ka gona, go a kwagala gore Modimo o be a ka se nee dibopiwa tša gagwe tokologo ya go ikgethela go dira botse goba bobe gomme ka nako e swanago a di thibela go dira bobe ge di be di ka kgetha go bo dira. Jesu o ile a bolela ka go dirišwa gampe ga tokologo ya boikgethelo ge a be a re ka Diabolo: “Ga se a ka a ema a tiile therešong.” (Johane 8:44) Polelo yeo e bontšha gabotse gore motho yo a ilego a fetoga Diabolo mathomong e be e le motho yo a phethagetšego wa moya, yo ka nako e nngwe a kilego a “ema a tiile therešong.” *  Jehofa Modimo o bopile dibopiwa tša gagwe di na le tokologo ya boikgethelo ka ge a di rata e bile a di bota.—Bona lepokisi le le rego  “Na Sebopiwa se se Phethagetšego e ka ba Seo se sa Phethagalago?” go letlakala 6.

▪ “Diabolo ke mohlanka wa Modimo” Ba bangwe ba bona eka Beibele e šišinya kgopolo ye pukung ya Jobo. Go ya ka puku e nngwe yeo e sekasekago Beibele, polelo ya gore Diabolo o be a “ralala le lefase” e šupa go tema yeo e bego e kgathwa ke dihlodi tša bogologolo tša Peresia, tšeo di bego di tšea maeto gomme di hlankela kgoši ya tšona ka go e begela ditaba. (Jobo 1:7) Lega go le bjalo, ge e ba Diabolo e be e tloga e le hlodi ya Modimo, gore’ng a be a ka swanelwa ke go hlalosetša Modimo gore o be a etšwa go “ralala le lefase”? Go e na le go mo hlalosa e le modirišani wa Modimo, pego ya Jobo e bitša Diabolo ka leina la Sathane, leo le bolelago “Moganetši,” gomme ka go re’alo e bontšha gore ge e le gabotse ke Lenaba le legolo la Modimo. (Jobo 1:6) Bjale, kgopolo ya gore Diabolo o hlankela Modimo e tšwa kae?

Morago lekgolong la pele la nywaga C.E., dipuku tša Apokrifa, tše bjalo ka “Puku ya Nywaga ya Khunologo” le ya “Molao o Tlwaelegilego” tša sehlotswana sa Qumran, di ile tša hlalosa Diabolo e le yo a dirišanago le Modimo e bile a ikokobeletša thato ya Gagwe. Radihistori J. B. Russell o hlalosa ka pukung ya gagwe ya Mephistopheles gore Mompshafatši wa Protestanta Martin Luther o be a lebelela Diabolo e le sedirišwa sa Modimo, “go swana le sekela goba mogoma woo a hlagolago tšhemo ya gagwe ka wona.” Russell o oketša ka  gore kgopolo ya seo ke gore “mogoma o thabela go bolaya ngwang,” eupša o dula o le ka seatleng se matla sa Modimo, gomme ka go re’alo o phetha thato ya Modimo. Thuto ya Luther—yeo ka morago e ilego ya amogelwa ke rathutatumelo wa Mofora John Calvin—e ile ya kgopamiša tsela yeo badumedi ba bantši ba bego ba lebelela toka ka yona. Go tla bjang gore Modimo yo lerato a se ke a dumelela bobe feela eupša a be a nyake gore bo dirwe? (Jakobo 1:13) Thuto ye gotee le ditiro tše di boifišago tša lekgolong la bo-20 la nywaga di thibela batho ba bantši go dumela go ba gona ga Modimo le ga Diabolo.

▪ “Diabolo e fo ba e le kgopolo e mpe” Go tšea Diabolo e le kgopolo feela e mpe go be go tla dira gore go be thata go kwešiša ditemana tše dingwe tša Beibele. Ka mohlala, bjalo ka ge go hlaloswa go Jobo 2:3-6, Modimo o be a boledišana le mang? Na go ka direga gore o be a bolela le kgopolo e itšego e mpe yeo e bego e le go Jobo goba na mohlomongwe o be a bolela a nnoši? Go oketša moo, na Modimo o be a ka reta dika tše dibotse tša Jobo gomme ka morago a dumelela gore Jobo a lekwe ke kgopolo e mpe? Go tšea Modimo a na le maikemišetšo a bjalo go swana le go mo dira Motho yo kgopo, e sego “yoo go yena go se nago go se loke.” (Psalme 92:15) Ka mo go fapanego, Modimo o ile a gana go ‘otlolla seatla sa gagwe’ gore a gobatše Jobo. Go molaleng gore Diabolo ga se kgopolo e mpe goba karolo e sa kgahlišego ya semelo sa Modimo eupša ke motho wa moya yo a itirilego Lenaba la Modimo.

Ge e le Gabotse ke Mang yo a Bušago Lefase?

Lehono, batho ba bantši ba nagana gore go dumela gore Diabolo o gona go šiilwe ke nako. Lega go le bjalo, ga go na tlhaloso e kgotsofatšago ya bobe go feta therešo e sa ganetšegego ya gore bo bakwa ke Diabolo. Ge e le gabotse, go leka go gana kgopolo ya gore Diabolo o gona go dirile gore ba bantši ba latole Modimo le go gana ditekanyetšo ka moka tša boitshwaro.

Sereti sa lekgolong la bo-19 la nywaga Charles-Pierre Baudelaire se ngwadile gore: “Bohwirihwiri bjo bogolo bja diabolo ke go leka go re kgodiša gore ga a gona.” Ka go uta seo a lego sona, ge e le gabotse Diabolo o tsošitše dipelaelo mabapi le go ba gona ga Modimo. Ge e ba Diabolo a be a se gona, na seo se be se ka se dire gore Modimo e be yena a bakago bobe ka moka? Na se ga se sona seo Diabolo a nyakago gore batho ba se dumele?

Go swana le molaodi wa sehlopha sa disenyi, Diabolo o uta seo a lego sona e le gore a phethe morero wa gagwe. Morero woo ke ofe? Beibele e araba ka gore: ‘Modimo wa lefase le o foufaditše menagano ya ba ba sa dumelego, e le gore seetša sa ditaba tše dibotse tša letago mabapi le Kriste, yo e lego seswantšho sa Modimo, se se ke sa ba phadimela.’—2 Bakorinthe 4:4.

Go sa šetše potšišo e nngwe e bohlokwa. Modimo o tla dira’ng ka motho yo yo bohlale kudu yo a sa bonagalego yoo a bakago bobe ka moka le tlaišego? Re tla ahlaahla se sehlogong se se latelago.

[Mongwalo wa tlase]

[Ntlhakgolo go letlakala 5]

Na Diabolo ke mohlanka wa Modimo goba moganetši wa Modimo?

[Box/​Picture on page 6]

 Na Sebopiwa se se Phethagetšego e ka ba Seo se sa Phethagalago?

Go phethagala moo dibopiwa tše bohlale di go filwego ke Modimo go lekanyeditšwe. Gaešita le ge Adama a be a bopilwe a phethagetše, o be a swanetše go hlompha mellwane yeo a e beetšwego ke Mmopi wa gagwe. Ka mohlala, o be a ka se je ditšhila, lekgwara goba dikota ntle le gore di mo gobatše. Ge a be a ka hlokomologa molao wa matlakgogedi a lefase gomme a fofa a le legageng, o be a tla hwa goba a gobala o šoro.

Ka mo go swanago, ga go na sebopiwa se se phethagetšego—e ka ba motho goba morongwa—seo se ka fetelago ka kua ga mellwane ya boitshwaro yeo e beilwego ke Modimo ka ntle le gore se ipee kotsing ya ditlamorago tše di sa kgahlišego. Ka gona, ge sebopiwa se bohlale se diriša tokologo ya sona ya boikgethelo gampe, se tla wela phošong le sebeng gabonolo.—Genesi 1:29; Mateo 4:4.