4. Go se be le Lerato la Tlhago

“Batho ba tla . . . hloka lerato bakeng sa malapa a bona.”—2 TIMOTHEO 3:1-3, God’s Word Bible

● Chris o šoma sehlopheng sa go thuša bao ba lebeletšanago le bošoro bja ka gae sa kua Wales Leboa. Chris o re: “Ke gopola mosadi yo mongwe yoo a ilego a tsena a bethilwe kudu moo ke bego ke se sa mo tseba ka ge a be a se sa swana le nakong e fetilego ge ke be ke mmona. Basadi ba bangwe ba gobala maikwelong kudu moo ba palelwago le ke go go lebelela.”

DITHEREŠO DI BONTŠHA ENG? Nageng e nngwe ya Afrika, mo e ka bago mosadi o tee go ba bangwe le ba bangwe ba bararo o kile a tlaišwa ka tša thobalano ge e be e sa le ngwana. Nyakišišo yeo e dirilwego nageng yona yeo e utollotše gore banna ba ka godimo ga teetharong ba be ba nagana gore go itia basadi ba bona go be go amogelega. Lega go le bjalo, ga se basadi feela bao e lego bahlaselwa ba bošoro bja ka gae. Ka mohlala, kua Canada mo e nyakilego go ba banna ba bararo go ba lesome ba kile ba itiwa goba ba tlaišwa ke balekane ba bona.

KGANETŠO E TLWAELEGILEGO KE EFE? Ke kgale go dutše go ena le bošoro bja ka gae. Go fo ba go lebišwa tlhokomelo go bjona kudu lehono go feta nakong e fetilego.

NA KGANETŠO YEO E A KWAGALA? Ge e sa le go lebišitšwe tlhokomelo bošorong bja ka gae nywagasomeng ya morago bjale. Eupša na tlhokomelo e kgolo yeo e lebišitšwego go bothata bjo e ile ya fokotša ditiragalo tša bošoro bja ka gae? Aowa, seo ga se sa ka sa direga. Go hlokega ga lerato la tlhago go oketšegile le go feta.

O NAGANA’NG? Na 2 Timotheo 3:1-3 e a phethagala? Na batho ba bantši ba hloka lerato la go rata ba malapa a bona leo le swanetšego go itlela ka tlhago?

Boporofeta bja bohlano bjoo o bonago bo phethagala bo akaretša legae la rena, e lego lefase. Ela hloko seo Beibele e se bolelago mabapi le taba ye.

[Ntlhakgolo go letlakala 7]

“Bošoro bja ka gae bo bolelwa e le o mongwe wa melato yeo e dulago e sa begwe setšhabeng. Palogare ya basadi ba itiwa ka makga a 35 ke balekane ba bona pele ba ka ikgokaganya le maphodisa.”—MMOLELEDI WA TIRELO YA MOGALA YA MOO GO KGOPELWAGO THUŠO MABAPI LE BOŠORO BJA KA GAE YA KUA WALES.