Beibele e Fetoša Maphelo

KE BJANG mosadi yo e lego mothuši wa ka pareng yoo a bego a rogana, a enwa ka mo go feteletšego e bile a diriša dihlaretagi a ilego a kgona go fetoša tsela ya gagwe ya bophelo? Ke ka baka la’ng motho yo e kilego ya ba radipolitiki yo a sa ratego bodumedi a ile a fetoga modiredi wa bodumedi? Mohlahli wa ntwa wa maphodisa a Russia o ile a swanelwa ke go fenya ditlhohlo dife gore a be yo mongwe wa Dihlatse tša Jehofa? Bala seo batho ba ba se bolelago.

“Nna le Mma re Thabela Tswalano e Tsošološitšwego.”—NATALIE HAM

NGWAGA WA MATSWALO: 1965

NAGA: AUSTRALIA

BOPHELO BJA PELE E EBA MOKRISTE: GO DIRIŠA DIHLARETAGI

BOPHELO BJA KA BJA NAKONG E FETILEGO: Ke goletše motsaneng wa barei ba dihlapi wa Robe, Australia Borwa. Ditšhabeng tše bjalo, hotele ke lefelo leo batho ba yago go lona bakeng sa go dira segwera. Batswadi ba fetša nako e ntši ba le hoteleng, ka go rialo bana ba bona ba golela tikologong yeo bjala bo dirišwago gampe, yeo go roganwago e bile go kgogwago motšoko.

Ge ke ena le nywaga e 12, ke be ke kgoga, ke ena le tlotlontšu e kgolo ya maroga gomme ke dula ke elwa le mma. Ge ke be ke ena le nywaga e 15, batswadi ba ka ba ile ba arogana gomme ka morago ga dikgwedi tše 18, ka tloga gae. Ke be ke enwa bjala, ke diriša dihlaretagi e bile ke phela bophelo bjo bo gobogilego. Ke be ke befetšwe e bile ke gakanegile. Eupša ka ge ke ile ka tšea nywaga e mehlano ke ithuta karate le tlwaetšo ya basadi ya go itšhireletša, ke be ke nagana gore ke tla itlhokomela. Lega go le bjalo, dinakong tša ge ke be ke iketlile le go naganišiša kudu, ke ile ka fenywa ke manyami gomme ka rapela Modimo ke kgopela gore a nthuše. Ke be ke mmotša gore: “O se mpotše gore ke ye kerekeng.”

Lebakeng le itšego ka morago, mogwera yo a bego a rata bodumedi eupša e se setho sa kereke le ge e le efe o ile a mpha Beibele. O be a kgoga dihlaretagi go swana le bagwera ba bangwe ba rena. Lega go le bjalo, o be a tloga a bolela gore o dumela go Modimo gomme a nkgothaletša gore ke kolobetšwe. O ile a nkiša bodibeng bja kgaufsi gomme a nkolobetša. Ga e sa le go tloga ka nako yeo, ke be ke ikwa ke ena le tswalano e kgethegilego le Modimo. Lega go le bjalo, ga se ka ka ka hwetša nako ya go bala Beibele.

KAMOO BEIBELE E FETOTŠEGO BOPHELO BJA KA: Ka 1988, Dihlatse tše pedi di ile tša kokota mojako. E nngwe ya tšona e ile ya mpotšiša gore, “Na o tseba leina la Modimo?” Hlatse yeo e ile ya bala Psalme 83:18 ka Beibeleng ya yona, yeo e rego: “Gore batho ba tsebe gore wena yoo leina la gago e lego Jehofa, ke wena o nnoši o lego Yo Godimodimo godimo ga lefase ka moka.” Ke ile ka makala! Ge di sepetše, ke ile ka otlela dikhilomithara tše 56 go ya lebenkeleng la dipuku tša  Bokriste go yo hlahloba diphetolelo tše dingwe le go lebelela leina leo ka pukuntšung. Ka ge ke be ke kgonthišišitše gore leina la Modimo ke Jehofa, ke ile ka ipotšiša gore ke eng se sengwe seo ke bego ke sa se tsebe.

Mma o be a mpoditše gore Dihlatse tša Jehofa e be e le batho ba makatšago. Bonyenyane bjoo ke bego ke bo tseba ka tšona, ke be ke nagana gore di ikarotše kudu e bile ga di tsebe go ithabiša. Ke ile ka nagana go itira eka ga ke gona ge di etela legaeng la ka. Eupša ke ile ka fetoša monagano wa ka ge di fihla. Ke ile ka re di tsene gomme ra thoma go ithuta Beibele le semeetseng.

Lebakeng le lengwe le le lengwe ge re be re fetša go ithuta, ke be ke botša lesogana la ka, Craig, ka seo ke ithutilego sona. Mafelelong o ile a tenega kudu moo a ilego a tšea puku yeo re bego re ithuta ka yona ka diatleng tša ka gomme a thoma go e bala. Ka dibeke tše tharo, o ile a phetha ka gore o hweditše therešo ka Modimo. Nna le Craig re ile ra feleletša ka go kgaotša go diriša dihlaretagi le go nwa bjala ka mo go feteletšego, gomme ka tlogela mošomo wa ka wa go ba mothuši wa ka pareng. Gore re dumelelanye maphelo a rena le ditekanyetšo tša Beibele, re ile ra dira phetho ya go nyalana.

KAMOO KE ILEGO KA HOLEGA KA GONA: Ge re be re thoma go ithuta Beibele le Dihlatse tša Jehofa, nna le Craig re be re nyaka go kgaogana. Lehono, Craig ke monna yo a kgahlišago kudu gomme re na le bana ba babedi ba babotsana. E bile re na le bagwera ba bohlokwa bao ba nago le ditumelo tše swanago le tša rena.

Mathomong, mma o ile a befelwa ge a ekwa gore ke be ke kopanela le Dihlatse tša Jehofa. Lega go le bjalo, go tshwenyega ga gagwe go be go bakwa ke go se kwešiše. Ga bjale nna le mma re thabela tswalano e tsošološitšwego. Ga ke sa na le maikwelo a go ipona ke se na mohola ka garegare ga ka. Go e na le moo, ke na le morero bophelong gomme ke kwa dinyakwa tša ka tša moya di kgotsofatšwa.—Mateo 5:3.

“Ke Ile ka Ithuta Dilo tše Dintši tše di Makatšago ka Beibeleng.”—ISAKALA PAENIU

NGWAGA WA MATSWALO: 1939

NAGA: TUVALU

BOPHELO BJA PELE E EBA MOKRISTE: RADIPOLITIKI

BOPHELO BJA KA BJA NAKONG E FETILEGO: Ke belegetšwe Nukulaelae, sehlakahlaka se sebotse sa Pacific seo ga bjale e lego karolo ya Tuvalu. Bophelo bja sehlakahlakeng bo be bo tletše ka baruti bao ba bego ba hweditše tlwaetšo ya bona ya bodumedi kholetšheng Samoa. E be e le boikarabelo bja batho ba sehlakahlakeng gore ba fepe baruti le malapa a bona letšatši le letšatši, ba ba nee lefelo la bodulo, ge e le gabotse, dilo ka moka tšeo ba ba neago tšona e be e swanetše go ba tše kaonekaone. Gaešita le ge batho ba sehlakahlakeng ba be ba se na dijo tše di lekanego bakeng sa malapa a bona, ba be ba gapeletšega go hlokomela baruti.

Moruti wa sehlakahlakeng seo ke bego ke dula go sona o be a laola sekolo sa motse gomme a ruta bodumedi le thutafase. Ke gopola ke bona moruti a itia barutwana kudu moo ba bego ba thankgetše madi. Lega go le bjalo, ga go le yoo a kilego a ipelaetša, go akaretša le batswadi. Moruti o be a hlompšha tše nkego e be e le yena Modimo.

Ge ke be ke ena le nywaga e lesome, ke ile ka  tloga gae gomme ka ya sekolong se nnoši sa mmušo sa lefelong leo, e lego seo se bego se le sehlakahlakeng se sengwe. Ge ke fetša sekolong, ke ile ka thoma go šomela mmušo. Nakong yeo, dihlakahlaka e be e le karolo ya koloni ya Brithania yeo e bego e bitšwa Dihlakahlaka tša Gilbert le Ellice. Ke ile ka šoma mafapheng a fapafapanego pele ke eba mongwadi wa kuranta ya mmušo ya beke le beke. Dilo ka moka di be di sepela gabotse go ba go fihlela ke phatlalatša lengwalo leo le bego le sola tšhelete yeo e bego e dirišetšwa go lokišeletšwa ga ketelo ya Kgošana ya Wales. Mongwadi wa lengwalo leo o be a dirišitše leina la bofora gomme mookamedi wa ka o ile a gapeletša gore o nyaka go tseba leina la kgonthe la motho yoo. Ke ile ka gana go mmotša lona, gomme poledišano yeo e ile ya tsebja ke batho bohle.

Go se go ye kae ka morago ga tiragalo yeo, ke ile ka se sa šomela mmušo gomme ka ba radipolitiki. Ke ile ka thopa dikgetho tša Nukulaelae gomme ka hlongwa bjalo ka Tona ya tša Kgwebo le Ditšweletšwa tša Tlhago. Ka morago, ge batho ba tšwago dihlakahlakeng tša Kiribati (yeo e kilego ya bitšwa Gilbert) le Tuvalu (yeo e kilego ya bitšwa Ellice) ba be ba lokologa pušong ya Brithania, mmuši o ile a nkholofetša mošomo wa go ba hlogo ya kgoro ya bolaodi ya Tuvalu. Lega go le bjalo, ke be ke sa nyake go bonwa eka ke na le kgokagano le pušo ya bokoloni. Ka go re’alo, ga se ka ka ka amogela mošomo woo gomme ke sa thekgwe ke mmušo ke ile ka ingwadišetša go kgethelwa maemong a phagamego kudu dipolitiking. Ke ile ka se atlege dikgethong tšeo. Ka morago ga moo, ke ile ka boela le mosadi wa ka sehlakahlakeng sa gešo gomme ka phetha ka go phela bophelo bjo bo tlwaelegilego bja magaeng.

KAMOO BEIBELE E FETOTŠEGO BOPHELO BJA KA: Letšatši la Sontaga dihlakahlakeng e be e le Sabatha gomme batho ka moka ba le lebelela e le le lekgethwa eupša nna ke sa le lebelele bjalo. Leo e be e le letšatši la ka la go sesa ka sekepe le go rea dihlapi. Ke be ke sa nyake go tsebja ke le motho wa go rata bodumedi. Tate o ile a mpotša kamoo yena le ba bangwe ba bego ba nyamišitšwe ke ditiro tša ka ka gona. Eupša ke be ke ikemišeditše go se be ka tlase ga tutuetšo ya kereke.

Go le lengwe la maeto a ka a go ya Funafuti—sehlakahlaka seo mošate wa Tuvalu o lego go sona—moratho wa ka o ile a ntaletša gore ke ye le yena sebokeng sa Dihlatse tša Jehofa. Ka morago, moromiwa wa Hlatse o ile a mpha mokgobo wa dimakasine tša Morokami le Phafoga! gore ke di bale. O ile a ba a mpha le puku yeo e bego e pepentšha setlogo sa boheitene sa dithuto tšeo dikereke tše dintši tšeo go thwego ke tša Bokriste di bego di di ruta. Ke ile ka bala puku yeo ka makga a mmalwa. Ke ile ka ithuta dilo tše dintši tšeo di makatšago go tšwa Beibeleng, go akaretša le taba ya gore Bakriste ga ba gapeletšege go boloka Sabatha ya beke le beke. * Ke ile ka boledišana le mosadi wa ka ka dintlha tše gomme o ile a kgaotša go ya kerekeng le semeetseng.

Lega go le bjalo, ke be ke dirile keno ya gore ga ke nyake go tsenatsenana le bodumedi le ge e le bofe. Go be go fetile nywaga e ka bago e mebedi, eupša ke be ke se ka lebala dilo tšeo ke bego ke ithutile tšona. Mafelelong, ke ile ka ngwalela moromiwa yo wa kua Funafuti gomme ka mmotša gore ke be ke ikemišeditše go dira diphetogo. O ile a namela sekepe gomme a tla go nthuša go ithuta Beibele ka mo go oketšegilego. Tate o ile a galefa kudu ge a be a ekwa gore ke be ke nyaka go ba yo mongwe wa Dihlatse tša Jehofa. Eupša ke ile ka mmotša gore ke be ke ithutile mo gontši ka Beibele go Dihlatse le gore ke feditše le mogopolo.

KAMOO KE ILEGO KA HOLEGA KA GONA: Ka 1986, ke ile ka kolobetšwa bjalo ka yo mongwe wa Dihlatse tša Jehofa, gomme mosadi wa ka a kolobetšwa ngwageng o latetšego. Barwedi ba rena ba babedi le bona ba ile ba ithuta seo Beibele e se rutago gomme ba dira phetho ya go ba Dihlatse tša Jehofa.

Gona bjale ke thabela go ba setho sa sehlopha sa bodumedi seo, go swana le Bakriste ba lekgolong la pele la nywaga, se sa kgethollego ditho tša sona go ya ka maemo a gore ba bangwe ke baruti mola ba bangwe e le batho feela. (Mateo 23:8-12) E bile ka boikokobetšo ba latela mohlala wa Jesu gomme ba bolela le ba bangwe ka pušo ya Mmušo wa Modimo. (Mateo 4:17) Ruri ke leboga Jehofa Modimo bakeng sa go ntumelela gore ke ithute therešo ka yena le batho ba gagwe!

 “Dihlatse ga se tša ka tša Mpotša Gore ke Dumele Eng.”—ALEXANDER SOSKOV

NGWAGA WA MATSWALO: 1971

NAGA: RUSSIA

BOPHELO BJA PELE E EBA MOKRISTE: MOHLAHLI WA NTWA

BOPHELO BJA KA BJA NAKONG E FETILEGO: Ke belegetšwe Moscow, yeo ka nako yeo e bego e le mošate wa Soviet Union. Batswadi ba ka ba be ba dula moagong o mogolo wa madulo, gomme ba bantši ba baagišani ba rena ba be ba šoma gotee feketoring e swanago. Ke gopola ba belaela ka gore ke ngwana yo a nago le matšato kudu le go bolela gore ke be ke tla hwa pele ga nako goba ka feleletša ke le kgolegong. Ge e le gabotse, ge ke be ke ena le nywaga e lesome, ke be ke šetše ke le difaeleng tša maphodisa.

Ge ke ena le nywaga e 18, ke ile ka ngwadišetšwa go ba lešole ka kgapeletšo gomme ka hlankela bjalo ka mohlapetši wa mollwaneng. Ke ile ka boa gae ka morago ga nywaga e mebedi gomme ka šoma feketoring, eupša mošomo woo o ile wa nteša bodutu. Ka go re’alo ke ile ka ba yo mongwe wa maphodisa a Moscow a go swaragana le mpherefere gomme ka šoma bjalo ka mohlahli wa ntwa ya diatla. Ke ile ka thuša gore go golegwe disenyi kua Moscow gomme ka ya mafelong a mantši ao go nago le modubaduba nageng ka bophara. Moya wa ntwa o be o tletše ka go nna. Ge ke boela gae, ka dinako tše dingwe ke be ke swanelwa ke go se robale gotee le mosadi wa ka—ke tšhaba gore ke be ke tla mo gobatša ge ke robetše.

KAMOO BEIBELE E FETOTŠEGO BOPHELO BJA KA: Ge ke be ke thoma go ithuta Beibele le Dihlatse tša Jehofa, ke ile ka lemoga gore bophelo bja bošoro bjoo ke bego ke bo phela bo be bo sa dumelelane le ditekanyetšo tša Beibele. Ke ile ka ba ka bona go nyakega gore ke kgaotše go kgoga le go laola tekanyo ya bjala bjoo ke bego ke bo nwa. Lega go le bjalo, ke ile ka bea mabaka ka gore ke be nka se fetoše mošomo wa ka, ka ge ke be ke se na bokgoni bjo bongwe bja mošomo bjoo bo bego bo tla nthuša go hwetša mošomo woo nka fepago lapa la ka ka wona. E bile ke be ke bona eka nka se tsoge ke kgonne go dira boboledi, bjalo ka Dihlatse.

Mafelelong ke ile ka kgodišega gore pego ya Beibele e be e nepagetše. Ke ile ka homotšwa ke pego ya Hesekiele 18:21, 22. Ditemana tšeo di re: “Ge e ba yo kgopo a ka furalela dibe tša gagwe ka moka tše a di dirilego . . . , dikarogo tša gagwe ka moka di ka se gopolwe.”

Ke thabela gore Dihlatse ga se tša ka tša mpotša gore ke dumele eng eupša di nthušitše go bea mabaka ka seo ke bego ke ithuta sona. Ke ile ka tšea mokgobo wa dimakasine tša tšona tše e ka bago tše 40 gomme ka di bala ka dibeke tše tharo. Seo ke bego ke ithuta sona se ile sa nkgodiša gore ke hweditše bodumedi bja therešo.

KAMOO KE ILEGO KA HOLEGA KA GONA: Pele re ka ithuta Beibele, nna le mosadi wa ka re be re nyaka go hlalana. Gona bjale lenyalo la rena le kaonafetše. Mosadi wa ka o ile a thoma go ithuta Beibele le nna gomme ra dira phetho ya go hlankela Jehofa gotee. Ga bjale, lapa la ka le thabile kutšwanyana. Ke ile ka ba ka hwetša mošomo woo o bego o sa thulane le melao ya motheo ya Beibele.

Ge ke be ke eya bodireding bja ntlo le ntlo la mathomo, ke be ke tšhoga kudu—maikwelo ao ke bego ke ena le ona pele ke tšea karolo a be a ntlhasela. Ga bjale ke na le kgodišego ya gore nka dula ke phohlišitše maswafo, gaešita le ge motho yo mongwe a leka go nthumola. Ge nako e dutše e eya, ke ile ka ithuta go se felele batho pelo. Ke itshola gore ke sentše nako ya bophelo bja ka e ntši, eupša ga bjale bophelo bja ka bo na le morero wa kgonthe. Ke thabela go diriša matla ao ke nago le ona go hlankela Jehofa Modimo le go thuša ba bangwe.

[Mongwalo wa tlase]