Sehlare “sa xo se Pône Matlakala”

NA O kile wa bona naga yeo e tletšego dihlare tše dibotse tše ditala? Ka ntle le pelaelo o ka dumela gore seo ke selo se se kgahlišago kudu. Ge e ba o bona dihlare tše dintši tše dikgolo tšeo di tletšego matlakala, na o ka nagana gore go na le komelelo lefelong leo? Ka mo go fapanego, o tla ba o tseba gore go swanetše go ba go e-na le meetse a mantši ao a dirago gore dihlare tšeo di dule e le tše ditala.

Ka mo go swanetšego, Beibele e swantšha batho bao ba nago le tumelo e matla le sehlare se segolo, se setala. Ka mohlala, ela hloko mantšu a a kgahlišago ao a tšwago ditemaneng tše tharo tša mathomo tša Psalme ya pele:

“Yo šexo ké monna eo a sa sepelexo à lailwe ke bakxôpô, a se xatê tsela ya ba-dira-dibe, a se dulê ’tulong tša bakweri. Sa xaxwe ya ba xo thabêla molaô wa Morêna, molaô woo a o akanya mosexare le bošexo, A swana le sehlare-se-šingwa-nokeng ya meetse, sa xo enywa dienywa lebaka la xôna, sa xo se pône matlakala; ’me tšohle tše a di diraxo di a lêtlêxa.”

Ka mo go swanago, go Jeremia 17:7, 8 re bala gore: “Dithšexofatšô di tlo tlêla eo a botaxo Morêna, yo Morêna e lexo Moholofêlwa w’axwe. Ó etša sehlare se-šengwa-meetseng, se-iša-medu mo nokeng. Le xe xo fiša, xa se kwe selô; mahlare a sôna e fêla e le a matalá; le ka ngwaxa wa lenyôra xa se thšoxe selô, xa se lese xo enywa.”

Ditemaneng tše ka bobedi, dihlare di dirišwa ka tsela ya seswantšhetšo go bontšha seo se diregago ka motho yo a dirago se se nepagetšego gomme a thabela melao ya Modimo le go mmota ka mo go feletšego. Se se dira gore re botšiše gore, Ke ka ditsela dife motho yo bjalo a swanago le sehlare se setala ka tsela ya seswantšhetšo? Anke re hlahlobeng ditemana tše ka mo go tseneletšego.

“Sehlare-se-šingwa-nokeng ya Meetse”

Dihlare tšeo go bolelwago ka tšona di hlaloswa e le tše bjetšwego ‘dinokeng tša meetse’ goba “meetseng,” e sego nokeng e tee. Papišo e swanago e hwetšwa go Jesaya 44:3, 4, moo Jehofa Modimo a boletšego ka tsela yeo ka yona a tlago go hlokomela Bajuda ba itsholago bao ba boilego bothopša Babilona. A diriša moporofeta Jesaya, Jehofa o itše: “Naxa ye e nyorilwexo ke e thšêla meetse, mo xo omilexo ke iša dinokana . . . Ba tlo hloxa bà le xare xa mabyang, bo-ka mexokare dinokeng tša meetse.” Mo go thwe “dinokana” le ‘dinoka tša meetse’ di dira gore bašegofatšwa ba hloge bjalo ka dihlare tša megokare tšeo di tletšego matlakala.

Gaešita le mafelong a temo lehono, o ka bona diforo tša meetse ao a elelago go tšwa mothopong o mogolo wa meetse o bjalo ka sediba se išago, noka, letsha goba letamo. Ka kakaretšo, di bopa karolo ya tshepedišo ya go nošetša mašemo. Ka dinako tše dingwe mekero ya meetse e lebišwa mašemong a dihlare tša dienywa. Mabakeng a mangwe, diforo di nošetša mašemo ka lehlakoreng le lengwe mola ka go le lengwe di nošetša dihlare tšeo di tletšego matlakala,  mohlomongwe di swaya moo tšhemo e felelago gona.

Dihlare tšeo di bjetšwego ka thoko ga diforo tše bjalo di gola gabotse bjang? Psalme 1:3 e bolela ka sehlare “sa xo enywa dienywa lebaka la xôna.” Dinageng tšeo go bolelwago ka tšona ka Beibeleng, go na le mego, dihlare tša digaranata le tša diapola go akaretša le mepalema gotee le mehlware. Gaešita le ge mogo o ka fihlelela bophagamo bja dimithara tše senyane o e-na le makala ao a phatlaletšego, dihlare tše dingwe tše dintši tšeo di nago le dienywa ga di gole gakaalo. Lega go le bjalo, di kgona go gola le go ba tše di kgahlišago gomme tša tšweletša dienywa tše dintši ka nako e swanetšego.

Mehleng ya bogologolo, dihlare tše dikgolo tša megokare di be di mela go bapa le mabopo a dinoka le dinokana kua Siria le Palestina. Dihlare tša megokare gantši ka Beibeleng di tswalanywa le diforo goba ‘meedi ya mafula.’ (Lefitiko 23:40, NW) Dihlare tša meduwane tšeo e lego mohuta wa megokare le tšona di ka hwetšwa di metše mo go nago le meetse a mantši. (Hesekiele 17:5, NW) Dihlare tše tše dikgolo le tše di kgahlišago di hlalosa gabotse ntlha yeo mopsalme le Jeremia ba bego ba nyaka go e bolela, ya gore: Bao ba nyakago go latela molao wa Modimo gomme ba mmota ka mo go feletšego ba tla dula ba e-na le tswalano e botse le Modimo ‘gomme tšohle tše ba di dirago di tla letlega.’ Na se ga se seo re se nyakago—go atlega bophelong?

Go Thabela Molao wa Jehofa

Lehono batho ba leka go atlega ka ditsela tše dintši. Ba ineela go phegeleleng dilo tšeo di ka ba tlišetšago botumo le lehumo, e lego tšeo gantši ba sa di hwetšego gomme seo se a ba nyamiša. Lega go le bjalo, ke’ng seo se ka tlišago kgotsofalo ya kgonthe le lethabo la ka mo go sa felego bophelong? Mantšu a Jesu a Thuto ya Thabeng a re nea karabo. O itše: “Go thaba bao ba lemogago go nyaka ga bona dilo tša moya, ka ge mmušo wa magodimo e le wa bona.” (Mateo 5:3) Ka kgonthe, lethabo la kgonthe ga le tlišwe ke go ba le mahumo eupša le tlišwa ke go lemoga le go kgotsofatša kganyogo ya rena ya go ba le tswalano le Modimo e le gore tswalano yeo e ka ba e tiilego, go swana le dihlare tše di kgahlišago tšeo di tšweletšago dienywa ka lebaka la gona. Re ka gola bjang tswalanong ya rena le Modimo?

Go ya ka mopsalme, sa pele go na le dilo tšeo re swanetšego go di phema. O boletše ka ‘go laiwa ke bakgopo,’ “tsela ya ba-dira-dibe” le ‘ditulo tša bakweri.’ E le gore re thabe, re swanetše go phema bao ba kwerago goba bao ba hlokomologago melao ya Modimo.

Ke moka, re swanetše go thabela molao wa Jehofa. Ge re thabela selo goba modiro o itšego, re tsoma sebaka se sengwe le se sengwe sa go o dira, na ga go bjalo? Ka gona, go thabela molao wa Modimo go bolela go tšeela Lentšu la Modimo godimo kudu, go kganyoga go ithuta lona ka mo go oketšegilego le go le kwešiša gakaone.

Sa mafelelo, re swanetše go le bala “mosexare le bošexo.” Seo se bolela gore re swanetše go bala Beibele ka mehla le go naganišiša ka seo re se balago. Re swanetše go ikwa go swana le kamoo mopsalme a bego a ikwa ka gona ka Lentšu la Modimo ge a be a opela gore: “Melaô ya xaxo ke e rata xakaka’ng! Ke eleletša yôna mehla yohle.”—Psalme 119:97.

Ee, ge re hwetša tsebo e nepagetšego le kwešišo ya Jehofa Modimo gomme re mmota e bile re bota dikholofetšo tša gagwe ka mo go feletšego, ruri re tla ba le tswalano e botse le yena. Ge e ba re dira bjalo, re tla swana le monna yo a thabilego yoo a hlalositšwego ke mopsalme—“tšohle tše a di diraxo di a lêtlêxa.”