Batamela Kgaufsi le Modimo

“Mokwi wa Dithapêlô”

1 KORONIKA 4:9, 10

NA RURI Jehofa Modimo o araba dithapelo tše tšwago pelong tša barapedi ba gagwe ba ineetšego? Pego ya Beibele ya motho yo a sa tsebjego gakaalo yo a bitšwago Jabese e bontšha gore Jehofa ruri ke “Mokwi wa dithapêlô.” (Psalme 65:2) Pego ye e nyenyane e hwetšwa go seo go ka thwego ke lefelo leo le sa naganwego—gare ga malokelelo a lešika ao a thomago pukung ya Pele ya Koronika. A re hlahlobeng 1 Koronika 4:9, 10.

Sohle seo re se tsebago ka Jabese se hwetšwa ditemaneng tše tše pedi. Go ya ka temana 9, mmagwe “ó mo reetše la Jabese ka xe a itše: Ke mmelexe ka bohloko.” * Ke ka baka la’ng a ile a kgetha leina le bjalo? Na o ile a belega morwa wa gagwe ka mahloko a fetago a tlwaelegilego a pelego? Na mohlomongwe e be e le mohlologadi, a llela gore monna wa gagwe o be a se gona bakeng sa go amogela ngwana wa bona lefaseng? Beibele ga e bolele selo. Eupša mmagwe ka letšatši le lengwe o be a tla ba le lebaka la go ikgantšha ka morwa wa gagwe. Bana ba gabo Jabese e ka ba e be e le batho ba ba lokilego, eupša “Jabese e be e le yêna a xodišwaxo mo xo bana babô.”

Jabese e be e le motho wa thapelo. O ile a thoma thapelo ya gagwe ka go kgopela tšhegofatšo ya Modimo. Ke moka o ile a dira dikgopelo tše tharo tšeo di bontšhago gore o be a e-na le tumelo e matla.

Sa pele, Jabese o lopile Modimo, a re: “O katološê naxa ya-ka.” (Temana 10) Monna yo yo a hlomphegago o be a se na megabaru, e bile o be a sa dume naga yeo e lego ya batho ba gabo. Kgopelo ya gagwe e tšwago pelong e ka no ba e be e le mabapi le batho kudu e sego naga. A ka no ba a be a kgopela gore go katološwe khutšo ya nagana ya gagwe e le gore e ka ba le barapedi ba bantši ba Modimo wa therešo. *

Sa bobedi, Jabese o ile a lopa gore “seatla” sa Modimo se be le yena. Seatla sa Modimo sa seswantšhetšo ke matla a gagwe, ao a a dirišago go thuša barapedi ba gagwe. (1 Koronika 29:12) Gore a amogele dinyakwa tša pelo ya gagwe, Jabese o ile a lebelela go Modimo yoo seatla sa gagwe e sego se sekopana bakeng sa bao ba bontšhago tumelo go yena.—Jesaya 59:1.

Sa boraro, Jabese o rapetše ka gore: ‘Mphemele kotsi, e se ntlhokofatše.’ Polelwana e rego ‘e se ntlhokofatše’ e ka šišinya gore Jabese o be a se a rapelela go tšhabela kotsi eupša o be a rapeletše gore a se ke a nyamišwa goba go fenywa ke mafelelo a bobe.

Thapelo ya Jabese e utollotše go tshwenyega ga gagwe ka borapedi bja therešo le tumelo ya gagwe gotee le go bota ga gagwe Mokwi wa dithapelo. Jehofa o ile a arabela bjang? Pego ye e nyenyane e phetha ka mantšu a rego: “Xomme Modimo a mo tlišetsa tše a bexo a di kxopêla.”

Mokwi wa dithapelo ga se a fetoga. O kgahlegela dithapelo tša barapedi ba gagwe. Bao ba dumelago go yena e bile ba mmotago ba ka kgodišega ka gore: “Go sa šetšwe seo re se kgopelago go ya ka thato ya gagwe, o a re kwa.”—1 Johane 5:14.

[Mengwalo ya tlase]