Batamela Kgaufsi le Modimo

“Nna Jehofa Modimo wa Lena ke yo Mokgethwa”

Lefitiko Kgaolo 19

“MOKGETHWA, mokgethwa, mokgethwa ke Jehofa Modimo.” (Kutollo 4:8) Ka mantšu ao, Beibele e hlalosa gore bokgethwa ke bja Jehofa, gomme bo akaretša go seka le go hlweka ka tsela e phagamego kudu. Modimo o arogane ka mo go feletšego le bobe, gomme a ka se šilafatšwe goba go senywa ke sebe ka tsela le ge e le efe. Na se se bolela gore batho ba sa phethagalago ga ba na kholofelo ya go gwerana le Modimo yo a phagamego le yo mokgethwa? Ga go bjalo la gatee! Anke re ahla-ahleng mantšu ao a tletšego kholofelo ao a ngwadilwego go Lefitiko kgaolo 19.

Jehofa o boditše Moše gore: “Bolela le phuthego ka moka ya bana ba Isiraele.” Mantšu ao a latetšego a be a lebišitšwe go setšhaba ka moka. Ke’ng seo Moše a bego a tla ba botša sona? Modimo o tšwetše pele ka gore, “O re go bona: Bang ba bakgethwa, gobane Nna Jehofa Modimo wa lena ke Yo mokgethwa.” (Temana 2, PK) Moisiraele yo mongwe le yo mongwe o be a swanetše go bontšha gore ke yo mokgethwa. Mantšu a rego “bang” a bontšha gore ye e be e se tšhišinyo eupša e be e le taelo. Na Modimo o be a letetše gore ba dire selo seo ba ka se se kgonego?

Ela hloko gore Jehofa o boletše ka bokgethwa bja gagwe, e se gore ba be le tekanyo e lekanago le ya gagwe ya bokgethwa, eupša e le lebaka leo le thekgago taelo ya gagwe. Ka mantšu a mangwe, Jehofa o be a sa botše barapedi ba gagwe ba sa phethagalago ba Baisiraele gore e be ba bakgethwa go swana le yena. Seo se be se ka se kgonege. Jehofa, “Yêna Mokxêthwa,” o phagametše batho ka moka ka bokgethwa. (Diema 30:3) Lega go le bjalo, ka ge Jehofa e le yo mokgethwa, o letetše gore barapedi ba gagwe e be ba bakgethwa—ke gore, ka tekanyo yeo batho ba sa phethagalago ba ka kgonago go e fihlelela. Ba be ba tla ipontšha bjang e le ba bakgethwa?

Ka morago ga go nea taelo ya gore e be ba bakgethwa, Jehofa ka Moše o dirile lelokelelo la dinyakwa tšeo di akaretšago dikarolo ka moka tša bophelo. Go be go letetšwe gore Moisiraele yo mongwe le yo mongwe a latele ditekanyetšo tša boitshwaro tše bjalo ka tše latelago: go bontšha go ba le pono e swanetšego ka batswadi le batšofadi (ditemana 3, 32); go naganela difoa, difofu le ba bangwe bao ba tlaišegago (ditemana 9, 10, 14); go bontšha potego le go se bebe sefahlego ge a dirišana le ba bangwe (ditemana 11-13, 15, 35, 36); le go rata morapedi-gotee le yena bjalo ka ge a ithata. (Temana 18) Ka go latela ditekanyetšo tše le tše dingwe tšeo go boletšwego ka tšona, Moisiraele e be e tla ba yo ‘mokgethwa go Modimo wa gagwe.’—Numeri 15:40.

Taelo ye ya mabapi le bokgethwa e re nea tsebo e bohlokwa ka ditsela tša Jehofa Modimo le kamoo a naganago ka gona. Gare ga tše dingwe, re ithutile gore e le gore re ka ba le tswalano ya kgaufsi le yena, go nyakega gore re dire kamoo re ka kgonago go phela ka go dumelelana le ditekanyetšo tša gagwe tša boitshwaro bjo bokgethwa. (1 Petro 1:15, 16) Ka go latela ditekanyetšo tšeo, re ka phela gakaone-kaone ka mo go ka kgonegago.—Jesaya 48:17.

Taelo ya gore re be ba bakgethwa e bontšha le gore Jehofa o bota barapedi ba gagwe. Jehofa le ka mohla ga a letele gore re mo nee se se fetago seo re ka se kgonago. (Psalme 103:13, 14) O a tseba gore rena batho, bao ba dirilwego ka seswantšho sa gagwe, re ka kgona go hlagolela bokgethwa—bonyenyane ka tekanyo e itšego. (Genesi 1:26) Na o tutueletšegile go ithuta ka mo go oketšegilego mabapi le kamoo o ka batamelago kgaufsi le Modimo yo mokgethwa, Jehofa?

[Seswantšho go letlakala 9]

Re ka kgona go hlagolela bokgethwa