Ditaba tše Dibotse ke Eng?

“Ditaba tše tše dibotse . . . ”—MATEO 24:14.

BAKRISTE ba swanetše go bolela ‘ditaba tše dibotse tša Mmušo’ ka go di botša ba bangwe, ba hlalosa gore Mmušo ke pušo ya lefase ya ka moso yeo e tlago go buša lefase ka toko. Lega go le bjalo, polelwana ‘ditaba tše dibotse’ e dirišwa gape ka ditsela tše dingwe ka Beibeleng. Ka mohlala, re hwetša go bolelwa ka “ditaba tše dibotse tša go phološa” (Psalme 96:2); “ditaba tše dibotse tša Modimo” (Baroma 15:16); le “ditaba tše dibotse ka Jesu Kriste.”—Mareka 1:1.

Ge taba e bewa ka go lebanya, ditaba tše dibotse di akaretša ditherešo ka moka tšeo Jesu a di boletšego le tšeo barutiwa ba gagwe ba di ngwadilego. Jesu o boditše barutiwa ba gagwe pele a rotogela legodimong gore: “Ka gona, eyang le dire batho ba ditšhaba ka moka barutiwa, le ba kolobetša leineng la Tate le la Morwa le la moya o mokgethwa, le ba ruta go boloka dilo tšohle tšeo ke le laetšego tšona.” (Mateo 28:19, 20) Ka gona modiro wa Bakriste ba therešo ga se feela go botša ba bangwe mabapi le Mmušo; ba swanetše go katanela go dira barutiwa.

Na dikereke di dira se? Bao ba sa kwešišego seo Mmušo e lego sona—le gona ke ba bantši—ba ka se kgone go ruta ba bangwe ka nepo. Go e na le moo, ba nea dithero tšeo di beago batho pelwanatšhwaana tša mabapi le tebalelo ya dibe le go dumela go Jesu. Ba leka go sokolla batho ka mediro ya setšhaba, goba ka go aga dipetlele, dikolo le magae a badiidi. Gaešita le ge maiteko a bjalo a ka oketša palo ya batho bao ba tsenago kereke, ga a tšweletše Bakriste ba therešo bao ba katanago ka pelo ka moka go phela ka go dumelelana le seo Jesu a se rutilego.

Rathutatumelo yo mongwe o ngwala gore: “O tla hwetša diithuti goba baetapele ba Bakriste ba sego kae bao ba ganago gore re swanetše go dira barutiwa goba barutwana ba Jesu le go ba ruta go dira sohle seo Jesu a se boletšego. . . . Ditaelo tša Jesu tabeng ye ge e le gabotse di a kwagala. Re fo ba re sa dire seo a se boletšego. Ga re leke ka thata go dira bjalo. Gomme go molaleng gore ga re tsebe kamoo re ka dirago seo ka gona.”

Ka mo go swanago, nyakišišo yeo e dirilwego go Makatholika kua United States e utollotše gore 95 lekgolong e dumetše gore go bolela ditaba tše dibotse ke selo se se nyakegago tumelong ya bona. Lega go le bjalo, mo e nyakilego go ba batho bohle ba bona gore tsela e kaonekaone ya go dira se, e be e se go bolela ka tšona, eupša e be e le go phela maphelo a bona ka tsela yeo e lego gore e tla ba mohlala go ba bangwe. Yo mongwe wa bao go dirilwego nyakišišo go bona o itše: “Modiro wa Boebangedi o fapane le go fo bolela. Re swanetše go ba Ditaba tše Dibotse.” Makasine wa U.S. Catholic wo o dirilego nyakišišo ye o boletše gore ba bantši ga ba nyake go botša ba bangwe ka tumelo ya bona ka baka la “mohlala o mobe wa kereke mabapi le tshwaro e mpe ya tša thobalano gotee le dithuto tša kereke tšeo di gakantšhago.”

Lefelong le lengwe, mopišopo wa Methodist o llile ka gore dikereke tša gagwe di arogane e bile di gakanegile, di hloka sebete sa go phetha thomo ya tšona le gona di phela ka ditekanyetšo tša batho ka kakaretšo. O ile a botšiša ka segalo sa lentšu se se bontšhago kgakanego, a re: “Barwadi ba ebangedi ya Mmušo bao ba nago le boikarabelo ke bomang?”

Mopišopo ga se a ka a nea karabo ya potšišo ye. Eupša karabo e gona. O tla e hwetša sehlogong se se latelago.

[Ntlhakgolo go letlakala 6]

Ditaba tše dibotse di mabapi le Mmušo wa Modimo gotee le phološo ka go dumela go Jesu Kriste