Ekišang Tumelo ya Bona

“Ke Dumetše”

MARETA o be a kgona go le bona ka leihlo la kgopolo—lebitla la kgaetšedi’agwe, lewa leo molomo wa lona o tswaletšwego ka leswika. Manyami a gagwe a be a mo imela go fo swana le leswika leo. O be a sa nape a kgolwa gore kgaetšedi ya gagwe yo a rategago Latsaro ga a sa le gona. Matšatši a mararo ga e sa le go tloga ge a ehwa a bile bjalo ka lebaka le letelele la manyami, baeng le dikhomotšo.

Ge e le ga bjale, pele ga Mareta go be go eme monna yoo Latsaro a bego a mo tšeela godimo kudu. Go bona Jesu gape go ile gwa dira gore manyami a gagwe a tsenelele kudu, ka gobane Jesu e be e le motho a nnoši lefaseng yoo a bego a ka phološa kgaetšedi’agwe. Lega go le bjalo, Mareta o ile a homotšwa ka tsela e itšego ke go ba le Jesu moo, ka ntle ga motsana wo o lego mmotong wa Bethania. Nakwana yeo a e feditšego a ena le yena, o ile a ikwa a ruthetšwa ke botho bjo a bego a bo bona sefahlegong sa Jesu, e lego kwelobohloko e lerato yeo e bego e dula e le e kgothatšago. Jesu o ile a mmotšiša dipotšišo tšeo di ilego tša mo thuša go lebiša tlhokomelo tumelong ya gagwe gotee le go dumeleng ga gagwe tsogong. Poledišano ye e dirile gore Mareta a bolele mantšu a bohlokwa kudu ao a kilego a a bolela, a rego: “Ke dumetše gore o Kriste Morwa wa Modimo, Yena yo a bego a tlo tla lefaseng.”—Johane 11:27.

Mareta e be e le mosadi yo a nago le tumelo e kgolo. Bonyenyane bjoo Beibele e re botšago ka yena bo re ruta dithuto tše bohlokwa kudu tšeo di ka re thušago go tiiša tumelo ya rena. Go bona gore seo se kgonega bjang, a re eleng hloko pego ya pele ya Beibele yeo e bolelago ka Mareta.

Go “Belaela le go Tshwenyega”

E be e le dikgwedi pele ga moo. Latsaro o be a sa phela e bile a phetše gabotse. Legae la gabo kua Bethania le be le le kgauswi le go etelwa ke moeng yo bohlokwa ka go fetišiša, e lego Jesu Kriste. Latsaro, Mareta le Maria e be e le lapa le sa tlwaelegago—bana ba motho ba bararo ba godilego bao go bonagalago ba be ba dula ka lapeng letee. Banyakišiši ba bangwe ba šišinya gore Mareta e swanetše goba e be e le yena yo mogolo go bona ka moka, ka ge go bonagala e ile ya ba yena moamogedi wa baeng gomme go bolelwa ka yena pele ka dinako tše dingwe. (Johane 11:5) Ga go na le tsela ya go tseba ge e ba le ge e le ofe wa bona a be a le  lenyalong. Go sa šetšwe seo, ba ile ba ba bagwera ba Jesu ba kgauswi. Nakong ya bodiredi bja gagwe kua Judea, moo a ilego a ganetšwa kudu le go swarwa gampe, Jesu o be a dula legaeng la bona. Ka ntle le pelaelo, o ile a tšeela godimo kudu lefelo leo la khutšo le thekgo.

Mareta o be a swanetše go kgatha tema e kgolo go homotšeng le go amogeleng baeng ka gae. Ka ge e be e le motho yo a dulago a swaregile le yo a šomago ka thata, o bonagala gantši a šoma. Ketelo ya Jesu ga se ya ka ya mo thibela go dira bjalo. Go se go ye kae, o ile a rulaganya go apea dijo tše di kgethegilego bakeng sa moeng wa gagwe yo bohlokwa mohlomongwe le basepedišani ba gagwe. Mehleng yeo, go amogela baeng go be go le bohlokwa kudu. Ge moeng a fihla, o be a amogelwa ka go atlwa, a rolwa diramphašane, a hlapišwa dinao gomme a tlotšwa hlogo ka makhura a lapološago a monko o bose. (Luka 7:44-47) O be a swanetše go hlokomelwa gabotse ka tša marobalo le ka dijo.

Mareta le Maria ba be ba ena le mošomo o mogolo wo ba bego ba swanetše go o dira. Ga go pelaelo gore Maria, yo ka dinako tše dingwe go naganwago gore e be e le yena yo a bego a ena le kahlolo e botse e bile a naganišiša kudu, o ile a thuša mogolwagwe mathomong. Eupša ka morago ga ge Jesu a fihlile, dilo di ile tša fetoga. Jesu o ile a lebelela sebaka seo e le nako ya go ruta—gomme o ile a ruta! Go fapana le baetapele ba bodumedi ba mehleng yeo, Jesu o be a hlompha basadi e bile a ikemišeditše go ba ruta ka Mmušo wa Modimo, e lego sehlogo sa bodiredi bja gagwe. Maria, a thabetše sebaka se, o ile a dula dinaong tša Jesu gomme a kwa sohle seo a bego a se bolela.

Akanya feela ka maikwelo a matla ao a ilego a tlala pelong ya Mareta. O ile a tshwenyega le go šitišega le go feta ka baka la dijo ka moka tšeo a bego a swanetše go di lokiša le mešomo ka moka yeo a bego a swanetše go e direla baeng ba gagwe. Ge a be a dutše a eya kua le kua a swaregile gomme a bona ngwanabo a dutše a sa mo thuše ka selo, na o ile a fetoša ponagalo ya gagwe ya sefahlego, a hemela godimo goba a šunyalala? Go be go ka se makatše ge a be a ka dira bjalo. O be a ka se phethe mošomo wo ka moka a nnoši!

Mafelelong, Mareta o ile a se sa kgona go uta kgakanego ya gagwe. O ile a tsena Jesu ganong a bolela a re: “Morena, na ga o na taba ge ngwanešo a ntlogetše ke dira dilo ke nnoši? Ka gona, mmotše gore a nthuše.” (Luka 10:40) Mantšu a a be a le matla. Diphetolelo tše dintši di fetolela potšišo ye  ka gore: “Morena, na ga o re selo ge . . . ?” Ke moka o ile a kgopela Jesu gore a phošolle Maria, a mo laele gore a boele mošomong.

Karabo ya Jesu e ka ba e ile ya makatša Mareta, bjalo ka ge e ile ya makatša babadi ba bantši ba Beibele ga e sa le go tloga ka nako yeo. O ile a bolela ka boleta a re: “Mareta, Mareta, o belaela le go tshwenyega ka dilo tše dintši. Lega go le bjalo, go nyakega dilo tše sego kae goba selo setee feela. Maria yena o kgethile kabelo e botse gomme a ka se ke a e amogwa.” (Luka 10:41, 42) Jesu o be a era gore’ng? Na o be a era gore Mareta o be a rata dilo tše di bonagalago? Na o be a tšeela fase go šoma ga gagwe ka thata bakeng sa go lokiša dijo tše bose?

Ga go bjalo. Jesu ka ntle le pelaelo o ile a bona gore maikemišetšo a Mareta e be e le a lerato le a mabotse. Go feta moo, o be a sa nagane le gore go bontšha kamogelo e kgolo kudu ya baeng go be go fošagetše. O be a kile a ya “[monyanyeng] o mogolo wa kamogelo” wo Mateo a bego a mo diretše wona pejana. (Luka 5:29) Tabakgolo mo e be e se dijo tša Mareta; go e na le moo, e be e le dilo tšeo a bego a di etiša pele. O be a tshwenyegile kudu ka dijo tše dintši moo e lego gore o ile a se lemoge seo se bego se le bohlokwa ka go fetišiša. Seo e be e le eng?

Jesu, Morwa yo a tswetšwego a nnoši wa Jehofa Modimo, o be a le ka legaeng la gabo Mareta go tlo ruta therešo. Ga go selo seo se bego se le bohlokwa go feta seo, go akaretša le dijo tša gagwe tše di rothišago mare le go di lokiša ga gagwe. Ka ntle le pelaelo Jesu o ile a nyamišwa ke go bona Mareta a hlaelwa ke sebaka sa moswananoši sa go matlafatša tumelo ya gagwe, eupša o ile a mo dumelela gore a itirele kgetho. Lega go le bjalo, e be e le taba e kgolo gore Mareta a kgopele Jesu gore a laele Maria gore le yena a hlaelwe ke sebaka seo.

Ka baka leo, o ile a phošolla Mareta ka botho, a bitša leina la gagwe gabedi ka boleta e le gore a phohliše maswafo a gagwe, gomme a mo kgonthišetša ka gore go be go sa nyakege gore a “[belaele] le go tshwenyega ka dilo tše dintši.” Dijo tše sego kae ka sebjaneng setee goba tše pedi di be di lekane, kudukudu ka ge go be go ena le dijo tše dintši tša moya. Ka gona, o be a ka se dire selo go amoga Maria “kabelo e botse” yeo a bego a e kgethile—ya go ithuta go Jesu.

Pego ye ya mabapi le seo se diregilego ka ntlong ya gabo Mareta e na le dithuto tše dintši tšeo balatedi ba Kriste lehono ba ka ithutago tšona. Ga se ra swanela go dumelela selo le ge e le sefe se šitišana le go kgotsofatša ‘senyakwa sa rena sa moya.’ (Mateo 5:3) Gaešita le ge re nyaka go ekiša mohlala wa Mareta wa go fa ka seatla se se bulegilego le wa go šoma ka thata, le ka mohla ga re nyake go “belaela le go tshwenyega” kudu ka dilo tše sego bohlokwa kudu tša go sepedišana le go amogela baeng moo re feleletšago re hlaelwa ke dilo tše bohlokwahlokwa. Re itswalanya le badumedigotee, e sego feela bakeng sa go ba fa goba go hwetša dijo tša matsaka, eupša bakeng sa go kgothatšana le go fetišetšana dimpho tša moya. (Baroma 1:11, 12) Gaešita le dijo tše dinyenyane di ka dira gore sebaka seo e be se se agago e le ruri.

Kgaetšedi yo a Rategago o a Hwa—e Bile o a Tsošwa

Na Mareta o ile a amogela kgalemelo ya Jesu e botho le go ithuta go yona? Ga se ra swanela go makala. Ge moapostola Johane a dira matseno a pego e kgahlišago mabapi le kgaetšedi’a Mareta, o re gopotša ka gore: “Bjale Jesu o be a rata Mareta le ngwanabo le Latsaro.” (Johane 11:5) Go be go fetile dikgwedi ga e sa le Jesu a etela Bethania bjalo ka ge go hlalositšwe ka mo godimo. Go molaleng gore Mareta ga se a ka a ngala; ga se a ka a boloka sekgopi kgahlanong le Jesu ka baka la keletšo ya gagwe e lerato. O ile a e amogela ka pelo ka moka. Le mo tabeng ye, o re beetše mohlala o mobotse kudu wa tumelo, ka gobane ke mang wa rena yo a sa tsomego phošollo e nyenyane ka dinako tše dingwe?

Ge kgaetšedi’agwe a babja, Mareta o ile a swarega kudu ka go mo hlokomela. O dirile sohle seo a ka se kgonago go mo thuša go se kwe bohloko kudu le gore a be kaone. Lega go le bjalo, Latsaro o ile a babja le go feta. Dikgaetšedi tša gagwe di ile tša tšwela pele di mo hlokomela iri e nngwe le e nngwe le letšatši le lengwe le le lengwe. Mareta o ile a lebelela sefahlego sa kgaetšedi’agwe se se lapilego gakae, a gopola nywaga yeo ba e feditšego ba le gotee le dilo tšeo ba di thabetšego ba le gotee go akaretša le manyami a bona?

Ge go be go bonagala eka Latsaro o be a babja  moo ba ka se sa kgonago go mo thuša, Mareta le Maria ba ile ba romela molaetša go Jesu. O be a dira boboledi lefelong leo go bego go tšea matšatši a mabedi go ya go lona go tloga Bethania. Molaetša wa bona e be e le o mokopana: “Morena, tseba gore motho yo o mo ratago o a babja.” (Johane 11:1, 3) Ba be ba tseba gore Jesu o be a rata kgaetšedi’a bona e bile ba be ba na le tumelo ya gore o be a ka dira sohle seo a ka se kgonago go thuša mogwera wa gagwe. Na ba be ba holofetše gore Jesu o be a ka fihla pele maloba e eba maabane? Ge e le gore go be go le bjalo, dikholofelo tša bona ga se tša ka tša phethagala. Latsaro o ile a hwa.

Ba le gotee, Mareta le Maria ba ile ba llela kgaetšedi’a bona, ba dira ditokišetšo tša gore a bolokwe gotee le go amogela baeng ba bantši ba ba tšwago Bethania le dinagamabapi. Lega go le bjalo, ga ba kwe selo ka Jesu. Ka ntle le pelaelo Mareta o ile a makala le go feta ge nako e dutše e eya. Mafelelong, matšatši a mane ka morago ga lehu la Latsaro, Mareta o ile a kwa gore Jesu o be a batametše motse. Ka ge e le mosadi yo mafolofolo, le lebakeng le la manyami, Mareta o ile a emelela gomme ntle le go botša Maria, o ile a tšwa ka lebelo go yo gahlanetša Jesu.—Johane 11:20.

O itše ge a bona Mong wa gagwe, a bolela seo se bego se tshwentše yena le Maria matšatšing ao a fetilego: “Morena, ge nkabe o be o le mo, kgaetšedi ya ka nkabe a se a hwa.” Lega go le bjalo, Mareta o be a se a lahlegelwa ke kholofelo le tumelo. O okeditše ka gore: “Le ga bjale ke a tseba gore dilo tše dintši tše o di kgopelago go Modimo, Modimo o tla go nea tšona.” Gateetee Jesu o ile a bolela selo se itšego go matlafatša kholofelo ya gagwe: “Kgaetšedi ya gago o tla tsoga.”—Johane 11:21-23.

Mareta o be a nagana gore Jesu o be a bolela ka tsogo ya nakong e tlago, ka baka leo o ile a araba ka gore: “Ke tseba gore o tla tsoga tsogong letšatšing la mafelelo.” (Johane 11:24) Tumelo ya gagwe thutong yeo e be e le e kgolo kudu. Baetapele ba bangwe ba Bajuda, bao ba bitšwago Basadutsei, ba be ba gana gore go tlo ba le tsogo ya bahu, gaešita le ge e be e le thuto e kwagalago ka Mangwalong a buduletšwego. (Daniele 12:13; Mareka 12:18) Lega go le bjalo, Mareta o be a tseba gore Jesu o rutile ka kholofelo ya tsogo e bile o be a kile a tsoša bahu—gaešita le ge e be e se batho bao ba bego ba hwile nako e telele go swana le Latsaro. O be a sa tsebe seo se bego se letše ka pele.

Ke moka Jesu o ile a bolela mantšu ao a sa lebalegego a re: “Ke nna tsogo le bophelo.” Ee, Jehofa Modimo o file Morwa wa gagwe matla a go tsoša bahu lefaseng ka bophara nakong e tlago. Jesu o ile a botšiša Mareta a re: “Na o dumela se?” Ke moka o ile a nea karabo e lego mathomong a sehlogo se. O be a ena le tumelo ya gore Jesu e be e le Kriste, goba Mesia, gore e be e le Morwa wa Jehofa Modimo le gore baporofeta ba be ba boletše e sa le pele gore o be a tlo tla lefaseng.—Johane 5:28, 29; 11:25-27.

Na Jehofa Modimo le Morwa wa gagwe, Jesu Kriste, ba tšeela godimo tumelo ya mohuta woo? Ditiragalo tšeo di tlago go direga Mareta a lebeletše di nea karabo e kwagalago gabotse. O ile a kitimela go yo bitša ngwanabo. Ka morago ga moo, o ile a bona gore Jesu o be a kgomegile kudu ge a be a bolela le Maria le batho ba bantši bao ba bego ba lla bao ba bego ba ena le yena. O ile a bona mahlo a gagwe a tlala megokgo ge ka bolokologi a bonagatša manyami a gagwe ao bohloko bja go hwelwa bo a bakago. O ile a kwa ge Jesu a laela gore leswika le tlotšwe molomong wa lebitla la kgaetšedi’agwe.—Johane 11:28-39.

Ka ge a be a lebelela dilo ka tsela ya kgonthe, Mareta o ile a bolela gore setopo ga bjale se swanetše go ba se be se nkga, e lego matšatši a mane ka morago ga lehu. Jesu o ile a mo gopotša ka gore: “Na ga se ka go botša gore ge e ba o ka dumela o tla bona letago la Modimo?” O be a dumela seo gomme o ile a bona letago la Jehofa Modimo. Ka yona nako yeo, Jehofa o ile a nea Morwa wa gagwe matla a go tsoša Latsaro bahung! Nagana ka dinako tšeo Mareta a bego a tla dula a di gopola bophelo bja ga gagwe ka moka: Ge Jesu a goeletša a laela a re, “Latsaro, tšwaa!”; lešatana le le kwagalago go tšwa ka leweng leo Latsaro a boloketšwego ka go lona ge monna yo a tsoga a sa tatedišwe ka mašela ao a dirišitšwego go lokiša setopo seo se tlodišwego dinoko a lebile molomong wa lewa; taelo ya Jesu ya gore “mo tatolleng, le mo lese a sepele”; gotee le ge Mareta le Maria ba kitimela ka matsogong a kgaetšedi’a bona gomme ba mo gokarela ka borutho. (Johane 11:40-44) Bohloko bjoo bo bego bo tletše pelong ya Mareta bo ile bja tloga!

 Pego ye e bontšha gore tsogo ya bahu ga se toro feela; ke thuto ya Beibele yeo e ruthetšago pelo le selo sa kgonthe seo se hlatselwago ke histori. Jehofa le Morwa wa gagwe ba rata go putsa tumelo, bjalo ka ge ba dirile boemong bja Mareta, Maria le Latsaro. Le wena ba tla go putsa ka tsela yeo ge e ba o aga tumelo e matla e swanago le ya Mareta. *

“Mareta a ba Direla”

Pego ya Beibele e bolela ka Mareta lebakeng le lengwe gape. E be e le mathomong a beke ya mafelelo ya bophelo bja Jesu a le lefaseng. Ka ge a be a tseba gabotse ka mathata ao a bego a letše ka pele, Jesu gape o ile a kgetha lefelo le la Bethania gore a dule go lona. Go tloga moo o be a tla sepela dikhilomithara tše tharo go ya Jerusalema. Jesu le Latsaro ba be ba eja legaeng la Simone wa molephera, gomme moo re hwetša mantšu a mafelelo a mabapi le taba ye a rego: “Mareta a ba direla.”—Johane 12:2.

Se ruri ke seo mosadi yoo yo mafolofolo a bego a tlwaetše go se dira! Ge Beibele e bolela ka yena lekga la mathomo, e bolela ka yena a šoma; ge e bolela ka yena la mafelelo, e bolela ka yena a sa šoma, a dira sohle seo a ka se kgonago go hlokomela dinyakwa tša bao ba mo dikologilego. Diphuthego tša balatedi ba Jesu lehono di šegofaditšwe ka basadi ba swanago le Mareta—ba sebete le ba nago le seatla se se bulegilego, bao ba dulago ba bonagatša tumelo ya bona ka mediro le ka go ikgafa. Go ka direga gore Mareta o ile a tšwela pele a dira sona seo. Ge e ba go le bjalo, o dirile ka bohlale, ka gobane o be a sa tlo kopana le mathata a itšego.

Matšatši a sego kae ka morago, Mareta o ile a swanelwa ke go kgotlelela lehu le bohloko la Mong wa gagwe yo a rategago, Jesu. Go feta moo, baikaketši bao ba nyoretšego polao bao ba mmolailego ba be ba ikemišeditše le go bolaya Latsaro, ka ge go tsošwa ga gagwe go be go matlafatša tumelo ya ba bantši. (Johane 12:9-11) Le gona ke therešo gore lehu mafelelong le ile la kgaola ditlemagano tše lerato magareng ga Mareta le bana ba gabo. Ga re tsebe gore seo se diregile bjang goba neng, eupša seo re ka kgonthišegago ka sona ke se: Tumelo e bohlokwa ya Mareta e mo thušitše go kgotlelela go fihla bofelong. Ke ka baka leo Bakriste lehono ba swanetšego go ekiša tumelo ya Mareta.

[Mongwalo wa tlase]

[Seswantšho go letlakala 11]

Gaešita le ge a be a lla, Mareta o ile a dumelela Jesu a mo hlahla gore a lebiše tlhokomelo ditabeng tšeo di matlafatšago tumelo

[Seswantšho go letlakala 12]

Gaešita le ge a be a “belaela le go tshwenyega,” Mareta o ile a amogela phošollo ka boikokobetšo

[Seswantšho go letlakala 15]

Tumelo ya Mareta go Jesu e ile ya putswa ge a be a bona kgaetšedi’agwe e tsošwa