“Xo tlo Feletša Neng kè Fêla kè Bitša?”

Jayne o llile ka gore: “Ke fo ba ke nyaka gore bohloko bjo bo fele!” O be a swerwe ke bolwetši bja kankere gomme e be e phatlalala mmeleng wa gagwe. Lapa labo le bagwera ruri ba be ba duma eka ba ka fo ntšha bolwetši le bohloko bjoo go yena! Ba ile ba rapela Modimo gore a mo thuše. Na o be a tla ba theetša? Na o be a e-na le taba?

MODIMO o lemoga boemo bja moloko wa batho. Lentšu la gagwe, Beibele, le re: “Tlholo yohle e tšwela pele e tsetsela gotee gomme e e-kwa bohloko gotee go fihla bjale.” (Baroma 8:22) Modimo o a tseba gore go na le batho ba dimilione tše makgolo bao, go swana le Jayne, ba kwago bohloko letšatši le lengwe le le lengwe, e ka ba mmeleng, maikwelong goba monaganong. Modimo o bona batho ba dimilione tše 800 bao ba robalago ka tlala bošegong bjo bongwe le bjo bongwe, ba bangwe ba dimilione bao ba tlaišwago ke bošoro bja ka lapeng gotee le batswadi ba bantši bao ba tshwenyegilego ka bokamoso le polokego ya bana ba bona. Na o kile wa ipotšiša ge e ba Modimo a tla gata mogato? Ka ntle le pelaelo, ka ge rena re nyaka go thuša baratiwa ba rena, na Modimo a ka se nyake go thuša moloko wa batho, e lego tlholo ya gagwe?

Ge e ba o ile wa ipotšiša dipotšišo tšeo, ga se wena feela. Nywaga ya ka godimo ga e 2 600 e fetilego, monna yo a botegago, Habakuku, o be a ikwa go swana le batho ba bantši lehono gomme o ile a botšiša Modimo gore: “Morêna, xo tlo feletša neng kè fêla kè bitša Ò sa kwe? Ke hlaboša lentšu kè Xo bitša kè patilwe, Ò sa nnamolele. O re’ng Ò ntesa kè lebane le bobe? O dula Ò bôna kè hlaka, kè lebane le thlakolô le sehloxo, xò tsoxa ntwa, xò hlaxa phapang?” (Habakuku 1:2, 3) Habakuku, e lego moporofeta wa Moheberu, o ile a bona ditiro tše tšhošago tša bošoro bjo bo se nago tlhaologanyo le bogale mehleng ya gagwe. Lehono, ditiro tše bjalo ke ditaba tša ka mehla tšeo di nyamišago batho ba nago le kwelobohloko.

Na Modimo o ile a nyatša dipelaelo tša Habakuku? Aowa. O ile a theetša dipotšišo tša Habakuku tše tšwago pelong ke moka a homotša le go kgothatša monna yo yoo a bego a gateletšegile. Jehofa Modimo o ile a matlafatša tumelo ya Habakuku ka kholofetšo ya gore O be a tlo fediša tlaišego. Molaetša wa Modimo wa kholofelo le wena o tla go kgothatša, bjalo ka ge o ile wa kgothatša Jayne le lapa labo. Dihlogo tše di latelago di tla araba dipotšišo tše: Re ka kgonthišega bjang gore Modimo ruri o na le taba le rena? Modimo o tla dira’ng go fediša tlaišego, gona neng?