“Senonyana sa Mafelelo”

ALLEN o ile a thoma go diriša bjala gampe ge a be a e-na le nywaga e 11. * Yena le bagwera ba gagwe ba be ba bapala sethokgweng gomme ba ekiša batho bao ba bego ba ba bona difiliming. Batho bao ba bego ba ba ekiša e be e le ba boikgopolelo, eupša bjala bjoo Allen le bagwera ba gagwe ba bego ba bo nwa e be e le bja kgonthe.

Tony o be a e-na le nywaga e 40 ge a oketša ganyenyane-ganyenyane dinwelo tša gagwe tša bjala go tloga go se tee goba tše pedi mantšiboeng a mangwe go ya go tše hlano goba tše tshela. Mafelelong, o ile a se sa hlwa a tseba gore o nwa dinwelo tše kae tša bjala ka letšatši.

Allen o ile a nyaka thušo ya bothata bja gagwe bja bjala. Tony o ile a gana thušo yeo ba lapa le bagwera ba nago le tlhokomelo ba bego ba re ba mo fa yona. Allen o a phela lehono gomme o kgona go bolela ka seo se ilego sa mo diragalela; Tony o hwile nywageng e itšego e fetilego kotsing ya koloi ka morago ga go nwa bjala bjo bontši.

Gaešita le ge motho a e-nwa ka mo go feteletšego a nnoši, mafelelo a mokgwa woo wa gagwe a kgoma maphelo a batho ba bangwe, gantši ka ditla-morago tše nyamišago. Go diriša bjala gampe gantši ke sebaki se segolo sa go goboša ka mantšu le go goboša mmeleng, ditlhaselo le dipolao, dikotsi tša dikoloi le tša mošomong gotee le mathata a mantši a tša maphelo. Go diriša bjala gampe go dira gore setšhaba se lahlegelwe ke dimilione tše dikete tša diranta ngwaga le ngwaga, re se sa bolela ka kgobalo ya mmeleng le maikwelong yeo go e bakelago batho ka o tee ka o tee, malapa gotee le bana.

Mokgatlo wa U.S. National Institutes of Health o re, lega go le bjalo, “ga se batho ka moka bao ba nwago bjala ka mehla bao ba nago le bothata bja bjala le gona ga se batho ka moka bao ba nago le bothata bja bjala bao ba nwago bjala letšatši le letšatši.” Ba bantši bao ba sego ba lemalela bjala ba na le mokgwa wa go nwa ka mo go feteletšego ba sa lemoge. Ba bangwe ba nwa ka dinako tše itšego eupša ba nwa dinwelo tša bjala tše fetago tše hlano ka nako e tee.

Ge e ba o kgetha go nwa bjala, tekanyo e feteletšego ke e kaaka’ng? O tla tseba bjang nako yeo ka yona o sego wa swanela go nwa “senonyana sa mafelelo”? (Diema 23:29, 30, Contemporary English Version) Dihlogo tše latelago di tla ahla-ahla tsebišo e holago mabapi le taba ye.

[Mongwalo wa tlase]