Ke be ke Lora ka Bophelo bja go Dula ke Nametše Senamelwa

Ka ge go anega Zoya Dimitrova

Ge ke ena le nywaga e 15, ke be ke thabela go bona toro ya ka e phethagala—ke thabela go bapala le go sepela le disorokisi. Ke moka ka September 4, 1970, go ile gwa direga kotsi. Motsotsong o itšego ke be ke fofa moyeng. Motsotsong o latetšego ke ge ke wela fase gabohloko.

KE BELEGWE ka December 16, 1952, gomme ka dula Sofia, Bulgaria, le batswadi ba ka gotee le mogolwake. Ka nako yeo, Bulgaria e be e le naga ya Makomanisi yeo go yona bodumedi bo bego bo kgotlelelwa eupša bo tloga bo sa kgothaletšwe. Bontši bja batho bo be bo fo ba bo sa dumele go Modimo gomme ba bantši ba bao ba bego ba dumela go yena, ba ile ba kgetha go boloka ditumelo tša bona e le sephiri. Gaešita le ge lapa lešo le be le ipolela gore ke la Maorthodox, ga se ka ka ka godišwa ka tsela ya bodumedi e bile ga se ka ka ka nagana ka Modimo.

Go ile gwa bonagala ke sa le yo monyenyane gore ke be ke rata dipapadi tša mehutahuta eupša kudukudu ya tša boithobollo. Ge ke be ke ena le nywaga e 13, monna yo mongwe o ile a tla sekolong sa rena a nyakana le ngwanenyana yo a bego a tla tlwaeletšwa disorokisi. Morutiši wa ka wa tša boithobollo o ile a mpolelela gabotse. Ke ile ka thaba kudu ge ke be ke nametšwa ka koloing ya mookamedi, koloi ya Amerika, bakeng sa go yo hlahlobja le go lekwa ke sehlopha sa batlwaetši. Ke ile ka thabišwa ke gore ba ile ba nkgetha. A e be e le mathomo a boitlwaetšo bjo thata bja ka mehla bjoo bo tšerego nywaga ya ka godimo ga e mebedi. Ke moka, ge ke be ke ena le nywaga e 15, ke ile ka fetša go itlwaetša gomme ka thoma go dula ke le tseleng—bophelo bja go etela mafelo ke sepela le disorokisi. Mathomong, ke ile ka rarela Bulgaria ka moka gomme ka morago ka ya dinageng tša yeo e kilego ya ba Soviet Union gotee le Algeria, Hungary le yeo e kilego ya ba Yugoslavia.

Toro ya ka e ile ya tšea nywaga e meraro e phethagala. Ke moka, ge ke be ke bapala disorokising kua Titov Veles, Matsedonia, kotsi yeo e hlalositšwego matsenong e ile ya direga. Ke be ke bontšha bokgoni bjo bo sa tlwaelegago bja go laola mmele ke le ka godimo ga lešaba leo le bego le bogetše. Mmapadigotee le nna, yo a bego a lekeletše ka hlogo, o be a fela a mphošetša godimo gomme a nkama ge ke boa fase. Ke ile ka foša diatla tša gagwe gomme ge thapo ya ka ya tšhireletšo e kgaoga, ke ile ka leba fase tekanyong ya dimithara tše tshela. Ke ile ka išwa sepetlele ka go akgofa, moo go ilego gwa lemogwa gore ke be ke robegile letsogo, dikgopo tše mmalwa gotee le go robega mokokotlo. Ke ile ka fetša matšatši a sego kae ke tšhogile e bile ke sa gopole seo se diregilego. Ge ke be ke le kaone, ke ile ka lemoga gore ke be ke golofetše go tloga lethekeng go fihla maotong. Lega go le bjalo, ka ge ke be ke sa le yo monyenyane, ke ile ka dula ke ena le kholofelo ya gore ge ke alafša goba ke buiwa, ke be ke tlo kgona go sepela gape gomme mohlomongwe ka ba ka kgona go boela go bapala disorokising.

Nywageng e mebedi le seripa e latetšego, ke ile ka alafša mafelong a mmalwa, ke sa dutše ke  kgomaretše kholofelo ya gore ke tla fola. Mafelelong, ke ile ka swanelwa ke go amogela taba ya gore toro ya ka e be e fedile. Se se makatšago ke gore ga bjale ke ile ka swanelwa ke go phela ke nametše senamelwa sa go fapana le sa torong ya ka—go phela setulong sa digole.

Mathomo a Bophelo bjo Bofsa

Ka morago ga go phela bophelo bjo bjalo bja go dula ke swaregile, ke be ke nagana gore phetogo ye e be e sa kgonege. Ka ge ke be ke se sa na kholofelo, ke ile ka gateletšega. Ke moka ka 1977, lesogana le lengwe leo le bitšwago Stoyan le ile la nketela. Ge ke se na go kwa gore e be e le kgaetšedi ya yo e kilego ya ba mošomigotee le nna, ke ile ka mmotša gore a tsene gateetee. Ge re dutše re boledišana, o ile a mpotšiša mabapi le kholofelo ya ka ya gore ke tlo fola. Ka ge ke be ke gakanegile e bile ke nyamišitšwe ke bophelo, ke ile ka re ke be ke se na kholofelo. Ge a be a mpotša gore ke Modimo a nnoši yo a bego a ka nthuša, ke ile ka araba ke galefile ka re: “Ge e le gabotse, ge e ba Modimo a le gona, ke ka baka la’ng ke le boemong bjo?”

Ka matseno a, Stoyan, yo a bego a sa tšwa go ba yo mongwe wa Dihlatse tša Jehofa ge a be a šoma bjalo ka mmapadi wa disorokising kua United States, ka botho bjo bogolo o ile a ntlhalosetša kholofelo e kgahlišago ya Beibele ka bokamoso. Ke ile ka thaba kudu ge ke ekwa gore go se go ye kae lefase e tla ba paradeise. Kholofetšo ya gore “lehu le ka se hlwe le sa ba gona, le ge e le manyami goba sello goba bohloko di ka se hlwe di sa ba gona” e ile ya nkgoma pelo. (Kutollo 21:4) Ruri ke be ke hlologetše go bona boemo bja ka bja tša maphelo bo boela sekeng! Ke ile ka dumela go swarelwa thuto ya Beibele ya ka mehla le semeetseng. Ka baka leo, ke ile ka thoma go phela bophelo bjo bofsa. Mafelelong, ke be ke hweditše motheo wa kholofelo ya kgonthe!

Ke be ke dula ke fagahletše go ithuta Beibele beke le beke. Mathomong ke be ke ithuta le Stoyan gomme ka morago ka ithuta le Totka, e lego Hlatse e botho kudu. Ka thušo ya gagwe, tsebo ya ka ya Beibele e ile ya oketšega ka lebelo le legolo gomme ke ila ka neela bophelo bja ka go Jehofa Modimo. Ka nako yeo, go be go se na motho yo a dulago Sofia yo a swanelegago go ka nkolobetša, ka go re’alo ke ile ka swanelwa ke go letela ketelo ya ngwanabo rena yo a tšwago Matsedonia. Ka September 11, 1978, mo e ka bago ngwaga ka morago ga go thoma ga ka go ithuta Beibele, ke ile ka kolobetšwa ka pafong ya go hlapela yeo e bego e le ka ngwakong wa ka. Go kolobetšwa ga ka bjalo ka yo mongwe wa Dihlatse tša Jehofa go ntlišeditše lethabo le legolo gomme bophelo bja ka bo ile bja ba le morero kudu.

Therešo ya Beibele yeo ke bego ke ithutile yona e ile ya ntšhuma ka gare bjalo ka mollo. Ka mafolofolo ke ile ka botša batho bao ba bego ba etla legaeng la ka mabapi le kholofelo ya ka e mpsha. Ka manyami, ga go yo a bego a ntšeela hlogong, mohlomongwe ba be ba nagana gore ke be ke se ka felela ka baka la kotsi ya ka.

 Phošo e Nyamišago Kudu

Nakong yeo, Dihlatse tša Jehofa di be di thibetšwe Bulgaria gomme go be go ena le Dihlatse tše sego kae feela nageng ka moka. Go be go se na diboka tša phuthego tšeo ke bego nka ya go tšona gomme ke kopana ka sewelo le badumedigotee le nna. Se, go akaretša le go palelwa ga ka ke go lemoga kotsi ya go tlwaelana kudu le bao ba sa phelego ka ditekanyetšo tša Beibele, se ile sa lebiša go direng ga ka phošo e nyamišago kudu.

Letswalo la ka le ile la ntlaiša kudu gomme ka kwa bohloko bjo bo tseneletšego kudu bja go arogana le Jehofa Modimo. Ke kwele bohloko e bile ke ena le dihlong, ke ile ka tšhollela Jehofa sa mafahleng a ka ka thapelo, ka kgopela tebalelo. Ka morago, ka thušo ya bagolo ba lerato ba Bakriste, ke ile ka tsošološwa moyeng gomme ka boelwa ke lethabo la ka tirelong ya Jehofa. Ke tšeela godimo e le ruri tokelo ya go hlankela Jehofa ka letswalo le le hlwekilego le go ba karolo ya mokgatlo wa gagwe o hlwekilego!

Go Thaba go sa Šetšwe Mafokodi

Kotsi yeo e nkwetšego nywageng e 40 e fetilego e ile ya nkamoga toro ya ka ya go phela ke bapala le go etela mafelo gomme ya ntudiša setulong sa digole. Lega go le bjalo, ga ke gopole morago ka go nyama goba go itshola, mo nkego ke paletšwe bophelong. Therešo ya Beibele e nthušitše go lemoga gore toro ya ka ya go hwetša lethabo le kgotsofalo bophelong bja disorokisi e be e kgokagane le dilo tše nago le mohola o monyenyane. Ke bone kamoo bao e kilego ya ba bašomigotee le nna bao ba ilego ba tšwela pele ka disorokisi ba nyamišitšwego gabohloko ka gona maphelong a bona. Ka lehlakoreng le lengwe, ke hweditše lehumo le legologolo, e lego tswalano le Mmopi wa ka, Jehofa Modimo. Se se ntlišeditše lethabo le legolo kudu go feta leo ke bego ke tla le hwetša bophelong bja disorokisi.

Go oketša moo, ke ile ka thabela go bona batho ba bangwe ba bantši ba hwetša therešo ya Beibele e bile ba neela maphelo a bona go Modimo wa rena yo lerato, Jehofa. Ge ke be ke thoma go ithuta Beibele ka 1977, go be go ena le Dihlatse tša Jehofa tše sego kae feela Bulgaria. Gaešita le ka morago ka 1991, ge Dihlatse tša Jehofa di be di thoma go ngwadišwa ka molao ge mmušo wa Makomanisi o be o ewa, go be go ena le Dihlatse tše e ka bago tše lekgolo feela nageng ka moka. Ke ile ka thaba gakaakaang go bona ge palo ya bagoeledi ba Mmušo e dutše e gola go ba go fihla tlhoreng ya lehono ya bagoeledi ba 1 800!

 Go sa na le modiro o montši o swanetšego go dirwa Bulgaria. Ba bantši ba tsoma tsebo ya Lentšu la Modimo. Se se ka bonwa ka palo e kgahlišago ya ba 3 914 bao ba bilego gona Segopotšong sa lehu la Kriste ka 2010. Ke thaba kudu ge ke nagana ka bohlatse bjo bja gore Jehofa o šegofaditše modiro o thomilego ganyenyane Bulgaria. Ke bone ge “yo monyenyane” a eba “setšhaba se matla,” bjalo ka ge go boletšwe e sa le pele go Jesaya 60:22.

Selo se sengwe seo se nneago lethabo le seo ke ilego ka se thabela kudu bophelong bja ka e bile go lokollwa ga Phetolelo ya Lefase le Lefsa ya Mangwalo a Makgethwa ka Sebulgaria. Se se diregile ka August 2009 Kopanong ya Selete ya “Dulang le Phakgame!” yeo e bego e swaretšwe Sofia. Go lokollwa ga Beibele ye ka segagešo e be e le go phethagala ga toro! Ka ntle le pelaelo e tla dirišwa kudu go thuša batho ba bantši go hwetša tsebo ya therešo ya Beibele Bulgaria.

Gaešita le ge bogole bja ka bo lekanyetša seo nka se dirago boboleding bja ditaba tše dibotse tša Mmušo wa Modimo, ke thabela kudu go abelana ditherešo tša Beibele le baagišani ba ka gotee le yo mongwe le yo mongwe yo a nketelago. Lebakeng le lengwe, ke ile ka bitša moagišani a feta ke le mathuding. O ile a tla gomme ka morago ga go boledišana le yena ka dikgopolo tše di kgothatšago tša Beibele, a dumela le semeetseng go ithuta Beibele le nna. Ke ile ka thaba kudu ge ka morago a be a kolobetšwa gomme a eba ngwanešo wa moya. Ke bile le tokelo ya go thuša batho ba bane go fihla bokgoleng bja go neela maphelo a bona go Jehofa.

Go ka direga gore ke hwetša lethabo le legolo le kgothatšo ge ke eba gona dibokeng tša Bokriste ka mehla le bana bešo gotee le dikgaetšedi ba fetago lekgolo, bao ba lego bjalo ka lapa lešo. Ka ge ke phela nageng yeo go yona go se nago dinamelwa tše di kgethegilego bakeng sa batšofadi le bao ba fokolago, ke thatafalelwa ke go ya dibokeng tša phuthego. Eupša ke leboga kudu tlhokomelo e lerato ya ngwanabo rena wa mofsa. Bakeng sa diboka tše dingwe le tše dingwe, o ntšea go tloga ka phaphošing ya ka go fihla koloing ya gagwe, go tloga koloing ya gagwe go ya ka Holong ya Mmušo ke moka a mpušetša morago. Ke leboga Jehofa e le ruri bakeng sa tokelo ya go ba karolo ya lapa le le lerato la moya!

Ge ke lebelela morago, ke lemoga gore dilo bophelong bja ka di diregile ka tsela e fapanego kudu le yeo ke bego ke lora ka yona ge ke be ke sa le mofsa. Go hlankela Jehofa go mphile lethabo le legolo kudu gona bjale gotee le kholofelo e kgahlišago ya bokamoso. Ke tšeela godimo kholofetšo ya Modimo ya gore lefaseng la paradeise, “sehlotša se tlo taboga bjalo ka kgama.” (Jesaya 35:6) Ke lebeletše pele ka kgodišego e feletšego letšatšing leo ke tlago go taboga setulong sa ka sa digole, ka ba le boemo bjo bo phethagetšego bja tša maphelo le matla.

[Ntlhakgolo go letlakala 30]

“Ke hwetša lethabo le legolo le kgothatšo ge ke eba gona dibokeng tša Bokriste ka mehla”

[Ntlhakgolo go letlakala 31]

“Selo seo ke ilego ka se thabela kudu bophelong bja ka e bile go lokollwa ga Phetolelo ya Lefase le Lefsa ya Mangwalo a Makgethwa ka Sebulgaria”

[Seswantšho go letlakala 29]

Ke thomile go bapala disorokising ke ena le nywaga e 15