Na Lefase le tla Fedišwa?

“BOFELO bja lefase ke taba yeo e dulago e tsoša kgahlego ya batho, kudu-kudu difiliming.” Mantšu ao a boletšwe ke mongwadi wa kuranta John Scalzi. Ke ka baka la’ng batho ba bantši ba gogelwa ke difilimi tšeo di bolelago ka bofelo bja lefase? Scalzi o nea lebaka ka gore: “Ka gobane di bolela ka dilo tšeo re di boifago.” Na o dumela seo? Na re na le mabaka a kwagalago mabapi le go boifa gore lefase—le diphedi tšohle tše lego go lona—le tla fedišwa bjang le gona neng?

Mo e nyakilego go ba letšatši le letšatši, re kwa ka dikotsi tša tlhago tšeo di bakago tshenyo e kgolo lefaseng ka bophara. Bidio e tšhošago ya tshenyego e bjalo e bapalwa gantši thelebišeneng le Inthaneteng. Ge re dula re bontšhwa diswantšho tša batho ba kgonthe le mafelo a kgonthe a senywa, go bonolo go bona bofelo bja lefase e le kotsi ya kgonthe e sego feela selo seo se bontšhwago difiliming.

Ge ba gakatša dipoifo tše bjalo, bo-rathutamahlale ba ruta mabapi le kamoo bofelo bja lefase bo ka bago ka gona. Ba bangwe ba bile ba dira dikakanyetšo tša mabapi le seo go ka thwego ke letšatši la bofelo bja lefase. Ka March 2008, Monthly Notices of the Royal Astronomical Society e begile gore bo-rathuta-dinaledi ba babedi ba akanyetša gore ka morago ga nywaga e ka bago e dimilione tše dikete tše 7,59 letšatši le tlo batamela polanete ya rena gomme la e moyafatša.

Na ruri lefase le tla fedišwa letšatši le lengwe?

Na Polanete ya Rena e na le Letšatši la go Senyega?

Beibele e re kgonthišetša ka gore: “Meloko e a tla gomme meloko e a felela, eupša lefase le dula le le gona.” (Mmoledi 1:4, New International Version) Jehofa Modimo ka tsela e šireletšegilego, “methêô ya [lefase] O e theile wa xo se sišinyêxe” gomme o le hlametše gore le be gona go iša “neng le neng.” (Psalme 104:5) Na mantšu a ao a buduletšwego a Modimo a kwagala e se therešo? Ke ka baka la’ng o swanetše go dumela gore lefase la rena le ka se fedišwe, mola bo-rathutamahlale ba bangwe ba bolela se se fapanego?

Go ba gona, nagana go se nene ka dilo tšeo di rekišwago ka lebenkeleng. Tše dingwe di ngwadilwe letšatši la tšona la go senyega. Ke mang yoo a beago letšatši leo? Na e be e fo ba kgopolo e theilwego tsebong ya molaodi wa lebenkele? Ga go bjalo le gatee! Modiri wa selo seo ke yena yoo a beago letšatši la sona la go senyega. Re bota letšatši leo ka gobane modiri wa selo seo o se tseba go feta motho le ge e le ofe. Ruri re swanetše go bota Modiri wa polanete ya rena le go feta! Lentšu la gagwe le bolela ka go lebanya gore “lefase O le thekxile ’me la êma” ka mo go sa felego. Letšatši la go senyega ga le gona—le ka mohla!—Psalme 119:90.

Lega go le bjalo, na go a kgonega gore batho ba se nago boikarabelo ba senye polanete ye wa go se lokišege? Ga go bjalo le gatee! Go fapana le badiri ba dilo ba batho, Jehofa ke “Mo-kxôna-tšohle.” (Jobo 42:2) Ke ka baka leo a ka tiišetšago ka kgodišego gore: “Lentšu la-ka le le tšwaxo molomong wa-ka, . . . le tlo phêtha se ke le rometšexo sôna.” (Jesaya 55:11) Re ka kgodišega gore “e a re dirilexo” a ka se dumelele selo se mo dira gore a se sa phethagatša morero wa gagwe ka lefase. (Psalme 95:6) Morero woo ke ofe, gona Modimo o tla o phethagatša bjang?

Mmušo wa Modimo o tla Phethagatša Morero wa Gagwe

Go tlaleletša go tiišetšeng gore lefase le ka se tsoge le fedišitšwe, Lentšu la Modimo gape le re botša gore o ile “a le dirêla xo dulwa ke batho.” (Jesaya 45:18) Gaešita le ge lefase le dutšwe ke batho ka nywaga e dikete, seo ka bosona ga se sa ka sa phethagatša morero wa Modimo.

Jehofa ke “Modimo yo a thabilego” le gona “ó rata tša tokô.” (1 Timotheo 1:11; Psalme 37:28)  Morero wa gagwe ke gore batho ka moka ba phele ka lethabo e bile ba lokologile go hlokeng toka. Bakeng sa go phethagatša morero wa gagwe, Modimo o boletše e sa le pele gore o tla hloma Mmušo legodimong woo o tlago go buša lefase ka moka. (Daniele 2:44) Ge a be a le lefaseng, Jesu ka mehla o be a bolela ka pušo ya Mmušo wa Modimo. O kgothaleditše barutiwa ba gagwe go o rapelela ka gobane o be a tseba ka ditšhegofatšo ka moka tšeo lefase le tlago go ba le tšona ka tlase ga pušo ya Mmušo woo. (Mateo 6:9, 10; 24:14) Tše dingwe tša ditšhegofatšo tšeo ke dife?

▪ Khutšo le tšhireletšego di tla ata ka gobane Modimo o holofetša go fediša dintwa ka moka.—Psalme 46:9.

▪ Go tla ba le motlalo wa dijo bakeng sa bohle.—Psalme 72:16.

▪ Tlhokomelo ya tša maphelo e ka se nyakege ka gobane “xo ba ba axilexo fá xo ka se bê le e a rexo: Ke a babya!”—Jesaya 33:24.

▪ Go lla ka baka la go hwelwa go ka se be gona, ka gobane “lehu le ka se hlwe le sa ba gona.”—Kutollo 21:4.

▪ Modimo o holofetša gore batho ba gagwe ba tla ikagela nywako, ba dula ba šireletšegile gomme ba ‘fele ba thaba.’—Jesaya 65:17-24.

Ga go pelaelo gore o hlologetše go phela ka tlase ga maemo a swanago le ao go boletšwego ka ona ka mo godimo. Jehofa o na le phišego e tukago—kganyogo e tukago—ya go phethagatša tšohle tšeo a di boletšego e sa le pele. (Jesaya 9:6, 7) Lega go le bjalo, o ka ipotšiša gore: ‘Ke nywaga e dikete dikholofetšo tša Modimo di begilwe ka Beibeleng. Ke ka baka la’ng di se tša hlwa di phethagatšwa?’

Go se Fele Pelo ga Modimo go re Lebiša Phologong

Kgonthišega gore “Jehofa ga a diege mabapi le kholofetšo ya gagwe.” Beibele e hlalosa gore Modimo ka lerato o be a dutše a bontšha go se re felele pelo. Ka baka leo, re kgothaletšwa gore re “[tšee] go se fele pelo ga Morena wa rena e le phološo.” (2 Petro 3:9, 15) Eupša ke ka baka la’ng go se fele pelo ga Modimo go nyakega bakeng sa phološo?

Sa pele, Modimo o tseba gore pele a ka nea batho ba lokilego legae le le šireletšegilego le le le atlegilego, o swanetše go “senya bao ba senyago lefase.” (Kutollo 11:18) Lega go le bjalo, ka ge a rata batho, Jehofa “ga a rate gore go fedišwe le ge e le mang.” Ka baka la seo, ka go se fele pelo Tatago rena wa legodimong o be a dutše a leka “go eletša e mobe gore a gomele tsela e mpe ya gagwe.” Go phetha seo, Jehofa o dira gore molaetša wa mabapi le Mmušo o bolelwe lefaseng ka bophara. * (Hesekiele 3:17, 18, PK) Bohle bao ba arabelago gabotse temošong ya Modimo le go dumelelanya maphelo a bona le melao ya gagwe e lokilego ya motheo ba tla phološwa gomme ba thabela bophelo bjo bo sa felego lefaseng la paradeise.

Boela go Modimo Gomme o Phološwe

Beibele e re swaretše “ditaba tše dibotse” e le ka kgonthe. (Mateo 24:14) E re nea kgonthišetšo ya Modimo ya gore lefase le ka se fedišwe le ka mohla! Go oketša moo, go ya ka boporofeta bja Beibele, re ka ba le tumelo ya gore “xo se xokae e mobe ó tlo ba a ile.” Kgaufsinyane, ke feela bao ba lokilego go ya ka pono ya Modimo bao ba tlago go ba “beng ba naxa; ba tlo thaba ka botlalô bya moláô.” (Psalme 37:9-11, 29; Mateo 5:5; Kutollo 21:3, 4) Ge re sa letetše nako ye, Modimo o tla tšwela pele a bitša ka go se fele pelo a re: “Boêlang xo Nna Le phološwê, lena ba maxómô ohle a lefase.” (Jesaya 45:22) O tla arabela bjang?

O re’ng o sa ikemišetše go boela go Modimo? Psalme 37:34 e re kgothatša ka gore: “Letêla Morêna, O swarê ka tsela ya xaxwe, a Xo xodišê O bê mong wa naxa.” Dihlatse tša Jehofa di tla thabela go go thuša go ithuta ka mo go oketšegilego ka morero wa Modimo wa ka mo go sa felego ka lefase le kamoo o ka phelago ka gona e le gore o tle o bone ge morero woo o phethagala.

[Mongwalo wa tlase]

[Mothopo wa Seswantšho go letlakala 22]

NASA photo